សិស្សម្នាក់ បើកម៉ូតូឆ្លងផ្លូវមិនប្រយ័ត្ន ត្រូវគោយន្តកែច្នៃ បុកចំពីមុខ បណ្តាលឱ្យរងរបួសធ្ងន់
ខេត្តស្វាយរៀងៈ យុវសិស្សម្នាក់ បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍មួយ រវាងគោយន្តកែច្នៃ និងម៉ូតូ ខណៈពេលដែលជនរងគ្រោះ ជិះម៉ូតូឆ្លងកាត់ថ្នល់ ក៏ត្រូវគោយន្តកែច្នៃបុកចំពីមុខតែម្តង។ ហេតុការណ៍នៃគ្រោះថ្នាក់ខាងលើនេះ បានកើតឡើង កាលពីវេលាម៉ោង១៥និង៥០នាទី រសៀលថ្ងៃទី២២ ខែវិច្ឆិកា ឆ្នាំ ២០១៩ លើផ្លូវជាតិលេខ១ ចន្លោះបង្គោលគីឡូម៉ែត្រលេខ១៣៧ -១៣៨ ស្ថិតក្នុងភូមិប្រសូតិ១ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
ប្រភពដដែល បានបន្តថាៈ មានគោយន្ដមួយគ្រឿង ពណ៌បៃតង គ្មានផ្លាកលេខ អ្នកបើកបរមិនស្គាល់អត្តសញ្ញាណបានរត់គេចពីកន្លែងកើតហេតុ ធ្វើដំណើរទិសដៅពីកើតទៅលិច មកដល់ចំណុចកើតហេតុខាងលើ ស្រាប់តែមានម៉ូតូមួយគ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៥ ពាក់ផ្លាកលេខស្វាយរៀង ១G-១៨០០ បើកបរដោយឈ្មោះ ឡេង ស៊ីម៉ន ភេទប្រុស អាយុ១៦ឆ្នាំ មុខរបរ សិស្ស រស់នៅភូមិព្រៃរំដួល ឃុំប្រសូតិ ស្រុកស្វាយទាប ខេត្តស្វាយរៀង ពាក់មួកសុវត្ថិភាព រងរបួសធ្ងន់ បែកក្បាលហូរឈាមពេញថ្នល់ ។ ជនរងគ្រោះ ធ្វើដំណើរចេញពីសាលា ឆ្លងកាត់ផ្លូវ ពីជើងទៅកើត ក៏ត្រូវគោយន្ដបុកចំពីមុខតែម្ដងទៅ។
សមត្ថកិច្ចបានបន្ថែមទៀតថាៈ ករណីនេះបង្កការគ្រោះថ្នាក់និងខូចខាត មានមនុស្ស របួសធ្ងន់ ១ នាក់ គោយន្ដខូចខាត ១គ្រឿង ម៉ូតូខូចខាតធ្ងន់ ១គ្រឿង ។
ដោយឡែក អ្នករបួសត្រូវបានក្រុមគ្រួសារបញ្ជូន ទៅសម្រាកព្យាបាលនៅមន្ទីរពេទ្យខេត្តស្វាយរៀង ។
ចំពោះមធ្យោបាយទាំងពីរ យកមករក្សាទុកនៅ អធិការដ្ឋាននគរបាលស្រុកស្វាយទាប។ នគរបាលមូលដ្ឋាន បានបញ្ជាក់ពីមូលហេតុថា មកពីម៉ូតូបើកឆ្លងកាត់ផ្លូវ មិនមានការប្រុងប្រយ័ត្ន ទើបបង្កឲ្យមានគ្រោះថ្នាក់៕
