អាមេរិក នឹងបន្តកិច្ចសហប្រតិបត្តិការ លើការងារបោសសម្អាតមីន និងសំណល់ជាតិផ្ទុះ នៅកម្ពុជា
អាជ្ញាធរមីន៖ឯកអគ្គរដ្ឋទូតសហរដ្ឋអាមេរិក បានឯកភាព នឹងបន្តកិច្ចសហប្រតិបត្តិការ លើការងារបោសសម្អាតមីន និងសំណល់ជាតិផ្ទុះ ពីសង្គ្រាម នៅកម្ពុជា។
នៅរសៀលថ្ងៃទី២២ ខែវិច្ឆិកា ឆ្នាំ២០១៩ លោកទេសរដ្ឋមន្ត្រី លី ធុជ ទទួលបន្ទុកបេសកកម្មពិសេស អនុប្រធានទី១ បានអនុញ្ញាតឲ្យលោក W. Patrick Murphy ឯកអគ្គរដ្ឋទូតសហរដ្ឋអាមេរិក ចូលជួបសម្តែងការគួរសម និងពិភាក្សាស្តីពីកិច្ចសហប្រតិបត្តិការលើការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា។
លោកទេសរដ្ឋមន្ត្រី លី ធុជ បានមានប្រសាសន៍ ថ្លែងនូវអំណរគុណចំពោះជំនួយគាំទ្ររបស់ប្រជាជន និងរដ្ឋាភិបាលសហរដ្ឋអាមេរិក នាពេលកន្លងមក ទាំងសម្ភារៈ បច្ចេកទេស និងថវិកាដល់ការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា ដែលបានជួយរំដោះដីសុវត្ថិភាពជូនប្រជាពលរដ្ឋ ហើយលោកសង្ឃឹមយ៉ាងមុតមំាថា រដ្ឋាភិបាលសហរដ្ឋអាមេរិក និងបន្តផ្តល់ជំនួយលើការបោសសំអាតមីនបន្ថែមទៀតដល់កម្ពុជា។
ជាមួយគ្នានេះ ទេសរដ្ឋមន្រ្តី ក៏បានស្នើសុំឲ្យសហរដ្ឋអាមេរិកត្រូវទទួលខុសត្រូវ និងយកចិត្តទុកដាក់ ជួយបោសសម្អាតកាកសំណល់ពីសង្រ្គាមរបស់អាមេរិក ដែលបានទម្លាក់មកលើប្រទេសកម្ពុជា នៅតាមបណ្តោយព្រំដែនកម្ពុជា-វៀតណាម ឲ្យបានអស់ ពីព្រោះវាបានកំពុងធ្វើប្រជាពលរដ្ឋកម្ពុជាស្លាប់ និងពិការជាច្រើនក្នុងមួយឆ្នាំៗ និងគាំទ្រដល់ផែនការយុទ្ធសាស្រ្តជាតិ២០២០-២០២៥ ដែលរាជរដ្ឋាភិបាលកម្ពុជា ទើបតែបានដាក់ចេញនាពេលថ្មីៗនេះ (បោសសម្អាតមីនដែលបានដឹងឲ្យអស់ត្រឹមឆ្នាំ២០២៥)។
លោកឯកអគ្គរដ្ឋទូតសហរដ្ឋអាមេរិក បានឯកភាពនឹងបន្តកិច្ចសហប្រតិបត្តិការលើការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា។ លោក ក៏បានបញ្ជាក់ពីជំហររបស់លោកថា នឹងខិតខំធ្វើឲ្យទំនាក់ទំនងការទូត និងកិច្ចសហប្រតិបត្តិការ រវាងប្រទេសទាំងពីរ កាន់តែល្អប្រសើរឡើងវិញ ចាប់ពីពេលនេះតទៅ ដើម្បីជាប្រយោជន៍រវាងប្រទេសយើងទាំងពីរ។
លោក W. Patrick Murphy បានស្មើសុំឲ្យទុករឿងពីអតីតកាលជាអតីតកាល ហើយលោកសន្យាថា នឹងខិតខំធ្វើឲ្យទំនាក់ទំនងការទូត និងកិច្ចសហប្រតិបត្តិការ រវាងប្រទេសយើងទាំងពីរ ឲ្យបានកាន់តែល្អប្រសើរឡើងវិញ ចាប់ពីពេលនេះតទៅ ដើម្បីជាប្រយោជន៍រវាងប្រទេសយើងទាំងពីរ
លោក W. Patrick Murphy បានលើកឡើងថា នឹងយកវិស័យសកម្មភាពមីន ជាវិស័យស្នូលមួយ ក្នុងការទំនាក់ទំនងការទូត និងកិច្ចសហប្រតិបត្តិការ ជាមួយកម្ពុជា ហើយថា ស្នើសុំចុះទស្សនកិច្ចចំការមីននិងគ្រាប់ នៅភូមិភាគឦសាន ដើម្បីស្វែងយល់អំពីវិស័យសកម្មភាពមីន នៅកម្ពុជា ដើម្បីមានមូលដ្ឋានគ្រឹះ ក្នុងការធ្វើរបាយការណ៍ទៅរដ្ឋាភិបាលអាមេរិក សុំបង្កើនថវិកាជំនួយរបស់អាមេរិក ដល់វិស័យសកម្មភាពមីន នៅកម្ពុជា និងគាំទ្រយុទ្ធសាស្រ្តជាតិវិស័យសកម្មភាពមីន ២០២០-២០២៥៕
