នាយឧត្តមសេនីយ៍ ហ៊ឹម យ៉ាន ស្នើឲ្យស្នងការរង នាយការិយាល័យចរាចរណ៍ផ្លូវគោកទូទាំងប្រទេស បញ្ឈប់ជាបន្ទាន់ ការបង់ប្រាក់ពិន័យ នៅគោលដៅតាមដងផ្លូវ
ភ្នំពេញ៖នៅថ្ងៃទី៥ នៃថ្ងៃអនុវត្តច្បាប់ចរាចរណ៍ថ្មី នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានចេញសារសំឡេងដ៏សំខាន់មួយ ដោយស្នើឲ្យលោកស្នងការរង និងលោកនាយការិយាល័យចរាចរណ៍ផ្លូវគោកទូទាំងប្រទេស បញ្ឈប់ជាបន្ទាន់នូវការបង់ប្រាក់ពិន័យនៅគោលដៅតាមដងផ្លូវ ។
លោក នាយឧត្តមសេនីយ៍ ហ៊ឹម យ៉ាន សង្កត់ធ្ងន់ថា ពេលនេះ នៅមានការពិន័យនៅនឹងគោលដៅ ។ ដូច្នេះ ប្រសិនបើអស់លោកមិនអនុវត្តតាមការណែនាំនេះទេ គឺ ត្រូវទទួលខុសត្រូវចំពោះមុខថ្នាក់ដឹកនាំ ។
គួររំលឹកថា ដើម្បីធានាប្រសិទ្ធិភាព និងនិរន្តភាពក្នុងការរឹតបន្តឹងការអនុវត្តច្បាប់នេះ អគ្គស្នងការនគរបាលជាតិ ក៏បានត្រៀមលក្ខណៈមួយចំនួនផងដែរ ក្នុងនោះបានត្រៀមប្រើប្រាស់កម្លាំងសរុបចំនួន ៣៩១៩នាក់ (កម្លាំងនគរបាលចរាចរណ៍ចំនួន ៣៥០៧នាក់ និងកម្លាំងសហការចំនួន ៤១២នាក់) ដាក់ពង្រាយនៅតាមគោលដៅត្រួតពិនិត្យចំនួន ៥៦៨គោលដៅ និងប្រើប្រាស់មធ្យោបាយរថយន្តនិងម៉ូតូចំនួន ៣៦៤គ្រឿង។ កម្លាំងនគរបាលចរាចរណ៍ផ្លូវគោកទូទាំងប្រទេស នឹងធ្វើការរឹតបន្តឹង
ការអនុវត្តច្បាប់ស្តីពីចរាចរណ៍ផ្លូវគោក ចាប់ពីម៉ោង០០ ថ្ងៃទី១ឧសភា តទៅ ដើម្បីបង្កើនប្រសិទ្ធភាពក្នុងការទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឲ្យបានជាអតិបរមា។
សូមបញ្ជាក់ថា ការអនុវត្តរឹតបន្តឹងច្បាប់ចរាចរណ៍ផ្លូវគោកនេះ អ្នកបើកបរល្មើសច្បាប់ ចរាចរណ៍ នឹងរង ពិន័យទឹកប្រាក់ ពី៣ដងដល់ទៅ៥ដងទៅតាមបទល្មើស៕
