ជនសង្ស័យ២នាក់ប្រើដែកគាស់ វាយបុរសម្នាក់ ប្លន់យកម៉ូតូមួយគ្រឿង បានសម្រេច នៅសង្កាត់បឹងទំពុន១ ដោយមិនរំខានសមត្ថកិច្ច
ភ្នំពេញ: ជនសង្ស័យ២នាក់ ជិះម៉ូតូមួយគ្រឿង ប្រដាប់ដោយដែកគាស់១ដើម និងយកមួកសុវត្ថិភាព វាយទៅលើយុវជនម្នាក់ ប្លន់យកម៉ូតូមួយគ្រឿង បានសម្រេច រួចជិះគេចខ្លួនបាត់ដោយសុវត្ថិភាព។
ហេតុការណ៍នេះ បានកើតឡើងនៅវេលាម៉ោង១២និង៤០នាទីយប់ រំលងអធ្រាត្រ ឈានចូលថ្ងៃទី២៤ ខែឧសភា ឆ្នាំ២០២០ នៅចំណុចមុខផ្ទះ៣៣ តាមបណ្តោយផ្លូវលេខបេតុងលេខ៧៧BT ដែលស្ថិតក្នុងភូមិចំរើនផល១ សង្កាត់បឹងទំពុន១ ខណ្ឌមានជ័យ។
តាមប្រភពពីមិត្តភក្កិជនរងគ្រោះបានឲ្យដឹងថា មុនកើតហេតុ ជនរងគ្រោះបានជិះម៉ូតូមួយគ្រឿងម៉ាក suzuki let ពណ៌សពាក់ ផ្លាកលេខភ្នំពេញ2GB-0008 បានជូនមិត្តភក្តិម្នាក់ទៅផ្ទះ នៅម្ដុំចាក់សំរាមចាស់ ។ ក្រោយពីជូនមិត្តភក្តិដាក់ផ្ទះរួច ជនរងគ្រោះបានជិះម៉ូតូត្រឡប់មកផ្ទះវិញ លុះជិះម៉ូតូមកដល់ចំណុចមុខផ្ទះ រៀបនឹងចាក់សោចូលផ្ទះទៅហើយ ក៏លេចមុខជនសង្ស័យចំនួន ២ នាក់ ជិះម៉ូតូមួយគ្រឿងមិនចាំផ្លាកលេខ បានមកអែបរងគ្រោះ រួចទាញមួកសុវត្ថិភាពវាយទៅលើជនរងគ្រោះ និងយកដែកគាស់១ដើម មកគំរាមរកវាយបន្ថែមទៀត ធ្វើឲ្យជនរងគ្រោះភ័យស្លន់ស្លោផ្តួលម៉ូតូចោល រត់យករួចខ្លួនសិន។ បន្ទាប់មកជនសង្ស័យមានឱកាស បានលើកម៉ូតូជនរងគ្រោះ ជិះគេចខ្លួនដោយសុវត្ថិភាព។
សូមបញ្ជាក់ថា រកណីនេះសមត្ថកិច្ចមូលដ្ឋាន ហាក់បីមានការលាក់លៀម មិនចង់បញ្ជាក់ហេតុការណ៍នេះ ឲ្យបានច្បាស់នោះទេ ព្រោះនូវស្រាវជ្រាវបន្ត។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលបឹងទំពុន១ ដើម្បីឲ្យសមត្ថកិច្ចជួយស្រាវជ្រាវ រកជនសង្ស័យបន្តទៀត ដើម្បីយកមកផ្ដន្ទាទោសទៅតាមផ្លូវច្បាប់៕
