៥ខែដើមឆ្នាំនេះ រឹបអូសបានសារធាតុញៀនគ្រប់ប្រភេទ ចំនួន 4.139ករណី ជាង 253គីឡូក្រាម ឃាត់មនុស្ស 8.130នាក់

ចេញផ្សាយ ថ្ងៃទី 19 ខែ ឧសភា ឆ្នាំ 2020

ភ្នំពេញ៖ អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន (NACD) នៅថ្ងៃទី១៩ ខែឧសភា ឆ្នាំ២០២០ បានចេញរបាយការណ៍ លទ្ធផលបង្ក្រាបគ្រឿងញៀនទូទាំងប្រទេស ដែលបានអនុវត្តច្បាប់ពីថ្ងៃទី១ ខែមករា ដល់ថ្ងៃទី១៨ ខែឧសភា ឆ្នាំ២០២០ សរុបចំនួន 4.139ករណី ឃាត់មនុស្សចំនួន 8.130នាក់ ក្នុងនោះ ជនបរទេស 114នាក់ មាន7សញ្ជាតិ ដោយសមត្ថកិច្ចចម្រុះ រឹបអូសបានសារធាតុញៀនគ្រប់ប្រភេទចំនួនជាង 253គីឡូក្រាម និងកញ្ឆា 180.490ដើម និងទម្ងន់225គីឡូក្រាម ។

បើតាមគណៈកម្មការទី៣ នៃយុទ្ធនាការប្រឆាំងគ្រឿងញៀនខុសច្បាប់ បានចេញរបាយការណ៍សរុបលទ្ធផលអនុវត្តន៍ច្បាប់ពីថ្ងៃទី១ ខែមករា ដល់ថ្ងៃទី១៨ ខែឧសភា ឆ្នាំ២០២០ គឺសរុបស្មើនឹង 4.139ករណី។ ឃាត់មនុស្សចំនួន 8.130នាក់ (ស្រី 514នាក់) (ជនបរទេស 114នាក់ ស្រី 18នាក់ មាន7សញ្ជាតិ) ក្នុងនោះ ការជួញដូរ រក្សាទុក កែច្នៃ ចាត់ចែង និងដាំដុះ 2.565ករណី ឃាត់ 4.730នាក់ (ស្រី 383នាក់) និងប្រើប្រាស់ 1.574ករណី ឃាត់ 3.400នាក់ (ស្រី 131នាក់)។

ករណីយុទ្ធនាការប្រឆាំងគ្រឿងញៀនខុសច្បាប់នេះដែរ សមត្ថកិច្ចបានអនុវត្ដន៍ដីកាចំនួន 157ដីកា ឃាត់ 144នាក់ (ស្រី 4នាក់) រឹបអូសសារធាតុញៀនគ្រប់ប្រភេទចំនួន 253Kg 156,98g និង 484កញ្ចប់តូច កញ្ឆា ចំនួន 180.490ដើម និង225Kg 506,89ក្រាម សម្ភារចាប់យកមាន រថយន្ដ 29គ្រឿង ម៉ូតូ 882គ្រឿង ទូរស័ព្ទ 2.673គ្រឿង ជញ្ជីង 174គ្រឿង អាវុធខ្លី 4ដើម អាវុធវែង 16ដើម
ចលនៈ និងអចលនៈទ្រព្យ ស្នើសុំបង្កក ចំនួន 1កន្លែង ផ្ទះ 1កន្លែង និង គណនេយ្យធនាគាចំនួន3 មានទឹកប្រាក់ 20.000$។

សូមបញ្ជាក់ថា ក្នុងសន្និបាត បូកសរុបលទ្ធផលការងារ ត្រួតពិនិត្យគ្រឿងញៀន ឆ្នាំ២០១៩ និងទិសដៅការងារ ឆ្នាំ២០២០ និងកិច្ចប្រជុំបូកសរុបលទ្ធផល នៃការអនុវត្តផែនការ យុទ្ធនាការប្រយុទ្ធប្រឆាំងគ្រឿងញៀន ខុសច្បាប់លើកទី៤ នៅទីស្ដីការ ក្រសួងមហាផ្ទៃ នាថ្ងៃទី១៦ ខែមីនា ឆ្នាំ២០២០ ឯកឧត្តមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀ បានថ្លែងថា រឿងចាត់ចែងចលនៈ និងអចលនទ្រព្យ ដែលរឹបអូសពីបទល្មើសគ្រឿងញៀន ក៏នៅតែមានភាពយឺតយ៉ាវ ធ្វើឲ្យទ្រព្យ ពិសេស ចលនៈទ្រព្យជាច្រើន បាត់បង់គុណភាព និងតម្លៃសេដ្ឋកិច្ច ឬមិនអាចយកមកប្រើប្រាស់បាន បញ្ហានេះជាចំណែកសំខាន់ ជះឥទ្ធិពលអវិជ្ជមាន ដល់ការគាំទ្រ ចំពោះការងារប្រយុទ្ធប្រឆាំងគ្រឿងញៀន។ ការសម្រេចដាក់ទោសខ្លះៗ ក៏មានបញ្ហាត្រូវមានការពិនិត្យ ឲ្យបានត្រឹមត្រូវ តាមច្បាប់ជាពិសេស ករណីធំៗ ទៅលើឈ្មូញប្រព្រឹត្ត ដែលមានឥទ្ធិពល នៅក្នុងសង្គម មានទ្រព្យសម្បត្តិច្រើនមកពី បទល្មើសគ្រឿងញៀន។

ឯកឧត្តម មានប្រសាសន៍ថា “តុលាការកាត់ទោសជាង៨ពាន់ករណី ក្នុងមួយឆ្នាំៗគឺច្រើនណាស់។ ប៉ុន្ដែមានករណីខ្លះ មតិសាធារណៈនៅតែមានសង្ស័យ លើការកំណត់ទោស ភាគច្រើនករណីធំៗ ដែលយើងផ្សាយចេញ លទ្ធផលកន្លងទៅនេះ ។ ប៉ុន្ដែការកាត់ទោសខ្លះ នៅតែមានសង្ស័យ ខ្ញុំនិយាយយ៉ាងនេះ អាចដឹងករណីណាខ្លះ ហើយសូមពិនិត្យបញ្ហានេះ ត្រូវប្រុងប្រយ័ត្នបំផុត ហើយខ្ញុំ ស្នើនាយកដ្ឋានអនុវត្តច្បាប់ របស់អាជ្ញាធរក្រោមការដឹងនាំ អគ្គលេខាដ្ឋាន ត្រូវតាមដាន ករណីធំៗឲ្យជាប់ ដោយមិនមានការលើកលែង”។

ឯកឧត្តម កែ គឹមយ៉ាន បានណែនាំឲ្យថ្នាក់ដឹកនាំ អាជ្ញាធរជាតិប្រយុទ្ធប្រឆាំងគ្រឿងញៀន ក៏ដូចជា ក្រសួងស្ថាប័ន អង្គភាពពាក់ព័ន្ធទាំង នៅថ្នាក់ជាតិ និងថ្នាក់ក្រោមជាតិ បន្តចាត់វិធានការ ឲ្យកាន់តែសកម្មថែមទៀត និងបំពញបន្ថែមនូវរាល់ចំណុចខ្វះខាត ដើម្បីបង្ការ ទប់ស្កាត់ បង្ក្រាប និងដោះស្រាយ ឱ្យមានប្រសិទ្ធភាព ពាក់ព័ន្ធនឹងគ្រឿងញៀន។ ចំពោះការរៀបចំពេទ្យជំនាញ ក៏មិនទាន់ឆ្លើយតប ចំពោះការកើនឡើង នៃចំនួនអ្នកញៀនគ្រឿងញៀន ក៏ដូចជាការកើនឡើង នៃសេវាតាមសហគមន៍ និងតាមមណ្ឌលបណ្តោះអាសន្ន ដែលទាំងនេះ មិនទាន់និយាយដល់ ការបណ្តុះបណ្តាលបំណិនជីវិត វិជ្ជាជីវៈ ការជួយស្វែងរកការងារ ដែលសុទ្ធតែជាការងារចាំបាច់ សម្រាប់គាំទ្រដល់ដំណើរការ នៃការធ្វើសមហរណកម្ម។ ចំណុចខ្វះខាតទាំងនេះនឹង ជះឥទ្ធិពលជាអវិជ្ជា មានលើការងារព្យាបាល និងស្តារនិតិសម្បទាដែលបាន និងកំពុងអនុវត្តនាពេលបច្ចុប្បន្ន ក៏ដូចជាអនាគត។

ក្នុងយុទ្ធនាការ ប្រយុទ្ធប្រឆាំងគ្រឿងញៀន រយៈពេល៣ឆ្នាំកន្លងមកនេះ អាជ្ញាធរជាតិ បានទប់ស្កាត់សភាពការណ៍ ពាក់ព័ន្ធទៅនឹងនៃការប្រើប្រាស់គ្រឿងញៀន មានន័យថា ចំនួនអ្នកប្រើប្រាស់ មិនបានរីករាលជាគំហុកទេ ទោះបីជាយ៉ាងណាក៏ដោយ អាជ្ញាធរជាតិ ទទួលស្គាល់ថា ការប្រើប្រាស់គ្រឿងញៀន បានរីករាលដាលពីទីក្រុង ទៅដល់ជនបទ ក៏ប៉ុន្ដែបើប្រៀបធៀប ទៅនឹងបណ្ដាប្រទេសដទៃ អ្នកប្រើប្រាស់គ្រឿងញៀន គ្មានការកើនឡើងឡើយ។ក្រោយយុទ្ធនាការ ប្រយុទ្ធប្រឆាំងគ្រឿងញៀន នាពេលកន្លងទៅនេះ ទទួលជោគជ័យ ប្រមុខរាជរដ្ឋាភិបាល ក៏បានអនុញ្ញាតឲ្យអាជ្ញាធរជាតិ បន្ដយុទ្ធនាការ លើកទី៥ ឆ្នាំ២០២០ ។ យុទ្ធនាការលើកទី៥ អាជ្ញាធរជាតិ នឹងបន្ដទប់ស្កាត់ ឲ្យបានបញ្ហាប្រើប្រាស់គ្រឿងញៀន នៅតាមក្លឹបកម្សាន្ដធំៗ ធ្វើយ៉ាងឲ្យស្ថានភាពគ្រឿងញៀន ក្នុងគ្រប់គ្រងរបស់អាជ្ញាធរជាតិ យ៉ាងពិតប្រាកដ។

ឯកឧត្តម ក៏បានដាស់តឿន ចំពោះអ្នកបម្រើសេវាកម្មក្លឹបកម្សាន្ដ កុំជាប់ពាក់ព័ន្ធក្នុងការបម្រើសេវាប្រើប្រាស់ និងជួញដូរ គ្រឿងញៀនព្រោះការអនុវត្តច្បាប់គ្រឿងញៀន គឺរឹបអូសទ្រព្យដែលកើតចេញពីបទល្មើសគ្រឿងញៀន ដូច្នេះ ពួកគាត់មាន ហានិភ័យខ្ពស់ណាស់ ហើយទ្រព្យពួកគាត់នឹងចូលជាថវិកាជាតិផងដែរ។

បើតាមនាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី បានថ្លែងឲ្យផងដែរថា កាលពីឆ្នាំ២០១៩កន្លងទៅ សមត្ថកិច្ចបង្ក្រាប បទល្មើសគ្រឿងញៀន ចំនួន៩.៨០៦ករណី កើនឡើងប្រមាណ២២,៥៤% ឃាត់ខ្លួនជនសង្ស័យ ចំនួន ២០.៤៩០នាក់ កើនឡើងប្រមាណ២៤,៥៤% និងចាប់យកគ្រឿងញៀន ចំនួន ៧៥០គីឡូក្រាម កើនឡើងប្រមាណ៣៩,៩៦%៕