ក្រុមហ៊ុន Huawei និយាយថា ខ្លួនបានដាក់ពាក្យស្នើសុំទៅតុលាការកាណាដា ដើម្បីបញ្ឈប់ការធ្វើបត្យាប័ន CFO

ប្រធានផ្នែកហិរញ្ញវត្ថុរបស់ក្រុមហ៊ុន Huawei គឺលោកស្រី ម៉េង វ៉ានចូវ (Meng Wanzhou) កូនស្រីរបស់ស្ថាបនិកក្រុមហ៊ុន Huawei ត្រូវបានអាជ្ញាធរកាណាដា ចាប់ខ្លួនកាលពីថ្ងៃទី ១ ខែធ្នូឆ្នាំ ២០១៨ នៅទីក្រុង Vancouver តាមសំណើរបស់សហរដ្ឋអាមេរិក ដោយចោទប្រកាន់ថា មានការសង្ស័យថាមិនបានអនុវត្ត តាមទណ្ឌកម្មរបស់សហរដ្ឋអាមេរិក ប្រឆាំងនឹងអ៊ីរ៉ង់។

ក្រុមហ៊ុន Huawei បានបដិសេធម្តងហើយម្តងទៀត ចំពោះការធ្វើខុសណាមួយ ហើយបានទទូចថា លោកស្រីម៉េង មិនបានធ្វើអ្វីខុសច្បាប់ឡើយ។

អ្នកនាំពាក្យរបស់ក្រុមហ៊ុនបច្ចេកវិទ្យាយក្សចិន បាននិយាយថា ក្រុមហ៊ុន Huawei បានដាក់ពាក្យសុំទៅតុលាការកាណាដា ដើម្បីបញ្ឈប់ការធ្វើបត្យាប័ន របស់លោកស្រីម៉េង ទៅកាន់សហរដ្ឋអាមេរិក។

យោងតាមរបាយការណ៍មុនៗ សវនាការធ្វើបត្យាប័នគ្រោងនឹងចាប់ផ្តើម នៅថ្ងៃទី ២០ ខែមករាឆ្នាំ ២០២០ ។

ក្រុមហ៊ុនចិននេះ ត្រូវបានសហរដ្ឋអាមេរិក និងប្រទេសមួយចំនួនទៀត ចោទប្រកាន់ពីបទលួចយកព័ត៌មានពាណិជ្ជកម្ម។ ទីក្រុងវ៉ាស៊ីនតោន ក៏បាននិយាយផងដែរថា ខ្លួនសង្ស័យថាក្រុមហ៊ុន Huawei បានធ្វើការឱ្យរដ្ឋាភិបាលចិន ដែលជាសត្រូវរបស់សហរដ្ឋអាមេរិក និងប្រទេសដែលកំពុងជាប់ពាក់ព័ន្ធ នឹងពាណិជ្ជកម្មដ៏ធំមួយ ជាមួយទីក្រុងវ៉ាស៊ីនតោន។

ក្រុមហ៊ុន Huawei បានច្រានចោលការអះអាង អំពីកិច្ចសហប្រតិបត្តិការរបស់ខ្លួន ជាមួយអាជ្ញាធរ ហើយបានសារភាពថា ខ្លួនមិនមានកំហុស ក្នុងការចោទប្រកាន់ពីបទលួចសម្ងាត់។

ទំនាក់ទំនងចិន – កាណាដា មានភាពតានតឹងបន្ថែមទៀត បន្ទាប់ពីការឃុំខ្លួនពលរដ្ឋកាណាដាពីរនាក់ គឺអតីតអ្នកការទូត Michael Kovrig និងអ្នកជំនួញ Michael Spavor នៅក្នុងប្រទេសចិនភ្លាមៗ បន្ទាប់ពីការចាប់ខ្លួនលោកស្រីម៉េង។ ខណៈពេលដែលការឃុំខ្លួន ត្រូវបានគេចាត់ទុកថា ជាការសងសឹករបស់ក្រុងប៉េកាំង ចំពោះការចាប់ខ្លួន នាយកប្រតិបត្តិក្រុមហ៊ុន Huawei អាជ្ញាធរចិន បានបដិសេធការចោទប្រកាន់នេះ ដោយទទូចថា បុរសទាំងពីរ បង្កការគំរាមកំហែងដល់សន្តិសុខជាតិ៕