ឧត្តមសេនីយ៍ឯក ស ថេត ស្នើឱ្យមន្ត្រីនគរបាល និងអាណាព្យាបាល យកចិត្តទុកដាក់ ផ្សព្វផ្សាយអប់រំ ជូនដល់កូនចៅនិង យុវជន ពីផលប៉ះពាល់ គ្រោះថ្នាក់ នៃគ្រឿងញៀន
ភ្នំពេញ ៖លោកស្នងការបញ្ជាក់ថា មិនទុកឲ្យមន្ត្រីណាម្នាក់នៅឯការឡើយ ជាថ្នាក់ដឹកនាំម្នាក់ ដែលតែងតែបារម្ភ គិតគូរ និងយកចិត្តទុកដាក់ ដល់សុខទុក្ខរបស់មន្ត្រីក្រោមឱវាទ។
ថ្លែងក្នុងពិធីសំណេះសំណាល សាកសួរសុខដល់មន្ត្រីនគរបាល ដែលបានបំពេញបែបបទចូលនិវត្តន៍ អញ្ជើញមកពីតាមបណ្តាប៉ុស្តិ៍នគរបាលរដ្ឋបាល និងអធិការដ្ឋាននគរបាលខណ្ឌទាំង១៤ ក្នុងរាជធានីភ្នំពេញ នៅរសៀលថ្ងៃទី៣ ខែមករា ឆ្នាំ២០២០នេះ លោក ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានស្នើឱ្យមន្ត្រីនគរបាលមូលដ្ឋាន និងអាណាព្យបាលលត្រូវយកចិត្តទុកដាក់ ផ្សព្វផ្សាយអប់រំជូនដល់កូនចៅ និងយុវជន ពីបញ្ហាផលប៉ះពាល់គ្រោះថ្នាក់នៃគ្រឿងញៀន និងនៅឱ្យឆ្ងាយពីគ្រឿងញៀន ខណៈដែលបញ្ហាគ្រឿងញៀនត្រូវគេមើលឃើញថា យុវជនជាមុខសញ្ញាដែលងាយនឹងរងគ្រោះ និងជាពិសេសគ្រឿងញៀនជាបញ្ហាប្រឈម បង្កឱ្យប៉ះពាល់អសន្តិសុខ និងប៉ះពាល់ធនធានមនុស្ស នាំឱ្យមានការរាំងស្ទះនៃការអភិវឌ្ឍន៍ប្រទេសជាតិ ។
ក្នុងឱកាសនោះដែរ លោកស្នងការបានធ្វើការថ្លែងអំណរគុណ ដល់មន្ត្រីទាំងអស់ ដែលបានលះបង់ទាំងកម្លាំងចិត្តកាយ ដើម្បីការពារសន្តិសុខសុវត្ថិភាព ជូនសង្គមជាតិទាំងមូល លោកតែងតែចំណាយពេលចុះសួរសុខទុក្ខ ជាប្រចាំដល់មន្ត្រីដែលមានជំងឺ និងជួបគ្រោះថ្នាក់ផ្សេងៗ ។
លោកឧត្តមសេនីយ៍ឯក ស ថេត បានមានប្រសាសន៍ទៀតថា ការនាំឱ្យយុវជន ឈានដល់ការប្រើប្រាស់គ្រឿងញៀន ដោយសារយុវជនមួយចំនួនសេពគប់ មិត្តភក្តិមិនល្អបោកបញ្ឆោត និងឱ្យចង់សាកគ្រឿងញៀន ។ មួយវិញទៀត មានការបង្ខំពីបងធំឱ្យប្រើប្រាស់គ្រឿងញៀន ។ ដូច្នេះ បញ្ហានេះមន្ត្រីនគរបាល និងអាណាព្យាបាល ត្រូវតែខិតខំផ្សព្វផ្សាយអប់រំឱ្យកូនចៅ និងយុវជនយល់ដឹងបញ្ហាគ្រឿងញៀន ដើម្បីចូលរួមបង្ការទប់ស្កាត់ ពីផលប៉ះពាល់នៃគ្រឿងញៀន ។
ក្នុងឱកាសនោះផងដែរ លោកអគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក៏បានថ្លែងនូវការដឹងគុណដល់មន្ត្រីនគរបាលដែលចូលនិវត្តន៍ និងបានបំពេញបែបបទត្រូវចូលនិវត្តន៍នៅពេលខាងមុខនេះ កន្លងមកបានបំពេញភារកិច្ចយ៉ាងល្អចូលរួមក្នុងកិច្ចការងារថែរក្សាសន្តិសុខ សុវត្ថិភាពសង្គម និងបម្រើសេវារដ្ឋបាល ជូនប្រជាពលរដ្ឋ ទោះបីបងប្អូនចូលនិវត្តន៍ក៏ពិតមែន រាជរដ្ឋាភិបាលកម្ពុជា នៅតែបន្តជួយជ្រោមជ្រែង និងគិតគូរពីសុខទុក្ខ របស់បងប្អូនជានិច្ច ដោយមិនបោះបង់ចោលឡើយ ។
សូមបញ្ជាក់ថា ក្នុងពិធីសំណសំណាលនោះផងដែរ មន្ត្រីនគរបាលដែលបានបំពេញបែបបទចូលនិវត្តន៍មានចំនួន១៤៩នាក់ បានការឧបត្ថម្ភនូវអំណោយមួយចំនួន និងពិសារអាហារសាមគ្គីនៅក្នុងឱកាសចូលឆ្នាំថ្មីផងដែរ ៕
