អាវុធហត្ថខេត្តកំពង់ឆ្នាំង បង្ហាញមុខក្រុមចោរប្លន់៥នាក់

កំពង់ឆ្នាំង ៖ កម្លាំងកងរាជអាវុធហត្ថខេត្តកំពង់ឆ្នាំង នៅព្រឹកថ្ងៃទី២២ ខែធ្នូ ឆ្នាំ២០១៩នេះ បានបង្ហាញមុខក្រុមចោរប្លន់ចំនួន៥នាក់ ព្រមទាំងវត្ថុតាងជាច្រើន ដែលបានបង្ក្រាប ក្នុងបទល្មើស។

មន្ត្រីអាវុធហត្ថខេត្តកំពង់ឆ្នាំង បានឲដឹងថា ករណីទី១ នៅថ្ងៃទី១៨ ខែធ្នូ ឆ្នាំ២០១៩ នៅភូមិដើមពពេល ឃុំថ្មឥដ្ធ ស្រុកកំពង់ត្រឡាចសមត្ថកិច្ចបានចាប់បានជនសង្ស័យចំនួន២នាក់ ក្នុងនោះម្នាក់ឈ្មោះ ឡាន សៀវម៉េង និង ម្នាក់ទៀតឈ្មោះសេង តុលា។

ករណីទី២  នៅថ្ងៃទី១៩  ខែធ្នូ សមត្ថកិច្ចបានបង្ក្រាបជនសង្ស័យម្នាក់ទៀត នៅចំណុចខណ្ឌព្រែកព្នៅ ស្រុកពញាឮ ខេត្តកណ្ដាល ដោយចាប់បានជនសង្ស័យម្នាក់ឈ្មោះហេង តុលា។

ករណីទី៣ នៅថ្ងៃទី១៩ ខែធ្នូ  សមត្ថកិច្ចបានបង្ក្រាប ជនសង្ស័យម្នាក់ទៀតឈ្មោះយ៉ាវ យ៉ាន អាយុ២០ឆ្នាំ  នៅចំណុចភ្នំរាប ខេត្តកណ្ដាល និង ករណីទី៤ នៅថ្ងៃទី២១  ខែធ្នូ សមត្ថកិច្ចបានបង្ក្រាបជនសង្ស័យម្នាក់ទៀតឈ្មោះតែម ចេក នៅភូមិថ្មីខ្មែរ ឃុំត្បែងខ្ពស់ ស្រុកសាមគ្គីមានជ័យ ជាមុខសញ្ញាទទួលផលចោរកម្ម។ ជនសង្ស័យទាំង៥នាក់ សុទ្ធតែមានសាធាតុញៀនជាប់ខ្លួន ។

ចំពោះវត្ថុតាងដកហូត បានមានម៉ូតូចំនួន៤គ្រឿង និងសម្ភារ:ជាច្រើនទៀត ដែលក្នុងនោះម៉ូតូ១គ្រឿង ក្នុងចំណោម ៤គ្រឿង ជារបស់លោកស្រីផាត់ ស្រីល័ក្ខ សមាជិកក្រុមប្រឹក្សា ស្រុកសាមគ្គីមានជ័យ៕