ជនល្មើសម្នាក់ ត្រូវបានកម្លាំងសមត្ថកិច្ចឃាត់ខ្លួន ករណីប្លន់ និងសម្លាប់ទៅលើកុមារអាយុ ៧ឆ្នាំ
ពោធិ៍សាត់ ៖ អង្គការ CPU បានឲ្យដឹងថា កាលពីថ្ងៃទី៦ ខែឧសភា វេលាម៉ោង៤ និង៣០នាទីល្ងាច សាកសពរបស់ក្មេងស្រីឈ្មោះ រ៉ង ស្រីពេជ្រ ត្រូវបានគេរកឃើញដោយមានរបួស ពីការវាយប្រហាររហូតដល់ស្លាប់ នៅក្នុងដុបព្រៃ នៅឃុំរាំងទិល ស្រុកកណ្តៀង ខេត្តពោធិ៍សាត់។ សាកសពជនរងគ្រោះមិនមានស្លៀកខោ និងមានចងខ្សែ។
CPU បានទទួលដំណឹង ហើយក្រុមការងារស៊ើបអង្កេតបទល្មើសមនុស្សឃាត (HIT) និងក្រុមការងារបច្ចេកទេសវិទ្យាសាស្ត្រ (FST) បានចុះទៅកន្លែងកើតហេតុ។ ក្រុមការងារចម្រុះ CHARLIE 20 ត្រូវបានបង្កើតឡើងក្នុងកិច្ចសហប្រតិបត្តិការជាមួយក្រសួងមហាផ្ទៃ និងនគរបាលខេត្តពោធិ៍សាត់។
កន្លែងកើតហេតុ និងសាកសពត្រូវបានត្រួតពិនិត្យ។ ជាលទ្ធផល ជនសង្ស័យភេទប្រុស អាយុ២១ឆ្នាំ ត្រូវបានកម្លាំងសមត្ថកិច្ចឃាត់ខ្លួន។ យើងបានកត់សម្គាល់ថា ជនរងគ្រោះបានបាត់គ្រឿងអលង្ការតម្លៃ $១៥០។
ក្រុមការងាររបស់ CPU បានបន្តធ្វើការស៊ើបអង្កេតនៅកន្លែងកើតហេតុ និងប្រមូលភស្តុតាង និងសំណាក DNA ពីច្រើនកន្លែង ថែមទាំងផ្ទះជនសង្ស័យ និងបុគ្គលមួយចំនួន។
“យើងនឹងប្រើប្រាស់គ្រប់មធ្យោបាយ ដើម្បីធ្វើឲ្យប្រាកដថា យើងនឹងផ្តន្ទាទោសជនល្មើស ពីបទល្មើសដ៏កំសាកមួយនេះ ដែលបានប្រព្រឹត្តទៅលើកុមារ ដែលមិនអាចការពារខ្លួនឯងបាន។ ស្នាមរបួសដែលមាននៅលើដងខ្លួនសាកសព មានស្ថានភាពធ្ងន់ធ្ងរ។ ទោសដែលស័ក្តិសមបំផុត គឺបទឃាតកម្មដោយអំពើឃោរឃៅ ដែលមានទោសជាប់ពន្ធនាគារអស់មួយជីវិត ហើយយើងនឹងព្យាយាមទទួលលទ្ធផលនេះឲ្យបាន”។ក្រុមការងាររបស់ CPU បានបញ្ជាក់យ៉ាងដូច្នេះ៕
