លើកកម្ពស់ការអប់រំឌីជីថល សម្រាប់បឋមសិក្សានៅតំបន់ជនបទ នឹងផ្ដល់ឱកាសឱ្យកុមារជនបទ ស្វែងយល់ពីប្រព័ន្ធអប់រំបែបឌីជីថល និងជួយពង្រឹងសមត្ថភាពគ្រូបង្រៀន
ភ្នំពេញ៖ នាយកដ្ឋានបច្ចេកវិទ្យាព័ត៌មាននៃក្រសួងអប់រំ យុវជន និងកីឡា បានចុះកិច្ចព្រមព្រៀងជាមួយអង្គការឆាលហ្វានកម្ពុជា (ChildFund Cambodia) ដើម្បីបំពាក់ប្រព័ន្ធអប់រំតាមបែបឌីជីថល (អេឡិចត្រូនិក) ដល់សាលារៀនតាមតំបន់ជនបទ ដើម្បីផ្ដល់លទ្ធភាពដល់កុមារក្នុងការបន្តការសិក្សាតាមបច្ចេកវិទ្យាទំនើប។ បច្ចេកវិទ្យាថ្មីនេះ នឹងផ្ដល់ឱកាសឱ្យកុមារជនបទ បានស្វែងយល់ពីប្រព័ន្ធអប់រំបែបឌីជីថល និងជួយពង្រឹងសមត្ថភាពគ្រូបង្រៀនក្នុងការតាមដាន និងវាយតម្លៃសមត្ថភាពរបស់សិស្ស
ពិធីចុះកិច្ចព្រមព្រៀងនេះបានប្រព្រឹត្តទៅក្រោមអធិបតីភាពឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងត្រូវបានចុះហត្ថលេខាដោយលោក សុក ថា ប្រធាននាយកដ្ឋានបច្ចេកវិទ្យាព័ត៌មាន និងលោក ប្រាសាន វេម៉ា (Prashant Verma) នាយកអង្គការឆាលហ្វាន ប្រចាំប្រទេសកម្ពុជា កាលពីថ្ងៃទី១១ មិថុនា ២០២០ នាទីស្ដីការក្រសួងអប់រំ។
សាលាបឋមសិក្សាជនបទចំនួន ១៥ សាលា នឹងទទួលផលពីគម្រោងសាកល្បងនេះ តាមរយៈការបំពាក់ប្រព័ន្ធមាតិកាឌីជីថល (Content Server) ដែលផ្ទុកទៅដោយឯកសារមេរៀនបែបឌីជីថល និងធនធានអប់រំជាច្រើនពីគេហទំព័រនានា ជាពិសេសគេហទំព័រគ្រូ www.krou.moeys.gov.kh ដែលសិស្សអាចទាញយកមករៀនសូត្រ ដោយមិនចាំបាច់មានប្រព័ន្ធអ៊ីនធឺណិតឡើយ។
គម្រោងនេះ នឹងផ្តល់លទ្ធភាពដល់សាលាគោលដៅតាមជនបទ អាចប្រើប្រាស់ធនធានអប់រំបែបឌីជីថល ដោយដោះស្រាយបញ្ហាពុំមានប្រព័ន្ធអ៊ីនធឺណិត សម្រាប់ការអប់រំពីចម្ងាយ។ បច្ចេកវិទ្យាថ្មីនេះ នឹងផ្ដល់ឱកាសឱ្យកុមារជនបទ បានស្វែងយល់ពីប្រព័ន្ធអប់រំបែបឌីជីថល និងជួយពង្រឹងសមត្ថភាពគ្រូបង្រៀនក្នុងការតាមដាន និងវាយតម្លៃសមត្ថភាពរបស់សិស្ស។ គម្រោងនេះ មិនត្រឹមតែធានាថាកុមារអាចបន្តការសិក្សាក្នុងស្ថានភាពនៃការរីករាលដាលនៃជំងឺកូវីត១៩ ប៉ុណ្ណោះទេ តែជាការជួយឱ្យសាលាតាមជនបទត្រៀមខ្លួនសម្រាប់ការវិវឌ្ឍនាពេលអនាគត ផងដែរ។
គម្រោងនេះនឹងត្រូវសាកល្បងតាមសាលាបឋមសិក្សាក្នុងស្រុកស្វាយជ្រំ និងស្រុករមាសហែក ខេត្តស្វាយរៀង ចាប់ពីថ្ងៃទី០១ ខែមិថុនា រហូតដល់ ថ្ងៃទី៣០ ខែកញ្ញា ឆ្នាំ២០២០។ គម្រោងនេះនឹងផ្តោតលើសិស្សពីថ្នាក់ទី ១ ដល់ទី ៦ ហើយវិធានការកិច្ចការពារកុមារទាំងឡាយ នឹងត្រូវបានដាក់បញ្ចូល ដើម្បីធានាថាសិស្សរៀនសូត្រដោយគ្មានការភ័យខ្លាច៕
