ចាប់ខ្លួនបុរសម្នាក់ ប្រព្រឹត្តអំពើហិង្សាក្នុងគ្រួសារ ក្រុងតាខ្មៅ
ខេត្តកណ្ដាល៖ នៅថ្ងៃសុក្រ០៤កើត ខែស្រាព៍ណ ឆ្នាំជូតទោស័ក.ព.ស.២៥៦៤ត្រូវនឹង ថ្ងៃសុក្រ ទី២៤ ខែកក្កដា
ឆ្នាំ២០២០ វេលាម៉ោង០៨និង២០នាទី មានករណីអំពើហិង្សាក្នុងគ្រួសារ នៅផ្ទះជនសង្ស័យភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ។ជនរងគ្រោះត្រូវជាប្រពន្ធឈ្មោះ ហេង លីណា ភេទស្រី អាយុ២៨ឆ្នាំ ជនជាតិខ្មែរ ទីលំនៅភូមិសង្កាត់កើតហេតុមុខរបរលក់ដូរ។
ជនសង្ស័យប្តីឈ្មោះ ប៊ិន ចាន់ទ្រា ភេទប្រុស អាយុ៣៣ឆ្នាំ ជនជាតិខ្មែរ ទីលំនៅភូមិសង្កាត់កើតហេតុ មុខរបរលក់ដូរ ។
ជនសង្ស័យ មានសភាពបែកថ្នាំ ហើយបានវាយបំផ្លាញ ទ្រព្យសម្បត្តិក្នុងផ្ទះ និងឈ្លោះប្រកែកគ្នា ជាមួយជនរងគ្រោះ រឿងដណ្តើមកូនស្រី អាយុ៣ឆ្នាំ បន្ទាប់មកជនសង្ស័យក៏បានដាល់ជនរងគ្រោះមួយដៃចំស្មាខាងស្តាំ បណ្តាលអោយដួលអុកគូទ មានរបួសស្នាមហើម។ ដោយទ្រាំនឹងទង្វើដដែលៗ ជាច្រើនលើកច្រើនសារ របស់ជនសង្ស័យកន្លងមកមិនបាន ទើបជនរងគ្រោះបានប្តឹងទៅប៉ុស្តិ៍ដើមមៀនអោយឃាត់ខ្លួនជនសង្ស័យ បញ្ជូនមកកាន់អធិការដ្ឋាននគរបាលក្រុងតាខ្មៅ ចាត់ការតាមនិតិវិធី៕
