ទើបចេញពីពន្ធនាគារ សោះមិនរាងចាល មកប្រព្រឹត្តបទល្មើសទៀត ប្រើអាវុធចាក់ជនរងគ្រោះយកទ្រព្យសម្បត្តិ
ភ្នំពេញ៖ស្នងការដ្ឋាននគបាលខេត្តបាត់ដំបង បានឲ្យដឹងថា ទើបចេញពីពន្ធនាគារ សោះមិនរាងចាលមកធ្វើសកម្មភាព (លួចមានស្ថានទម្ងន់ទោស) ដោយប្រើអាវុធចាក់ជនរងគ្រោះយកទ្រព្យសម្បត្តិនៅក្រុងបាត់ដំបង ហើយកសាងសំណុំរឿងបញ្ជូនទៅសាលាដំបូងខេត្តបាត់ដំបង។
នៅរសៀលថ្ងៃ អាទិត្យ ទី២៣ ខែ កុម្ភៈ ឆ្នាំ២០២០នេះ អនុវត្តតាមបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគបាលខេត្តបាត់ដំបង លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ ដឹកនាំធ្វើការស្រាវជ្រាវរហូតឈានដល់ការឃាត់ខ្លួនជនសង័្សយចំនួន០១នាក់ ក្រោយពេលដែលជនសង័្សយរូបនេះធ្វើសកម្មភាពចាក់ទៅលើជនរងគ្រោះឈ្មោះ យ៉ាន់ គឹមយៀត ភេទស្រី អាយុ៥៦ឆ្នាំមានទីលំនៅក្រុមទី១៤ភូមិអូរតាគាំ១សង្កាត់ទួលតាឯក ក្រុងបាត់ដំបង ខេត្តបាត់ដំបងដើម្បី (ប្លន់យកទ្រព្យសម្បត្តិ) របស់ជនរងគ្រោះស្ថិតក្នុងលំនៅដ្ឋានខាងលើ ។
លោកឧត្តមសេនីយ៍ត្រី ជេត វណ្ណនី បានបញ្ជាក់មុននេះថា កាលពីព្រឹកថ្ងៃទី ២៣ ខែ កុម្ភៈ ឆ្នាំ២០២០វេលាម៉ោង៦និង០០នាទី ជនសង័្សយរូបនេះបានចូលធ្វើសកម្មភាព ក្នុងលំនៅដ្ឋានរបស់ជនរងគ្រោះខាងលើ ដោយមានកាំបិតជាមធ្យោបាយក្នុងការប្រព្រឹត្តិ តែក្នុងខណ:ចូលទៅដល់បានពើបប្រទះជាមួយជនរងគ្រោះជាម្ចាស់ផ្ទះ ហើយជនសង័្សយបានធ្វើសកម្មភាពចាក់ដោយកាំបិតទៅលើជនរងគ្រោះ បណ្តាលឲ្យរងរបួសជាទម្ងន់មុនពេលដែលជនសង័្សយប្រមូលយកទ្រព្យសម្បត្តិរបស់ជនរងគ្រោះ ហើយគេចខ្លួនបាត់ពីកន្លែងកើតហេតុ។
ក្រោយកើតហេតុភ្លាមៗសមត្ថកិច្ចនគរបាល ធ្វើការស្រាវជ្រាវជាបន្ទាន់រហូតឈានទៅកំណត់បាននូវមុខសញ្ញាសង័្សយរួចបាន ធ្វើការឃាត់ខ្លួននាវេលាម៉ោង១៥និង២៥នាទីថ្ងៃខែឆ្នាំដដែល។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបង បានបញ្ជាក់ប្រាប់មុននេះថា ជនសង័្សយឈ្មោះ រឿន វិត ភេទប្រុស អាយុ២៧ឆ្នាំរស់នៅមិនប្រាកដ តែជាមុខសញ្ញាដែលទើបចេញពីពន្ធនាគារក្នុងមួយរយៈពេលខ្លីនេះ ។ លោកអធិការបានបញ្ជាក់បន្ថែមទៀតថា ជនរងគ្រោះត្រូវបានអ្នកជិតខាង និងក្រុមគ្រួសារដឹកយកទៅសង្រ្គោះនៅមន្ទីរពេទ្យជាបន្ទាន់ ដោយសាររងរបួសធ្ងន់ រហូតមកដល់ពេលព្រលប់នេះ មិនទាន់អាចនិយាយបាននៅឡើយទេលោកថាក្នុងកិច្ចប្រតិបត្តិការនេះ នគរបាលដកហូតបានសម្ភារៈជាភស្តុតាងមួយចំនួនរួមមាន៖ កង់ពណ៌ទឹកប្រាកចំនួន០១គ្រឿង (ជាមធ្យោបាយជិះធ្វើសកម្មភាព)
កូនកាំបិតចិតបន្លៃចំនួន០២ (សម្ភារធ្វើសកម្មភាព) មួកកន្តឹបពណ៌ក្រហមចំនួន០១ កាបូបពណ៌ទឹកប្រាក់ចំនួន០២ (ជារបស់ជនរងគ្រោះ)ខោខូវប៊យជើងខ្លីចំនួន០១ អាវរងារពណ៌ឈាមជ្រូកចំនួន០១។
លោកអធិការបញ្ជាក់ប្រាប់ថា តាមចម្លើយសារភាពរបស់ជនសង័្សយខាងលើបានសារភាពថា ខ្លួនពិតជាបានធ្វើសកម្មភាព (ចាក់ដោយកាំបិត) ទៅលើជនរងគ្រោះខាងលើដើម្បីយកទ្រព្យសម្បត្តិពិតប្រាដកមែន ។ ដោយសារជនរងគ្រោះមិនទាន់អាចបំភ្លឺបានដូច្នេះសម្ភារៈបាត់បង់ពិតប្រាកដ សមត្ថកិច្ចនគរបាលមិនទាន់ដឹងច្បាស់នៅឡើយទេ។
ជនសង័្សយកំពុងធ្វើការស្រាវជ្រាវ និងបន្តកសាងសំណុំរឿងបញ្ជូន ទៅសាលាដំបូងខេត្តបាត់ដំបង ដើម្បីចាត់ការតាមផ្លូច្បាប់៕
