ព្រះសង្ឃ២អង្គគង់នៅវត្តអង្គរកា ជាចោរលួច , បញ្ជូនជនសង្ស័យ៤នាក់ ទៅតុលាការ ពាក់ព័ន្ធករណីចោរកម្មលួចកំព្យូរទ័រជិត២០គ្រឿង
តាកែវ៖ ជនសង្ស័យចំនួន៤នាក់ ត្រូវបាននគរបាលស្រុកត្រាំកក់ ឃាត់ខ្លួនបានជាបន្តបន្ទាប់ ក្រោយបក្ខពួកបានសារភាពដាក់ និងនាំទៅចាប់មុខសញ្ញាជាបន្តបន្ទាប់ ដោយក្នុងនោះប៉ូលិសបានឃាត់ខ្លួនព្រះសង្ឃ២អង្គផងដែរ គង់នៅវត្តអង្គរកា ក្នុងករណីចោរកម្មគាស់ដំបូលលួចកុំព្យូទ័រសាលារៀន កាលពីខែឧសភា ឆ្នាំ២០២០។
បើតាមរបាយការណ៍របស់សមត្ថកិច្ចបានឲ្យដឹងថា កាលពីដើមខែមិថុនា ប៉ុស្តិ៍នគរបាលរដ្ឋបាលឃុំត្រពាំងធំខាងត្បូង បានទទួលពាក្យបណ្តឹង១ច្បាប់ ពីឈ្មោះ ខឿន សុទ្ធិកា ភេទប្រុស អាយុ ៣៨ ឆ្នាំនៅភូមិខ្សឹង សង្កាត់រកាក្នុង ក្រុងដូនកែវ ជានាយកសាលាមណ្ឌលសិក្សាប៊ុតប្រីដច៍ បានប្តឹងពីក្រុមចោរពុំស្គាល់អត្តសញ្ញាណ១ ក្រុម បានធ្វើសកម្មភាពបើកដំបូលក្បឿងនៅសាលារៀនបឋមសិក្សាអង្គរកា ចូលលួចយក កុំព្យូទ័រអស់ចំនួន ១៦ គ្រឿង ប្រដាប់បំពងសំឡេងចំនួន ២ គ្រឿង កាលពីថ្ងៃពុំចាំក្នុងអំឡុងខែឧសភា ឆ្នាំ២០២០ ។
ក្រោយពីទទួលបានបណ្តឹង នៅថ្ងៃទី២៨ ខែមិថុនា សមត្ថកិច្ចបានឃាត់ជនសង្ស័យ ១នាក់ ឈ្មោះ ហ៊ុន ធារ៉ា ភេទប្រុស អាយុ ២០ ឆ្នាំរស់នៅភូមិតាកឹម ឃុំតាភេម ស្រុកត្រាំកក់ ខេត្តតាកែវ ដែលជាជនដៃដល់ធ្វើសកម្មភាពលួច ដោយដកហូតបានកុំព្យូទ័រចំនួន ២ គ្រឿង បន្ទាប់ពីបានសាកសួរយកចម្លើយ និងចម្លើយសារភាពឆ្លើយដាក់ទៅមុខសញ្ញាផ្សេងទៀត។
ហើយនៅថ្ងៃបន្ទាប់ សមត្ថកិច្ចក៏បន្តឃាត់ខ្លួនជនសង្ស័យចំនួន ៣ នាក់ទៀត ១-ឈ្មោះ លាវ រ៉ុង ភេទ ប្រុស អាយុ ២៥ ឆ្នាំរស់នៅភូមិ ព្រៃរំដួល ឃុំត្រពាំងធំខាងត្បូង ស្រុកត្រាំកក់ ខេត្តតាកែវ, ២-ឈ្មោះ វន ផានិត ភេទប្រុស អាយុ ១៧ ឆ្នាំនៅភូមិតាតឹម ឃុំជាងទង ស្រុក ត្រាំកក់ ខេត្តតាកែវ ជាព្រះសង្ឃគង់នៅវត្តអង្គរកា និង ៣-ឈ្មោះ នេត សំណាង ហៅ ទូច ភេទប្រុស អាយុ ១៤ ឆ្នាំមានស្រុកកំណើតនៅឃុំ បន្ទាយឆ្មារ ស្រុកថ្មពួក ខេត្តបន្ទាយមានជ័យ ជាព្រះសង្ឃគង់នៅវត្តអង្គរកា និង បន្តដកហូតវត្ថុតាងបានកុំព្យូទ័រចំនួន ៥ គ្រឿងបន្ថែមទៀត សរុបកុំព្យូទ័រដែលយើងដកបានចំនួន គ្រឿង ។ ហើយនៅក្នុងថ្ងៃទី ៣០ ខែមិថុនា នេះដែរ សមត្ថកិច្ចបាននិងកំពុងកសាងសំណុំរឿងបញ្ជូនទៅតុលាការ ៕
