សមត្ថកិច្ចចុះបង្ក្រាបសង្វៀនជល់មាន់ អាប៉ោង ដុះស្លែមួយកន្លែង ឃាត់ក្រុមអ្នកញៀនល្បែង បាន៥០នាក់ នៅខណ្ឌមានជ័យ
ភ្នំពេញ៖ កម្លាំងគណៈបញ្ជាការឯកភាពខណ្ឌមានជ័យ បានសហការជាមួយកម្លាំងប៉ុស្តិ៍មូលដ្ឋាន បានលួចឆ្មក់ ចុះបង្ក្រាបសង្វៀនជល់មាន់ និងអាប៉ោងដុះស្លែមួយកន្លែង ព្រមទាំងឃាត់ខ្លួនអ្នកញៀនល្បែងបាន៥០នាក់។
ប្រតិបត្តិចុះបង្ក្រាបនេះ បានធ្វើឡើងកាលពីរសៀលថ្ងៃទី២៤ ខែឧសភា ឆ្នាំ២០២០ ស្ថិតនៅតាមបណ្តោយផ្លូវដួងងៀប ហៅផ្លូវសេះស ក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
លោកវរសេនីយ៍ឯកម៉េង វិមានតារា អធិការនគរបាលខណ្ឌមានជ័យ ដោយមានបទបញ្ជាពីឯកឧត្តម ស ថេត ស្នងការនគរបាលរាជធានីភ្នំពេញ និងមានការសម្របសម្រួលពីលោក សុខ កែវបណ្ឌិត ព្រះរាជអាជ្ញារង អមសាលាដំបូងរាជធានីភ្នំពេញ កម្លាំងចម្រុះនៃអធិការដ្ឋាននគរបាលខណ្ឌមានជ័យ បានលួចឆ្មក់រួចធ្វើការឡោមព័ទ្ធទីតាំងល្បែងស៊ីសងជល់មាន់ខុសច្បាប់មួយកន្លែងនេះតែម្តង ដោយឃាត់ខ្លួនមនុស្សប្រុសស្រីជាង៥០នាក់។
គួររំលឹកថា បន្ទាប់ពីមានសារព័ត៌មានជាច្រើនអង្គភាព ចុះផ្សព្វផ្សាយថា បនល្បែង (ជល់មាន់អាប៉ោង) ខ្នាតធំនៅខណ្ឌមានជ័យ កំពុងប្រព្រឹត្តទៅយ៉ាងរលូន អាជ្ញាធរហាក់ស្រវាំងភ្នែកងាប់ត្រចៀក៕
