ឃាត់ខ្លួនជនសង្ស័យ៣នាក់ ពាក់ព័ន្ធករណីប្រើប្រាស់គ្រឿងញៀន ដកហូតបានទាំងទូហ្គេមបាញ់ត្រី ២គ្រឿង
ភ្នំពេញ៖ គណៈបញ្ជាការឯកភាពខណ្ឌចំការមន ដឹកនាំដោយលោក កែវ សំណាង អភិបាលរងខណ្ឌ ចុះបង្ក្រាប និងឃាត់ខ្លួនជនសង្ស័យ៣នាក់ ពាក់ព័ន្ធករណីប្រើប្រាស់គ្រឿងញៀន ដកហូតបានទាំងទូហ្គេមបាញ់ត្រីផងដែរ ។
ការបង្ក្រាបនេះ បានធ្វើឡើងកាលពីវេលាម៉ោង៤និង៣៥នាទីល្ងាច ថ្ងៃទី១៨ ខែវិច្ឆិកា ឆ្នាំ២០១៩ ចំណុចទីតាំងគ្មានលេខ ផ្លូវ១០១ ក្រុមទី៣១ ភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដោយមានការចូលរួមពីនគរបាលប៉ុស្តិ៍ផ្សារដើមថ្កូវ ។
សមត្ថកិច្ចបានឲ្យដឹងថា ជនសង្ស័យ ទី១ឈ្មោះ ឃុត ម៉ែត ភេទប្រុស អាយុ២៤ឆ្នាំ ស្នាក់នៅមិនពិតប្រាកដ ទី២ ឈ្មោះ យឹម សីហា ភេទប្រុស អាយុ២៥ឆ្នាំ ស្នាក់នៅភូមិកំពង់បាយ ឃុំកំពង់បាយ ស្រុកកោះសូទិន ខេត្តកំពង់ចាម និងជនសង្ស័យទី៣ ឈ្មោះ ទេព សុភ័ក្ត្រ ភេទប្រុស អាយុ៣៣ឆ្នាំ ស្នាក់នៅមិនពិតប្រាកដ។
មុននឹងឈានដល់ការចុះបង្ក្រាបខាងលើ កម្លាំងនគរបាលប៉ុស្តិ៍ផ្សារដើមថ្កូវ សហការជាមួយនគរបាលខណ្ឌចំការមន បានចុះបង្ក្រាបទីតាំងល្បែងស៊ីសងបាញ់ត្រីមួយកន្លែង ដោយធ្វើការដកហូតបានទូហ្គេមបាញ់ត្រី២គ្រឿង និងឃាត់ខ្លួនអ្នកមើលការខុសត្រូវម្នាក់ឈ្មោះ គង់ លីដា ភេទស្រី អាយុ២៧ឆ្នាំ ស្នាក់នៅភូមិ៥ សង្កាត់ផ្សារដើមថ្កូវ យកមកសាលាខណ្ឌចំការមន ដើម្បីធ្វើការអប់រំ ។ ចំណែកជនសង្ស័យជាអ្នកលេងល្បែងស៊ីសង៣នាក់ ត្រូវបានសមត្ថកិច្ចធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការតាមច្បាប់បន្តទៀត ៕
