លោក ហេង រតនា ៖ ទណ្ឌិត សម រង្ស៊ី លើកឡើងថា អ្នកទៅបោះឆ្នោត សុទ្ធតែជាជនគ្មានសតិគ្រប់គ្រាន់ គឺជាការប្រមាថដ៏ធ្ងន់ធ្ងរបំផុត ចំពោះព្រះមហាក្សត្រ និងប្រជាជនកម្ពុជា
ភ្នំពេញ៖ ពាក់ព័ន្ធនឹងការលើកឡើងរបស់ទណ្ឌិត សម រង្ស៊ី ដែលសរសេរក្នុងផេកហ្វេសប៊ុករបស់ខ្លួនថា អ្នកទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ គឺសុទ្ធតែជាជនដែលគ្មានសតិគ្រប់គ្រាន់ នោះ ត្រូវបានលោក ហេង រតនា បានចេញប្រតិកម្មយ៉ាងខ្លាំង ហើយចាត់ទុកថាជាការប្រមាថដ៏ធ្ងន់ធ្ងរបំផុត ចំពោះព្រះមហាក្សត្រ ព្រះសង្ឃ និងប្រជាជនកម្ពុជា។
នៅរសៀលថ្ងៃទី២៦ ខែកក្កដានេះតាមរយៈបណ្តាញទំនាក់ទំនងសង្គមហ្វេសប៊ុកផ្លូវការ លោក ហេង រតនា អគ្គនាយកមជ្ឈមណ្ឌលជាតិកម្ចាត់មីនកម្ពុជា (ស៊ីម៉ាក់) បានបញ្ជាក់ថា “អ្នកទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ គឺសុទ្ធតែជាជនដែលគ្មានសតិគ្រប់គ្រាន់”។ នេះជាការប្រមាថដល់ព្រះមហាក្សត្រ ដែលព្រះអង្គបានផ្តល់ព្រះឱវាទ ដល់ប្រជានុរាស្ត្រព្រះអង្គ ទៅបោះឆ្នោតជ្រើសរើស មេដឹកនាំដែលខ្លួនស្រឡាញ់ពេញចិត្ត។ ជាការប្រមាថដល់ព្រះថេរាអនុថេរ:គ្រប់អង្គ ដែលព្រះអង្គត្រូវនិមន្តទៅបោះឆ្នោត។ ជាការប្រមាថដល់ប្រជាពលរដ្ឋ រួមមាន ចាស់ព្រឹទ្ធាចារ្យ លោកតាលោកយាយ អ៊ំ ពូមីង លោកគ្រូអ្នកគ្រូ ទេព្យ និស្សិត សិស្ស កម្មករកម្មការិនី កងកម្លាំងប្រដាប់អាវុធ និងយុវជនរាប់លាននាក់ ដែលត្រូវបំពេញកាតព្វកិច្ចជាពលរដ្ឋល្អ។ តើមនុស្សមានគំនិត និងគតិនិយាយបែបនេះ សក្តិសមធ្វើជាដឹកនាំប្រជារាស្ត្រខែ្មរដែរឬទេ?
គ្មានសតិគ្រប់គ្រាន់ គឺជាមនុស្សឆ្កួតមែនទេ។ រង់ចាំទទួលលទ្ធផល ជាមួយហ្វូងមហាជន រួមមាន ព្រះថេរាអនុថេរ: ប្រជាពលរដ្ឋខែ្មរគ្រប់ស្រទាប់ នឹងត្រូវទៅបោះឆ្នោត នៅថ្ងៃទី២៩ ខែកក្កដា ២០១៨។ ជនគ្មានសតិគ្រប់គ្រាន់ មិនអាចបោះឆ្នោតបានទេ។
ការប្រមាថកូនខ្មែរបែបនេះ នឹងនាំមកនូវការឈឺចាប់ ចំពោះបុគ្គលនិងក្រុមរបស់ខ្លួនមិនខានឡើយ”។
បើតាមផេកហ្វេសប៊ុកដែលមានឈ្មោះថា Sam Rainsy ដែលមានដាក់រូបថតលោកសម រង្ស៊ី និងលោកកឹម សុខា កាលពីថ្ងៃទី១៩ខែកក្កដា ឆ្នាំ២០១៨ បានសរសេរថា “ក្នុងនាមខ្ញុជាប្រធានចលានសង្គ្រោះជាតិ ខ្ញុំសូមអំពាវនាវដល់ប្រជារាស្រ្តខ្មែរទាំងអស់ សូមរក្សាម្រាមដៃឲ្យស្អាត នៅក្នុងថ្ងៃបោះឆ្នោត ទី២៩ ខែកក្កដា ឆ្នាំ២០១៨នេះ។ ជនទាំងឡាយណា ដែលទៅចូលរួមក្នុងការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ គឺសុទ្ធតែជាជនដែលគ្មានសតិគ្រប់គ្រាន់ គឺមានន័យថាលទ្ធផលក្នុងការបោះឆ្នោត ក្នុងអាណត្តិនេះ មិនអាចយកជាផ្លូវការបានឡើយ”៕
