ក្រសួងសុខាភិបាល បានប្រកាសរកឃើញករណីឆ្លងវីរុសកូរីដ-១៩ លើស្រ្តីជនជាតិអង់គ្លេសចំនួន១រូបទៀត
ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានអះអាងថា វិទ្យាស្ថានប៉ាស្ទ័រកម្ពុជា បានពិនិត្យរកឃើញស្រ្តីជនជាតិអង់គ្លេសម្នាក់ អាយុ៦៥ឆ្នាំ មានផ្ទុកជំងឺកូវីដ១៩នៅខេត្តកំពង់ចាម។
រដ្ឋមន្រ្តីក្រសួងសុខាភិបាលលោក ម៉ម ប៊ុនហេង បានបញ្ជាក់បែបនេះក្នុងសន្និសីទសារព័ត៌មាន បន្ទាន់មួយស្តីពីជំងឺកូវីដ១៩នៅល្ងាចថ្ងៃទី១០ ខែមីនា ឆ្នាំ២០២០នេះ។
លោក ម៉ម ប៊ុនហេង ថ្លែងថាស្រ្តីរូបនោះត្រូវបានដាក់ដោយឡែក នៅក្នុងមន្ទីរពេទ្យបង្អែកខេត្តកំពង់ចាម។
គិតមកត្រឹមល្ងាចថ្ងៃនេះ កម្ពុជារកឃើញអ្នកឆ្លងកូវីដ-១៩ ចំនួន៣ករណីហើយ ដែលក្នុងនោះបុរសជនជាតិចិនម្នាក់ត្រូវបានរកឃើញនៅថ្ងៃទី២៧ ខែមករា នៅខេត្តព្រះសីហនុ និងមួយករណីទៀតត្រូវបានរកឃើញលើបុរសខ្មែរវ័យ៣៨ឆ្នាំម្នាក់ នៅខេត្តសៀមរាប កាលពីថ្ងៃទី៧ ខែមីនា កន្លងទៅ និងករណីចុងក្រោយនេះ រកឃើញស្រ្តីជនជាតិអង់គ្លេសម្នាក់ មានផ្ទុកជំងឺកូវីដ១៩នៅខេត្តកំពង់ចាមថ្ងៃទី១០ ខែមីនានេះ។
នាយកដ្ឋានប្រយុទ្ធនឹងជំងឺឆ្លង CDC នៅថ្ងៃអង្គារនេះ បានប្រកាសព័ត៌មានថា បច្ចុប្បន្នភាព ម៉ោង ៨និង៣០នាទីយប់ ថ្ងៃទី១០ មីនា ២០២០ : ប្រទេសយើងបានរកឃើញករណីជំងឺCOVID-19 សរុបចំនួន៣ករណី- ១ករណី ជនជាតិចិន ភេទប្រុស អាយុ៦០ឆ្នាំ ជាសះស្បើយ។- ១ករណី ជនជាតិខ្មែរ ភេទប្រុស អាយុ៣៨ឆ្នាំ កំពុងដាក់ព្យាបាលនៅមន្ទីរពេទ្យបង្អែកខេត្តសៀមរាប គាត់មានសុខភាពល្អ មិនមានរោគសញ្ញាអ្វីទេ តែគាត់បន្តវិជ្ជមាន COVID-19 និង- ១ករណី ជនជាតិអង់គ្លេស ភេទស្រី អាយុ៦៥ឆ្នាំ កំពុងដាក់ព្យាបាលនៅមន្ទីរពេទ្យបង្អែកខេត្តកំពុងចាម គាត់មានសុខភាពល្អ មិនមានរោគសញ្ញាអ្វីគួរឲ្យកត់សម្គាល់ទេ ។ អ្នកប៉ះពាល់ទាំងអស់នឹងយកវត្ថុវិភាគ ដាក់ឲ្យនៅដោយឡែក និងតាមដានសុខភាពចំនួន១៤ថ្ងៃ ។ នេះជាករណីនាំចូលពីប្រទេសពីប្រទេសក្រៅ ។
ប្រទេសកម្ពុជាយើងមិនទាន់រកឃើញភស្តុតាងបញ្ជាក់ថា មានការឆ្លងនៅក្នុងសហគមន៍នៅឡើយទេ ។
ទូទាំងប្រទេសយើងបានធ្វើតេស្តសសរុបទាំងអស់ចំនួន ៤៨២ករណី។
ព័ត៌មានបន្ថែមសូមទាក់ទងលេខ ១១៥៕
