ប្រទះឃើញសពជនសង្ស័យជាឃាតករ អារកសម្លាប់កម្មការិនី ជាសង្សារ កាលពីម្សិលមិញ ដោយសាកសពអណ្តែតទឹក ខាងកើតរោងចក្រ
ខេត្តស្វាយរៀង៖ នៅរសៀលថ្ងៃទី២៣ ខែវិច្ឆិកា ឆ្នាំ២០១៩នេះ ប្រជាពលរដ្ឋបានប្រទះឃើញ សាកសពបុរសម្នាក់អណ្តែតទឹក នៅខាងកើតរោងចក្រអំពូលភ្លើង ដែលឃាតករសម្លាប់នារីរោងចក្រអំពូលភ្លើងម្សិលមិញ ប្រហែលជិតមួយគីឡូម៉ែត្រពីរោងច្រក។ ដែលហេតុការណ៍នេះ បង្កជាការភ្ញាក់ផ្អើលយ៉ាងខ្លាំងពីសំណាក់ប្រជាពលរដ្ឋ ក៏ដូចជាសមត្ថកិច្ច ចុះទៅដល់ទីតាំង។
បើតាមការអះអាងរបស់ប្អូនសាកសព បានបញ្ជាក់ប្រាប់ថា សពជាពិតជាបងប្រុស និងជាជនសង្ស័យ ដែលសមត្ថកិច្ចកំពុងតាមចាប់ខ្លួន ក្នុងករណីសម្លាប់កម្មការិនីជាសង្សាររបស់ខ្លួនពិតប្រាកដមែន។ សូមបញ្ជាក់ថា ជនសង្ស័យឈ្មោះ នាង ក្រឹម មានទីលំនៅភូមិព្រៃគាវ ឃុំកំពង់ចក ស្រុករំដួល ខេត្តស្វាយរៀង។ ចំណែកសមត្ថកិច្ចបានសន្និដ្ឋានថា ជនសង្ស័យជាឃាតករ បន្ទាប់ពីធ្វើសកម្មភាពសម្លាប់នារីជាសង្សារហើយ បានមកលាងខ្លួននៅស្រះនេះ ប្រហែលជាកំពុងលាងសម្អាតដៃជើង ក៏រអិលធ្លាក់ចូលស្រះទឹកនេះលង់ស្លាប់តែម្តង ព្រោះឃើញមានមួក កាបូបរបស់ជនសង្ស័យនៅលើគោក ហើយនៅលើខ្លួនសព ក៏មិនមានស្លាកស្នាមអ្វីដែរ។ សមត្ថកិច្ចបានឲ្យដឹងថា ស្រះទឹកនេះ មានជម្រៅណាស់ ព្រោះជាស្រះដែលគេកាយយកអាចម៍ដី។
គួររំលឹកថា ករណីអារកសម្លាប់កម្មារិនីរោងចក្រអំពូលភ្លើងម្នាក់ យ៉ាងព្រៃផ្សៃកាលពីម្សិលមិញ បង្កជាការភ្ញាក់ផ្អើលយ៉ាងខ្លាំងពីមហាជន។ បន្ទាប់ពីស្រាវជ្រាវយ៉ាងយកចិត្តទុកដាក់រួចមក សមត្ថកិច្ចបានកំណត់មុខសញ្ញាជនសង្ស័យ ជាឃាតករសម្លាប់នារីរងគ្រោះហើយ គឺ ជនសង្ស័យជាសង្សារនារីរងគ្រោះ។
សមត្ថកិច្ចបានឲ្យដឹងថា ករណីឃាតកម្មនៅថ្ងៃទី២២ ខែវិច្ឆិកា ឆ្នាំ២០១៩នេះ នៅវេលាម៉ោង៦និង៣២នាទីព្រឹក នៅក្នុងរោងចក្រ ធីវ៉ាយ ស្ថិតក្នុងតំបន់សេដ្ឋកិច្ចពិសេសស្វាយរៀងហ្គីហ្គារីសស៍ ក្នុងភូមិដើមពោធិ៍ ឃុំកណ្ដៀងរាយ ស្រុកស្វាយទាប ខេត្តស្វាយរៀង។ ករណីឃាតកម្មនេះ បង្កឡើងដោយជនសង្ស័យឈ្មោះ នាង ក្រឹម ភេទអាយុ ២៥ឆ្នាំ ត្រូវជាសង្សារបស់នារីរងគ្រោះឈ្មោះ ខឹម ពិសាល អាយុ២៤ឆ្នាំ រស់នៅភូមិព្រៃរការ ឃុំឈើទាល ស្រុកស្វាយជ្រំំ ខេត្តស្វាយរៀង។ សមត្ថកិច្ចបានឲ្យដឹងទៀតថា មូលហេតុដែលជនសង្ស័យសម្លាប់នារីរងគ្រោះជាសង្សារ ព្រោះ គ្រួសារខាងស្រីមិនឲ្យរៀបការ។ ក្រោយពីធ្វើសកម្មភាពរួច ជនសង្ស័យបានរត់គេចខ្លួនបាត់តែម្តង៕
