យប់ថ្ងៃទី២៩កក្ដដានគរបាលរាជធានីភ្នំពេញ ចុះល្បាតទាំងយប់ដើម្បីត្រួតពិនិត្យការិយាល័យ បោះឆ្នោតរក្សាសុវត្ថិភាព និងសណ្តាប់ធ្នាប់ក្នុងការបោះឆ្នោត

ដោយឡែកនៅខណ្ឌមានជ័យ អធិការនគរបាលមានជ័យ លោក តេង​ លីណូ ក៏បានបញ្ជាក់ផងដែរថា នៅយប់នេះ លោកបានដឹកនាំកម្លាំងនគរបាល សហការជាមួយកម្លាំងបញ្ជាការឯកភាពខណ្ឌមានជ័យ ក៏បានចុះល្បាតនៅតាមមូលដ្ឋាន និងតាមការិយាល័យបោះឆ្នោតទាំងអស់ ដើម្បីពិនិត្យមើលអំពីបញ្ហាសុវត្ថិភាព បញ្ហាសណ្តាប់ធ្នាប់ នៅតាមការិយាល័យបោះឆ្នោត ហើយជាលទ្ធផល មានភាពល្អប្រសើរ មិនមានបញ្ហាអ្វីនោះទេ។

គួរបញ្ជាក់ថា អាជ្ញាធររាជធានីភ្នំពេញ និងស្នងការដ្ឋាននគរបាលរាជធានីភ្នំពេញ បានរៀបចំផែនការការពារសន្តិសុខ សណ្តាប់ធ្នាប់សាធារណៈ សម្រាប់ដំណើរការបោះឆ្នោត ជ្រើសតាំងតំណាងរាស្រ្ត នីតិកាលទី៦ នៅរាជធានីភ្នំពេញ ដោយបានដាក់កងកម្លាំងនគរបាលជាតិចំនួនជិត៥ពាន់នាក់ នៅតាមគោលដៅចំនួនដូចជា ការិយាល័យបោះឆ្នោត ជុំវិញបរិវេណការិយាល័យ ជាពិសេស មុន ក្នុង និងក្រោយពេលបោះឆ្នោត រហូតដល់ចប់ការបោះឆ្នោតជាស្ថាពរ។

អគ្គលេខាធិការគណៈកម្មាធិការជាតិរៀបចំការបោះឆ្នោត ហៅកាត់ថាគ.ជ.ប លោក ទេព នីថា និងនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ និងជាអ្នកនាំពាក្យអគ្គស្នងការ បានអះអាងដូចគ្នាថា ករណីកម្លាំងសមត្ថកិច្ចជាច្រើនប្រមាណ៨ម៉ឺននាក់ ដើម្បីការពារសន្ដិសុខ សណ្ដាប់ធ្នាប់ ដំណើរការបោះឆ្នោតតំណាងរាស្ដ្រនីតិកាលទី៦ មិនមែនជាការគំរាមកំហែងនោះទេ ពោលគឺដោយសារតែកំណើនការិយាល័យបោះឆ្នោត៕