ពុយ វណ្ណៈ និង វ៉ែន ហុងជីវ៉ុងបាត់បង់ឧិកាសឡើងទៅវគ្គផ្ដាច់ព្រ័ត្រ
ភ្នំពេញ៖ពុយ វណ្ណៈក្លិបឃ្លាំងមឿងកីឡាដែលនរណាៗក៏មានជំនឿចិត្តថានឹងឆ្លងផុតវគ្គពាក់កណ្ដាលផ្ដាច់ព្រ័ត្រនោះបែរជាទទួលបរាជ័យដោយសារសោម វិឆ័យក្លិបពន្លឺវិបុលទៅវិញ ។
ក្នុងជំនួបវគ្គពាក់កណ្ដាលផ្ដាច់ព្រ័ត្រនៃព្រឹត្តិការណ៍TV5 Boxing Knock-Out Serie by K-Cement នាយប់ថ្ងៃទី៩ឧសភានោះវណ្ណៈ បានបង្ហាញនូវភាពជឿជាក់ថាការប្រកួតនេះគេសង្ឃឹមថា៧០ភាគរយជ័យជំនះនឹងធ្លាក់មកក្នុងកណ្ដាប់ដៃរបស់គេព្រោះគេត្រូវការណាស់នូវកៅអីសម្រាប់វគ្គផ្ដាច់ព្រ័ត្រ ។
ចំពោះវិឆ័យវិញគេបាននិយាយមុនពេលឡើងសង្វឿនប្រកួតថានេះជាការប្រកួតមួយដ៏តឹងតែងព្រោះទាំងរូបគេទាំងវិឆ័យសុទ្ធតែមិនទាន់ស្គាល់ចាញ់ដូចគ្នានៅក្នុងព្រឹត្តិការណ៍នេះ ។អ្វីដែលគេមានគេត្រូវតែបញ្ចេញឲ្យអស់នឹងវ៉ៃដោយប្រុងប្រយ័ត្នព្រើទាំងរូបគេទាំងវណ្ណៈសុទ្ធតែត្រូវការឈ្នះដូចគ្នា ។
ការប្រកួតពិតជាមានលក្ខណៈតឹងតែងមែន ។វណ្ណៈសម្រុកចូលមករហូតព្រមទាំងវ៉ៃចេញច្រើនទៀតផងតែការវ៉ៃចេញរបស់គេហាក់ដូចជាមិនសូវចំគោលដៅនោះឡើយ ។វិឆ័យដកថយតាមយុទ្ធសាស្ត្រក៏ពិតមែនហើយស្ថិតិនៃការវ៉ៃចេញក៏មិនច្រើនដូចវណ្ណៈតែការវ៉ៃចេញរបស់គេចំគោលដៅបានល្អ និង ច្រើនជាង ។
ដោយការប្រកួតមានតែ៣ទឹកនោះពួកគេបានវ៉ៃគ្នាដោយមិនសំចៃកម្លាំងឡើយពិសេសនៅទឹកទី៣អ្វីៗដែលគេមានគេបញ្ចេញទាំងអស់តែម្ដង ។ទីបំផុតសោម វិឆ័យក្លាយជាម្ចាស់កៅអីសម្រាប់វគ្គផ្ដាច់ព្រ័ត្រចំពោះវណ្ណនៅសល់តែឧិកាសប្រជែងយកកៅអីចំណាត់ថ្នាក់លេខ៣ប៉ុណ្ណោះ ។
ប្រកួតក្នុងវគ្គពាក់កណ្ដាលផ្ដាច់ព្រ័ត្រនេះដែរអ្នកប្រដាល់រិន សារដ្ឋក្លិបបញ្ជាការដ្ឋានកងទ័ពជើងទឹកក៏ប្រជែងបានកៅអីសម្រាប់វគ្គផ្ដាច់ព្រ័ត្រដែរបន្ទាប់ពីប្រកួតឈ្នះអ្នកប្រដាល់វ៉ែន ហុងជីវ៉ុងក្លិបកងកេងកីលាមានរិទ្ធខេត្តបាត់ដំបងដោយពិន្ទុមកនោះ ។
ការប្រកួតរវាងអ្នកប្រដាល់ទាំង២រូបនេះក៏តឹងតែងខ្លាំងដែរ ។ជីវ៉ុងជួបបរាជ័យមែនតែមួយព្រឹត្តិការណ៍នេះគេវ៉ៃបានល្អហើយគេបានធ្វើឲ្យគូប្រកួតទ្រមខ្លួនទៀតផង ។
សារដ្ឋដែលឈ្នះនៅវគ្គពាក់កណ្ដាលផ្ដាច់ព្រ័ត្រគេត្រៀមខ្លួនប្រកួតផ្ដាច់ព្រ័ត្រជាមួយសោម វិឆ័យដែលឈ្នះនៅវគ្គពាក់កណ្ដាលផ្ដាច់ព្រ័ត្រដូចគ្នា ។ចំពោះវ៉ែន ហុងជីវ៉ុងនឹងត្រូវប្រកួតជាមួយពុយ វណ្ណៈដណ្ដើមចំណាត់ថ្នាក់លេខ៣ដែលចាញ់នៅវគ្គពាក់កណ្ដាលផ្ដាច់ព្រ័ត្រដូចគ្នា ។
ចំបោះគូប្រកួតក្រៅព្រឹត្តិការណ៍បានរង្វាន់វិញនោះវេន សុភ័ក្ត្រក្លិបទ័ពឆ័ត្រយោង៩១១ប្រកួតចាញ់ខ្លាកន្ដឿម៉ន សាម៉េតក្លិបកងចក្ររាជសីហ៍ដោយពិន្ទុ ៕
