សមត្ថកិច្ចឃាត់ខ្លួនជនសង្ស័យម្នាក់ ពីបទ រំលោភសម្លាប់ម្តាយមីងបង្កើត យ៉ាងសាហាវព្រៃផ្សៃ
កោះកុង៖ ស្នងការដ្ឋាននគរបាលខេត្តកោះកុង បានឲ្យដឹងថា នៅយប់ថ្ងៃទី ៧ ខែ ឧសភា ឆ្នាំ ២០២០ វេលាម៉ោង ២និង០៥ នាទីរំលងអធ្រាត្រ ក្រោយពេលទទួលបានព័ត៌មានពីប្រជាពលរដ្ឋតាមទូរស័ព្ទ ថាមានករណី ឃាតកម្មកើតឡើង នៅចំណុចខ្ទមស្រែស្ថិតក្នុងភូមិតានី ឃុំជីខលើ ស្រុកស្រែអំបិល កម្លាំងជំនាញ នៃអធិការដ្ឋាននគរបាលស្រុកស្រែអំបិល បានសហការជាមួយកម្លាំងប៉ុស្តិ៍រដ្ឋបាលឃុំជីខលើ បានចុះទៅធ្វើការស្រាវជ្រាវ និងធ្វើកោសល្យវិច័យសព។
ក្រោយធ្វើការស្រាវជ្រាវ ក៏ឈានដល់ឃាត់ខ្លួន ជនសង្ស័យម្នាក់ឈ្មោះ ម៉ន ម៉ុន ភេទប្រុស អាយុ ២៦ឆ្នាំ ជនជាតិខ្មែរ មុខរបរធើ្វស្រែចម្ការ (មុខសញ្ញាទើបចេញពីពន្ធនាគារ) មានទីលំនៅបច្ចុប្បន្នភូមិ-ឃុំកើតហេតុខាងលើ បានឆ្លើយសារភាពថា កាលពីនៅវេលា ១៨និង០០ នាទីនាទីយប់ នាថ្ងៃទី ៦ ខែឧសភា ឆ្នាំ២០២០ រូបគេបានធ្វើសកម្មភាពចាប់រំលោភសេពសន្ថវៈបានសម្រេច លើជនរងគ្រោះឈ្មោះ អ៊ី ហ៊ួយ ភេទស្រី អាយុ៥៧ ឆ្នាំ ដែលត្រូវជាម្តាយមីងបង្កើត រួចវាយសម្លាប់ ហើយអូសសាកសព យកមកលាក់ទុក ក្នុងប្រឡាយអូរ ដែលរីងស្ងួត ដែលមានចម្ងាយពីផ្លូវប្រមាណ ១៣០ ម៉ែត្រ។
បច្ចុប្បន្ន សពជនរងគ្រោះ បានប្រគល់ជូនសាច់ញាតិ រៀបចំធ្វើបុណ្យតាមប្រពៃណី រីឯជនសង្ស័យត្រូវបានឃាត់ខ្លួននៅ អធិការដ្ឋាននគរបាលបាលស្រុកស្រែអំបិល ដើម្បីបំពេញសំណុំរឿង ចាត់ការតាមនីតិវិធីច្បាប់៕
