អភិបាលខេត្តសៀមរាប ចុះពិនិត្យការដ្ឋានសាងសង់ផ្លូវ និងសកម្មភាពស្ម័គ្រចិត្ត រុះរើរបងខ្លោងទ្វារ របស់ប្រជាជនតាមដងផ្លូវ

សៀមរាប៖ ផ្លូវមួយខែ្សប្រវែង ២ ៣៤៥ម៉ែត្រ ឆ្លងកាត់ភូមិចំនួន៣ គឺភូមិកន្ត្រក , គោកក្រសាំង និង ភូមិភ្ញាជ័យ នៅក្នុងសង្កាត់ស្វាយដង្គំ ក្រុង ខេត្តសៀមរាប ត្រូវបានឯកឧត្តម ទៀ សីហា អភិបាលនៃគណៈអភិបាលខេត្ត ដឹកនាំក្រុមការ ងារចុះពិនិត្យមើលការសាងសង់ផ្លូវ និង សកម្មភាពក្នុងការរុះរើខ្លោងទ្វារ របងសង្ក័សី ដោយស្ម័គ្រចិត្តរបស់ម្ចាស់ដីគម្រោងអភិវឌ្ឍន៍ នៅភូមិកន្ត្រក សង្កាត់ស្វាយដង្គំ ក្រុងសៀមរាប កាលពីថ្ងៃទី៧ ខែ ឧសភា ឆ្នាំ២០២០ ។ ក្នុងការ ចុះត្រួតពិនិត្យផ្លូវនេះ រួមដំណើរដោយលោកអភិបាលក្រុង នាយករដ្ឋបាលក្រុង អាជ្ញាធរសង្កាត់ និង ម្ចាស់គម្រោងផងដែរ ។

លោក នួន ពុទ្ធារ៉ា អភិបាលក្រុងសៀមរាប បានឲ្យដឹងថា ផ្លូវមួយខ្សែនេះជាគម្រោងរបស់សាលាក្រុង ដែលបានកំពុងដំណើរការអនុវត្តន៍ ក្នុងការសាងសង់ផ្លូវ ដែលឆ្លងកាត់ភូមិកន្ត្រក គោកក្រសាំង និង ភូមិភ្ញាជ័យ តភ្ជាប់នឹងផ្លូវវាងក្រុង ក្នុងភូមិគ្រួស
ត្រង់ចំណុចជាប់ផ្លូវចូលសាលាសង្កាត់ស្វាយដង្គំ ដែលមានប្រវែង២ពាន់៣៤៥ម៉ែត្រ ។

លោកបានបញ្ជាក់ផងដែរថា ក្នុងប្រវែងផ្លូវ២ ៣៤៥ម៉ែត្រនេះ ក៏មានការបរិច្ចាគរបស់សប្បុរសជន (ម្ចាស់គម្រោងអភិវឌ្ឍន៍) មានប្រវែង
១.៣៧០ម៉ែត្រ ដោយបានធ្វើការចាក់ក្រាកកៅស៊ូ DBST ប្រវែង ៨៣០ម៉ែត្រ ទទឹង ៧ម៉ែត្រ និងក្រាលគ្រួសក្រហម ៥៤០ម៉ែត្រ ទទឹង
១០ម៉ែត្រ និង ដោយមានការពង្រីកផ្លូវទៅតាមទំហំ បានកំណត់របស់គណៈកម្មរដ្ឋបាលក្រុង ។

លោក សូត្រ សុមុន្នី ម្ចាស់ដីគម្រោងអភិវឌ្ឍន៍ គាត់បានយល់ព្រមដោយស្ម័គ្រចិត្តរុះរើរបងស័ង្កសីបណ្ដាយប្រវែង ៦១២ម៉ែត្រ កម្ពស់
២ម៉ែត្រមុនគេ បន្ទាប់ពីអាជ្ញាធរមូលដ្ឋានបានជូនដំណឹង ។ នៅថ្ងៃនេះ លោកក៏បានធ្វើការរុះរើ ខ្លោងទ្វារ
ដើមី្បផ្លូវឲ្យក្រុមការងារធ្វើការស្ថាបនាផ្លូវនេះឡើងផងដែរ ។

សូមបញ្ជាក់ផងដែរថា ផ្លូវប្រវែង ១ពាន់៣៧០ម៉ែត្រនេះ គឺត្រូវបានលោក សូត្រ សុមុន្នី ទិញពីប្រជាពលរដ្ឋ ដើមី្បបើកធ្វើផ្លូវ
ចូលទៅក្នុងតំបន់គម្រោងអភិវឌ្ឍន៍របស់ខ្លួន ហើយពេលនេះដើមី្បបំពេញតម្រូវការចាំបាច់របស់រដ្ឋ លោកបានបរិចាកដីផ្លូវនេះ
ដាក់ជាសម្បត្តិសាធារណៈផងដែរ ។

ឯកឧត្តម ទៀ សីហា ក៏បានសម្តែងនូវអំណរគុណចំពោះលោក សូត្រ សុមុន្នី ដែលបានចូលរួមនៅ
ក្នុងសកម្មភាពអភិវឌ្ឍន៍របស់សាលាក្រុងសៀមរាប ហើយក៏ជាសកម្មភាពគំរូមួយ ដែលរដ្ឋបាលក្រុង និង អាជ្ញាធរគ្រប់លំដាប់ថ្នាក់
សូមសំដែងការកោតសរសើរ នូវកាយវិការដ៏សប្បុរសនេះ ក្នុងការចូលរួមអភិវឌ្ឍន៍ជាមួយរាជរដ្ឋាភិបាល សំខាន់
ក្នុងកិច្ចអភិវឌ្ឍន៍ទីក្រុងប្រវត្តិសាស្ត្រមួយនេះ ឲ្យកាន់តែមានភាពស្រស់ស្រកាលទៀតផង ។

ឯកឧត្តម ដោយមើលឃើញពីផលបះពាល់ ក៏ដូចជាការលំបាកក្នុងការធ្វើដំណើរ ទៅមករបស់បងប្អូនប្រជាពលរដ្ឋ
នៅក្នុងក្រុងសៀមរាបមានផ្លូវជាច្រើនខ្សែ ហើយដែលអាជ្ញាធរខេត្តបានរៀបចំកែលម្អរចនាសម្ព័ន្ធផ្លូវ ឲ្យបានល្អប្រសើរពីមួយឆ្នាំទៅឆ្នាំ
ដោយមានការចូលរួមសហការពីបងប្អូនប្រជាពលរដ្ឋផងដែរ ។

ឯកឧត្តម ក៏បានសំណូមពរផងដែរ ដល់បងប្អូនប្រជាពលរដ្ឋ ប្រើប្រាស់ផ្លូវ និង រស់នៅអមសងខាងផ្លូវទាំងអស់
ត្រូវចូលរួមថែរក្សាក្នុងការប្រើប្រាស់ផ្លូវ ឲ្យបានយូរអង្វែង និង អាជ្ញាធររដ្ឋបាលក្រុង និងបងប្អូនប្រជាពលរដ្ឋ
ក្នុងក្រុងខេត្តសៀមរាបចូលរួមការងារអភិវឌ្ឍន៍នានា នៅក្នុងខេត្តសៀមរាបទាំង មូលផងដែរ៕