បុរស២នាក់ត្រូវរន្ទះបាញ់ស្លាប់ ពេលដើរឆ្លុះកង្កែប និងភ្ជួរស្រែមេឃកំពុងភ្លៀង ចំណែកក្របី៣ក្បាលងាប់ដោយរន្ទះ
កំពង់ធំ ៖ បុរស២នាក់ត្រូវរន្ទះបាញ់បណ្តាលឲ្យស្លាប់នៅស្រុកស្ទោង និងស្រុកសន្ទុក នៃខេត្តកំពង់ធំ ខណៈកំពុងដើរឆ្លុះកង្កែប និងម្នាក់ទៀតកំពុងភ្ជួរស្រែ ហើយមានមានភ្លៀងធ្លាក់ ។ ចំណេកឯសត្វក្របីចំនួន៣ក្បាល ត្រូវបានរន្ទះបាញ់ងាប់ ខណៈម្ចាស់ចងនៅខាងក្រោមផ្ទះពេលមេឃកំពុងភ្លៀង។
ករណីទី១ ៖ កើតហេតុនៅថ្ងៃទី២៩ ខែឧសភា ឆ្នាំ២០២០ វេលាម៉ោង១២និង២៥នាទី ស្ថិតនៅភូមិត្រើយម្យ៉ាប ឃុំប្រាសាទ ស្រុកសន្ទុក ។ ជនរងគ្រោះឈ្មោះ មី ម៉ៅ អាយុ២៧ឆ្នាំ ត្រូវរន្ទះបាញ់បណ្តាលឲ្យស្លាប់ ពេលកំពុងភ្ជួរស្រែកណ្តាលភ្លៀង ។
ករណីទី២ ៖ កើតហេតុនៅថ្ងៃទី២៨ ខែឧសភា ឆ្នាំ២០២០ វេលាម៉ោង១៩និង៣០នាទី ស្ថិតនៅភូមិស្រីរងិត ឃុំចំណាក្រោម ស្រុកស្ទោង។ ជនរងគ្រោះឈ្មោះ ស៊ត ប្រាក់ អាយុ៤៩ឆ្នាំ ត្រូវរន្ទះបាញ់ស្លាប់ ពេលកំពុងដើរឆ្លុះកង្កែប ។
ករណីទី៣ ៖ សត្វក្របីចំនួន៣ក្បាល ត្រូវបានរន្ទះបាញ់ងាប់ ខណៈម្ចាស់ចងនៅខាងក្រោមផ្ទះ ពេលមេឃកំពុងភ្លៀង នៅរសៀលថ្ងៃទី២៩ ខែឧសភា ឆ្នាំ២០២០ វេលាម៉ោង២និង៣០នាទី នៅចំណុច ពោធិ៍តានន ភូមិសាស្ត្រ ភូមិ ត្អួរលំ ឃុំ កំពង់ហៅ ស្រុកកំពង់លែង ខេត្តកំពង់ឆ្នាំង។
សត្វក្របីទាំងបីក្បាល ជាកម្មសិទ្ធិរបស់ឈ្មោះ អ៊ុំ ថា ភេទប្រុស អាយុ៥០ឆ្នាំ រស់នៅភូមិ-ឃុំ ខាងលើ ងាប់ក្របីចំនួន២ក្បាល (ញី១ ក្បាល) និងឈ្មោះ សង ណារី ភេទស្រី អាយុ ៤០ឆ្នាំ រស់នៅភូមិ-ឃុំ ជាមួយគ្នាអស់ក្របីឈ្មោលចំនួន ១ ក្បាល ៕
