នគរបាលប៉ុស្តិ៍បឹងត្របែក ឃាត់ខ្លួនស្ដ្រីម្នាក់ ករណីដាក់ថ្នាំងងុយដេក លួចយកកាបូបលុយ ពីបុរសរត់ម៉ូតូកង់បីឥណ្ឌា កាលពីថ្ងៃមុន
ភ្នំពេញ ៖ នគរបាលប៉ុស្តិ៍បឹងត្របែក ឃាត់ខ្លួនជនសង្ស័យម្នាក់ជាស្ត្រី ករណីដាក់ថ្នាំងងុយដេកលួចយកកាបូបលុយ ពីបុរសម្នាក់ហើយព្យាយាមរត់គេចខ្លួន តែត្រូវពលរដ្ឋឃាត់ខ្លួនប្រគល់ឲ្យសមត្ថកិច្ច ។ ហេតុការណ៍នេះបានកើតឡើងកាលពីវេលាម៉ោង ៣និង៣០នាទី ថ្ងៃទី២៤ ខែឧសភា ឆ្នាំ២០២០ នៅចំណុចមុខផ្ទះB០១ ផ្លូវ៤៣៦ ក្រុម២១ ភូមិ៦ សង្កាត់បឹងត្របែក ខណ្ឌចំការមន រាជធានីភ្នំពេញ។
ជនសង្ស័យមានឈ្មោះ អ៊ុច ចាន់ថា ភេទស្រី អាយុ៣៤ឆ្នាំ មុខរបរនៅផ្ទះ ស្នាក់នៅផ្ទះជួលគ្មានលេខ ផ្លូវលេខ៩៧ ក្នុងសង្កាត់ផ្សារដើមថ្កូវ ខណ្ឌចំការមន ដោយមានស្រុកកំណើត នៅភូមិចម្រើនផល សង្កាត់បឹងទំពុន ខណ្ឌមានជ័យ រាជធានីភ្នំពេញ។
ចំណែកជនរងគ្រោះមានឈ្មោះ ថន កោសល្យ ភេទប្រុស អាយុ៣៥ឆ្នាំ មានស្រុកកំណើតនៅភូមិរូង ឃុំលំចង់ ស្រុកសំរោង ខេត្តតាកែវ មុខរបររត់កង់បីឥណ្ឌា ស្នាក់នៅផ្ទះលេខ ១២ ផ្លូវលេខ១០៥ ភូមិ២៤ សង្កាត់ព្រៃស ខណ្ឌដង្កោ រាជធានីភ្នំពេញ។
ក្នុងនោះសម្ភារបាត់បង់ រួមមាន កូនកាបូបដៃវែង ពណ៌ខ្មៅ ចំនួន១ គ្មានប្រាក់ មានយ័នក្រណាត់ពណ៌ក្រហមមួយ , កូនកាបូបដៃមួយទៀត ពណ៌ត្នោត ក្នុងនោះមានកាតគ្រីម៉ូតូ១ , កាត ATM ចំនួន១ , ប័ណ្ណបើកបររថយន្តចំនួន១ (គ្មានប្រាក់ជារបស់ជនរងគ្រោះ ) ។ រីឯសម្ភារដកហូតបាន រួមមាន ថ្នាំងងុយដេកសម៉ត់ មួយកញ្ចប់។
ប្រភពព័ត៌មានបានឲ្យដឹងថា មុនពេលកើតហេតុ ជនសង្ស័យបានជិះម៉ូតូកង់បីឥណ្ឌា ចេញពីផ្ទះនៅម្ដុំខាងកើតផ្សារបឹងកេងកង តម្លៃ ២ម៉ឺនរៀល មកផ្សារបឹងត្របែក នៅក្នុងគោលបំណងមកតាមសង្សាររបស់ខ្លួនឈ្មោះរ៉ា ។ ពេលមកដល់ផ្សារបឹងត្របែក ជនសង្ស័យក៏ឡើងជិះម៉ូតូកង់បីឥណ្ឌាផ្សេងថ្មីមួយទៀត ដោយអង្គុយលេងជាមួយម្ចាស់ម៉ូតូកង់បីនោះបានប្រហែល ជិតកន្លះម៉ោង ជនសង្ស័យក៏ឱ្យជនរងគ្រោះ ដែលជាម្ចាស់ម៉ូតូកង់បី បើកម៉ូតូជូនទៅទិញទឹកក្រឡុកនៅជិត rock រួចជនរងគ្រោះ ក៏ដឹកជនសង្ស័យមុខផ្សារបឹងត្របែកវិញ ។ ពេលត្រឡប់មកវិញនោះ នៅតាមផ្លូវ ជនសង្ស័យបានលួចដាក់ថ្នាំងងុយដេក ចូលទៅក្នុងកែវទឹកក្រឡុក។ លុះពេលដល់ផ្សារបឹងត្របែក ជនសង្ស័យក៏ឲ្យទឹកក្រឡុកមួយកែវ ដែលមានថ្នាំឲ្យទៅជនរងគ្រោះផឹក និងមួយកែវទៀត ដែលគ្មានមានថ្នាំជនសង្ស័យក៏ផឹកខ្លួនឯង។ លុះជនរងគ្រោះផឹកបានប្រហែលជាកន្លះម៉ោង ស្រាប់តែដេកលក់សន្លប់បាត់ស្មារតីនៅលើម៉ូតូកង់៣តែម្ដង ។ ពេលជនរងគ្រោះសន្លប់ ជនសង្ស័យក៏ឆ្លៀតឱកាសធ្វើសកម្មភាព លូកយកកូនកាបូបដៃចំនួន២បានសម្រេច រួចក៏ចុះពីលើម៉ូតូកង់បីដើរទៅលូទឹកស្អុយ។
ពេលនោះ អ្នករត់ម៉ូតូកង់បីឥណ្ឌាដូចគ្នា ដែលសម្រាកនៅក្បែរនោះ មានការសង្ស័យ ក៏នាំគ្នាឃាត់ខ្លួនជនសង្ស័យខាងលើ ប្រគល់ឲ្យសមត្ថកិច្ច រួមទាំងវត្ថុតាងតែម្ដង។
បច្ចុប្បន្នជនសង្ស័យខាងលើ ត្រូវបានសមត្ថកិច្ច ធ្វើការសាកសួរ និងកសាងសំណុំរឿង បញ្ជូនខ្លួនទៅកាន់អធិការដ្ឋាននគរបាលខណ្ឌចំការមន ដើម្បីបញ្ជូនខ្លួនបន្ត ទៅកាន់តុលាការ ចាត់ការតាមច្បាប់បន្តទៀត៕
