ជនជាតិចិន បើករថយន្តឡិចស៊ីស លឿនជ្រុលបុករថយន្ត Ford ពេញទំហឹងនៅចំណុចស្តុបទួលទំពូង
ភ្នំពេញៈ ជនជាតិចិនបើកបរខ្វះការប្រុងប្រយ័ត្ន បណ្តាលឲ្យរថយន្តពីរគ្រឿង បានរងការខូចខាត ខណៈបើកលឿនបុកគ្នាពេញទំហឹង កាលវេលាម៉ោង៦ព្រឹកថ្ងៃទី២០ ខែ វិច្ឆិកា ឆ្នាំ ២០១៩ នៅចំណុចស្តុបទួលទំពូង ផ្លូវ១៦៣ កែងផ្លូវម៉ៅសេទុង សង្កាត់បឹងកេងកងទី៣ ខណ្ឌបឹងកេងកង ។
តាមប្រភពព័ត៌មានពីសាក្សី ដែលបានឃើញហេតុការណ៍នេះ បានឲ្យដឹងថា មុនកើតហេតុគេបានឃើញរថយន្តម៉ាក Ford ពណ៌ទឹកប្រាក់ ពាក់ផ្លាកលេខ ភ្នំពេញ 2AK 5701 ធ្វើដំណើរតាមបណ្តោយមហាវិថីម៉ៅសេទុង ទិសដៅពីកើតទៅលិចក្នុងល្បឿន ខណៈមកដល់ចំណុចស្តុបទួលទំពូង ស្រាប់តែជនជាតិចិន បើករថយន្តឡិចស៊ីស ពណ៌ស ពាក់ផ្លាកលេខភ្នំពេញ 2AQ 6142 ធ្វើដំណើរយ៉ាងលឿនជ្រុលបុកចំពាក់កណ្តាលរថយន្ត Ford ពេញទំហឹងបណ្តាលឲ្យរថយន្តឡិចស៊ីស ខូចខាតផ្នែកខាងមុខទាំងស្រុង ចំណែក រថយន្ត Ford ខ្ទាតទៅមុខជាង១០០ម៉ែត្ររងការខូច ខាតចំហៀងខាងស្តាំ ។
ក្រោយកើតហេតុ សមត្ថកិច្ចមូលដ្ឋានបានចុះដល់ទីតាំង ហើយបានទំនាក់ទំនងទៅនគរបាលជំនាញចរាចរណ៍ខណ្ឌ សហការជាមួយនគរបាលជំនាញចរាចរណ៍ នៃស្នងការដ្ឋាននគរបាលរាជធានីភ្នំពេញ ចុះវាស់វែងស្ទូចយករថយន្តទាំងពីរគ្រឿង ទៅរក្សាទុកនៅការិយាល័យចរាចរណ៍ផ្លូវគោក រង់ចាំដោះស្រាយគ្នានាពេលក្រោយ៕
