បាត់កូនស្រីជាពីរថ្ងៃ ស្រាប់តែឃើញសពក្នុងអណ្តូងទឹកនៅក្បែរផ្ទះ ឯប្តីរត់បាត់
កំពង់ស្ពឺ ៖ បន្ទាប់ពីបាត់កូនស្រីនិងប្តីរបស់នាង ជាច្រើនថ្ងៃកន្លងមក ទើបបានស្រ្តីជាម្តាយបានប្រទះឃើញសពកូនស្រី នៅអណ្តូងទឹកមួយក្នុងភូមិ នៅថ្ងៃទី៣០ ខែមេសា ឆ្នាំ២០១៨ វេលាម៉ោង១២និង២៥នាទី នៅភូមិអូរគគី ឃុំតាំងក្រូច ស្រុកសំរោងទង ខេត្តកំពង់ស្ពឺ។
ស្ត្រីឈ្មោះ ម៉ន ឡង ភេទស្រី អាយុ៥៦ឆ្នាំ ត្រូវជាម្តាយនៃសព រស់នៅភូមិអូគគី ឃុំតាំងក្រូច ស្រុកសំរោងទង ខេត្តកំពង់ស្ពឺ បាននិយាយថា កូនគាត់បានយកខោអាវទៅបោកគក់ នៅអណ្តូងក្រោយផ្ទះហើយ បានបាត់រហូតរយៈពេល២ថ្ងៃ ស្រាប់តែថ្ងៃនេះ មានការភ្ញាក់ផ្អើលប្រទះឃើញសពកូនស្រីនៅក្នុងអណ្តូងទឹក ទើបរាយការណ៍ ទៅសមត្ថកិច្ចតែម្តង ។ ហើយក៏បាត់មិនឃើញបុរសជាប្តី ស្រី្តរងគ្រោះ នៅផ្ទះនោះទេ។ ចំណែកនៅមាត់អណ្តូងនោះ មានស្នាមឈាម ក៏ត្រូវអ្នកភូមិ និងសមត្ថកិច្ចដាក់ការសង្ស័យជាបឋម លើបុរសជាប្តី ថាជាឃាតករសម្លាប់ប្រពន្ធរួចទម្លាក់ចូលក្នុងអណ្តូងទឹក។
លោក វិន ឡេងហួង មេបញ្ជាការមូលដ្ឋានស្រុកសំរោងទង បានឲ្យដឹងថា ក្រោយពីធ្វើការសាកសួរមានឈ្មោះ ម៉ន ឡុង ភេទស្រី អាយុ៥៦ឆ្នាំ រួចមក គាត់និយាយថា គាត់បាត់កូនស្រីឈ្មោះ ផៃ សុខគៀង ភេទស្រី អាយុ២០ឆ្នាំ មានប្តីឈ្មោះ ម៉ាប់ វុទ្ធី ហៅម៉ាប់ អាយុ២៤ឆ្នាំ មានស្រុកកំណើតខេត្តពោធិ៍សាត់ ដោយបាត់ខ្លួនទាំង២នាក់ប្តីប្រពន្ធ តាំងពីយប់ថ្ងៃទី២៨ ខែមេសា ឆ្នាំ២០១៨ ទើបតែឃើញសពកូនស្រី ក្នុងអណ្តូងនៅថ្ងៃនេះ ។
សមត្ថកិច្ចនៅមិនទាន់អាចសន្និដ្ឋានបានទេ ចំពោះករណីនេះ តែប្រភពអ្នកជុំវិញបានលើកឡើងថា អាចករណីមនុស្សឃាត។ ឯព្រះរាជអាជ្ញាបានដឹកនាំកម្លាំងសមត្ថកិច្ចធ្វើការស្រាវជ្រាវ ស៊ើបអង្កេតតាមលក្ខណៈបច្ចេកទេស៕
