អភិបាលរាជធានីភ្នំពេញ ចុះសួរសុខទុក្ខប្រជាពលរដ្ឋ នៅសហគមន៍អន្លង់គង សង្កាត់ព្រៃស ដើម្បីចង់ដឹងពីតម្រូវការរបស់ពួកគាត់

  ក្នុងការចុះត្រួតពិនិត្យនោះលោកអភិបាលរាជធានីបានសន្យាថា នឹងស្ថាបនាផ្លូវបេតុងចំនួន៣ខ្សែរួមនិងការដាក់លូជូនប្រជាពលរដ្ឋ ខណៈដែលផ្លូវ៣ខ្សែនេះកំពុងឈូសឆាយនៅឡើយ។

   លោក ឃួង ស្រេង បានបញ្ជាក់ថា ក្នុងនាមជាអាជ្ញាធរដែនដី មានភារកិច្ចមួយដែរ នោះគឺចលនាប្រជាពលរដ្ឋអោយទៅបោះឆ្នោតនៅថ្ងៃទៅ២៩ កក្កដា ខាងមុខនេះ ហើយបើក្រោយបោះឆ្នោត ប្រជាពលរដ្ឋក្នុងសហគមន៍នេះមានប្រឡាក់ថ្នាំជ្រលក់ដៃ ដែលបញ្ជាក់ពីការទៅចូលរួមបោះឆ្នោតហើយនោះ រដ្ឋបាលរាជធានីនឹងស្ថាបនាផ្លូវបេតុងជូនតែម្តង។

   ក្រោយបញ្ចប់ការចុះសួរសុខទុក្ខប្រជាពលរដ្ឋនៅសហគមនអន្លង់គងហើយនោះ លោក ឃួង ស្រេង ក៏នឹងអញ្ជើញបន្តទៅសួរសុខទុក្ខប្រជាពលរដ្ឋ ដែលទទួលរងការលិចលង់ដោយទឹកជំនន់នៅសង្កាត់សាក់សំពៅ ខណ្ឌដង្កោបន្តទៀតផងដែរ៕