បុរសម្នាក់ស្លាប់ ដោយឧបករណ៍ឆក់ត្រី
កណ្តាល ៖ បុរសម្នាក់បានស្លាប់ក្នុងទឹក បន្ទាប់ពីទៅឆក់ត្រីមិនប្រយ័ត្ន បណ្តាលឲ្យឆ្លងចរន្តឆក់ខ្លួនឯងស្លាប់ កាលពីថ្ងៃទី២២ ខែវិចិ្ឆកា ឆ្នាំ២០១៩ វេលាម៉ោង១៨ ចំណុចព្រែកមុខកំពូល នៅភូមិថ្មី ឃុំស្វាយអំពារ ស្រុកមុខកំពូល ខេត្តកណ្តាល។
ស្នងការដ្ឋាននគរបាលខេត្តកណ្តាល បានឲ្យដឹងថា ជនរងគ្រោះ ឈ្មោះ សាង សេងហុង អាយុ២៩ឆ្នាំ នៅភូមិថ្មី ឃុំស្វាយអំពារ ស្រុកមុខកំពូល ខេត្តកណ្តាល មុខរបរ កសិករ។ វត្ថុតាងចាប់យក ៖ ដងឆក់ត្រីចំនួន២ អាគុយ៤០អំពែចំនួន១គ្រឿង កន្ត្រក់ជ័រ ចំនួន១ ។
នគរបាលបានបញ្ជាក់ពីសភាពរឿងហេតុថា ៖ នៅថ្ងៃទី២២ ខែវិច្ឆិកា ឆ្នាំ២០១៩វេលាម៉ោង១៧ ជនរងគ្រោះបានចេញពីផ្ទះ តែម្នាក់ឯង គោលបំណងទៅឆក់ត្រីនៅចំណុច កើតហេតុ ដោយមានឧបករណ៍ជាប់ខ្លួន រួមមាន អាគុយចំនួន១គ្រឿង ៤០អំពែ អាំងវ័រទ័រចំនួន១ ដងឆក់ត្រីចំនួន២និងកន្ត្រកដាក់ត្រីចំនួន១ មធ្យោបាយដោយម៉ូតូចំនួន១គ្រឿង។ លុះមកដល់ម៉ោង១៨ ប្រពន្ធជនរងគ្រោះបាត់ប្តីយូរពេក និងមានប្រផ្នូលមិនល្អ ក៏ទៅតាមរកប្តីឃើញ អាំងវ័រទ័រឆក់ត្រីនៅមាត់ច្រាំងព្រែកមុខកំពូល ដោយមានការសង្ស័យប្រពន្ធជនរងគ្រោះបានចុះទឹករាវរកប្តីបានប្រទះឃើញសពប្តីនៅក្នុងទឹក ហើយក៏ឆោឡោ ស្រែកហៅបងប្អូនឲ្យមកជួយស្រង់យកជនរងគ្រោះមកផ្ទះ ។ ដោយមិនអស់ចិត្ត បងប្អូនក៏ដឹកយកសពជនរងគ្រោះ តាមរថយន្តទៅមន្ទីរពេទ្យបង្អែករកាកោងហើយគ្រូពេទ្យប្រាប់ថា ជនរងគ្រោះបានស្លាប់ទៅហើយ បន្ទាប់មកក៏ដឹកសពមកផ្ទះវិញ។
ក្រោយពីទទួលដំណឹងរួចមក នៅវេលាម៉ោង២០ មន្ត្រីជំនាញនិងកម្លាំងនគរបាលប៉ុស្តិ៍ រួមទាំងអាជ្ញាធរមូលដ្ឋានបានចុះដល់កន្លែងកើតហេតុ ពិនិត្យសាកសពនៅផ្ទះជនរងគ្រោះ ឃើញថា ជនរងគ្រោះពុំមានស្លាកស្នាមអ្វីផ្សេងទៀតឡើយ។
ក្រោយពីពិនិត្យសាកសពរួចមក និងផ្អែកតាមចម្លើយរបស់ប្រពន្ធជនរងគ្រោះ និងការពិនិត្យសាកសពជាក់ស្ដែងរបស់ផ្នែកជំនាញ បច្ចេកទេស វិទ្យាសាស្ត្រស្រុក ពិនិត្យឃើញថា ជនរងគ្រោះស្លាប់ដោយសារ ឆក់ត្រី (ឆ្លងចរន្តភ្លើងដោយឧបករណ៍ឆក់ត្រី) ឆ្លងចរន្តភ្លើងស្លាប់ដោយខ្លួនឯង ៕ដោយ៖កូឡាប