រថយន្តហាយប្រិតពាក់ស្លាកលេខភ្នំពេញ 2BB 0035 បុកនឹងកិនមនុស្សពីរនាក់ស្លាប់នៅផ្លូវ៦០ម៉ែត្រហើយបើកគេចបាត់

ភ្នំពេញៈ បុរសម្នាក់នឹងក្មេងស្រីម្នាក់បានស្លាប់បាត់បង់ជីវិតយ៉ាងអាណោចអាធម៌ ខណៈកំពុងជិះម៉ូតូឌុបគ្នាហើយត្រូវរថយន្តហាយប្រិតមួយគ្រឿងបុកនឹងកិនអូសជាច្រើនម៉ែត្រ នៅចំណុចមុខការដ្ឋានចិន តាមបណ្តោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដោយករណីនេះកើតឡើងកាល ពីវេលាម៉ោង១០ព្រឹកថ្ងៃទី១០ ខែមករា ឆ្នាំ២០២០ ។

តាមប្រភពព័ត៌មានពីប្រជាពលរដ្ឋដែលបានឃើញហេតុការណ៍បានអោយដឹងថា មុនកើតហេតុបុរសម្នាក់បានជិះម៉ូតូមួយគ្រឿង ម៉ាក PCX ពណ៌ស ពាក់ស្លាកលេខ ភ្នំពេញ 1IC 4551 ឌុបក្មេងស្រីនឹងដឹកនំប័ុង ធ្វើដំណើរតាមបណ្តោយផ្លូវ៦០ម៉ែត្រ ក្នុងល្បឿនលឿនទិសដៅពីជើងទៅត្បូងដោយព្យាយាមវ៉ាគេឯងក៏ចូលទៅចំណែកផ្លូវម្ខាង ស្របពេលនោះមានរថយន្តហាយប្រិត ពណ៌ស ពាក់ស្លាកលេខភ្នំពេញ 2BB-0035 កំពុងបើកបរបញ្ច្រាសទិសគ្នាជាមួយម៉ូតូ ក៏ជ្រុលបុកម៉ូតូពេញទំហឹងបណ្តាលអោយម៉ូតូខ្ទាតទៅម្ខាងចំណែកអ្នកជិះម៉ូតូចំនួន២នាក់ត្រូវកិននឹងអូសជាច្រើនម៉ែត្របណ្តាលអោយស្លាប់ភ្លាមៗ ។ប្រភពដដែរបន្តថាបន្ទាប់ពីបុកហើយរថយន្តបង្កបានបើកគេចពីកន្លែងកើតហេតុ បាត់ស្រមោល ។

ក្រោយកើតហេតុសមត្ថកិច្ចមូលដ្ឋាននឹងមន្ត្រីជំនាញ ចរាចរខណ្ឌមានជ័យបានចុះមកដល់ទីតាំង ហើយធ្វើការវាស់វែងយកម៉ូតូប្រគល់អោយទៅកម្លាំងនគរបាលជំនាញចរាចរនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំស្រាវជ្រាវតាមចាប់អ្នកបើកបររថយន្តបង្កយកមកដោះស្រាយគ្នានៅពេលក្រោយ ចំណែកសាកសពត្រូវបានដឹកយកទៅតម្កលនៅវត្តទឹកថ្លា រង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕