លោក ផៃ ស៉ីផាន ៖ ការអំពាវនាវរបស់ស្ថានទូតអាមេរិក ឲ្យពលរដ្ឋខ្លួនប្រុងប្រយ័ត្នក្នុងថ្ងៃបោះឆ្នោត គឺជាវិធានការធម្មតារបស់អាមេរិក

ភ្នំពេញ៖ លោក ផៃ ស៉ីផាន អ្នកនាំពាក្យទីស្តីការគណៈរដ្ឋមន្រ្តីនិងជារដ្ឋលេខាធិការ ទីស្តីការគណៈរដ្ឋមន្រ្តី នៅរសៀលថ្ងៃទី២៥ ខែកក្កដា ឆ្នាំ២០១៨នេះ បានថ្លែងថា ការអំពាវនាវរបស់ស្ថានទូតអាមេរិកឲ្យពលរដ្ឋខ្លួន មានការប្រុងប្រយ័ត្នក្នុងថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៦ គឺជាវិធានការធម្មតារបស់រដ្ឋាភិបាលអាមេរិក ដោយសារសង្គមអាមេរិក តែងតែប្រឈមនឹងហិង្សាសម្លាប់មនុស្សរាល់រូបភាពជាប្រចាំ ដែលធ្វើឲ្យរដ្ឋាភិបាលនេះមានការប្រុងប្រយ័ត្នកម្រិតខ្ពស់ ក្នុងកិច្ចការពារប្រជាពលរដ្ឋរបស់គេ ពីភាពឃោរឃៅទាំងនោះ។

បើតាមផេកហ្វេសប៊ុកផ្លូវការ លោក ផៃ ស៉ីផាន បានបញ្ជាក់ ថា «គោរពជម្រាបជូនបណ្តាញអ្នកសារព័ត៌មាន និងប្រិយមិត្តFBFs សូមជម្រាបជូនថា ការលើកឡើងរបស់ស្ថានទូតអាមេរិកប្រចាំព្រះរាជាណាចក្រកម្ពុជា ដែលធ្វើការណែនាំព្រមានដល់ប្រជាពលដ្ឋអាមេរិកាំង ដែលស្ថិតនៅក្នុងព្រះរាជាណាចក្រកម្ពុជា អោយធ្វើការប្រុងប្រយ័ត្នក្នុងស្ថានភាពខ្ពស់ និងជៀសវាងវត្តមាននៅក្បែរ ទីប្រជុំដែលមានវ៉ូងមនុស្សច្រើន ក្នុងកិច្ចថែរក្សាសុវត្ថិភាព របស់ប្រជាពលរដ្ឋអាមេរិកាំងនោះគឺជាវិធានធម្មតានៃរដ្ឋាភិបាលសហរដ្ឋអាមេរិក។
គឺអាស្រ័យដោយសង្គមអាមេរិកាំងតែងតែប្រឈម និងភាពហឹង្សា សម្លាប់មនុស្ស រាល់រូបភាពជាប្រចាំដែលធ្វើអោយរដ្ឋាភិបាលអាមេរិកាំងមានការប្រុងប្រយ័ត្នកម្រិតខ្ពស់ ក្នុងកិច្ចការពារប្រជាពលរដ្ឋរបស់គេពីភាពឃោរឃៅទាំងនោះ។ ការប្រកាសព័ត៌មាននៃការណែនាំអោយប្រុងប្រយ័ត្នខ្ពស់របស់សហរដ្ឋអាមេរិកគ្រាន់តែកិច្ចការពារជាមុនប៉ុណ្ណោះ ពុំមែនឆ្លើយតបនឹងភាពជាក់ស្តែងនោះឡើយ។ ឧទាហរណ៍ជាក់ស្តែង ការប្រកាសព័ត៌មានបែបនេះ ដ៏ប្រជាពលរដ្ឋអាមេរិកកាំង ក្នុងពិធីប្រកួតកីឡាអន្តរជាតិអូឡាំពិក នូវប្រទេសរុស្ស៉ីជាដើម ។
ខ្ញុំយល់ឃើញថា ការប្រកាសព័ត៌មានរបស់ស្ថានទូតអាមេរិកប្រចាំកម្ពុជា ពុំមានឥទ្ធិពល ឬឧបសគ្គណាមួយប្រឆាំង ឬបំផ្លាញដំណើរការបោះឆ្នោតសកល របស់កម្ពុជាដែលធ្វើឡើង មួយថ្ងៃគត់ គឺថ្ងៃទី២៩ ខែកក្កដា ឆ្នាំ២០១៨ ខាងមុខយ៉ាងខ្លី ហើយការបោះឆ្នោតសកលនេះ ជាការសម្រេចចិត្តខ្ពស់របស់ប្រជាពលរដ្ឋខ្មែរ ក្នុងកិច្ចថែរក្សា ដំណើរការលទ្ធិប្រជាធិបតេយ្យសេរីពហុបក្ស និងការទទួលខុសត្រូវជោគវាសនាដោយខ្លួនឯងដែលគ្មាន បរទេសណាជ្រៀតជ្រែក បានឡើយ។
ស្ថានភាពដំណើរការណ៍ នៃកិច្ចយុទ្ធនាការណ៍ ស្វែងរសន្លឹកឆ្នោត របស់គណបក្សទាំ២០ បានប្រព្រឹត្តទៅដោយរលូន ដែលគ្មានឧបទ្ទវហេតុ ទម្ងន់ណាមួយគួរអោយចាប់អារម្មណ៍ឡើយ ៕