អ្នកធ្វើដំណើរ រិះគន់អាជ្ញាធរមូលដ្ឋានខណ្ឌមានជ័យ បណ្តែតបណ្តោយឲ្យ អ្នករស់នៅសងខាងផ្លូវ ខាងលើដាក់តាំងលក់របស់របរ និងធ្វើអាជីវកម្ម បង្កស្ទះចរាចរណ៍
ភ្នំពេញ៖ ប្រជាពលរដ្ឋ និងអ្នកធ្វើដំណើរតាមបណ្តាយផ្លូវ ៣៧១ ចាប់ពីផ្លូវបំបែក ២៧១ ស្ថិតក្នុងសង្កាត់បឹងទំពុនទី១ និងបឹងទំពុនទី២ រហូតដល់ស្ពានដែកក្នុងខណ្ឌមានជ័យ បានសំដែងនូវការខឹងសម្បារ និង មិនពេញចិត្តចំពោះអាជ្ញាធរមូលដ្ឋាន ដែលបណ្តែតបណ្តោយឲ្យ អ្នករស់នៅសងខាងផ្លូវ ខាងលើដាក់តាំងលក់របស់របរ និងធ្វើអាជីវកម្ម រំលោភយកចំណីផ្លូវ បង្កឲ្យមានការកកស្ទះ និងគ្រោះថ្នាក់ចរាចរណ៍ កើតមានជាញាក់ញាប់។
អ្នកធ្វើដំណើរបន្តថា ការកកស្ទះចរាចរណ៍ ស្ទើរជារៀងរាល់ថ្ងៃខាងលើនេះ គឺបណ្តាលមកពី អ្នកធ្វើអាជីវកម្ម រំលោភយកចំណីផ្លូវ បង្កើតជាកន្លែងដាក់តាំងលក់ជាប់ជាប្រចាំ មានដូចជាកន្លែងជួសជុលមានស៊ីនគ្រប់ប្រភេទ កន្លែងសិប្បកម្មធ្វើទ្វារ ធ្វើម្នាងសិលា ជួសជុល និងតាំងលក់គ្រឿងបន្លាស់ម៉ូតូ កន្លែងតាំងលក់ផ្កា និងកន្លែងតោនផ្សារ ក្រឡឹងគ្រឿងចក្រជាដើម។
អ្នកធ្វើដំណើរ និងប្រជាពលរដ្ឋបន្តថា ក្រៅពីការរំលោភយកចំណីផ្លូវអ្នកថ្មើរជើង បង្កើតជាមុខរបរ ធ្វើជាកម្មសិទ្ធិផ្ទាល់ខ្លួននៅចំពីមុនផ្ទះនេះ គេសង្កេតឃើញនៅមានរថយន្តដឹកខ្សាច់ ដឹកដី ក្រួស និងថ្ម បង្កឲ្យហូរជ្រុះ កំពប់ធ្លាក់រាយប៉ាយ ធ្វើឲ្យហុយ ប៉ះពាល់ដល់សុខភាពសាធារណៈថែមទៀត។
ដូច្នេះ ក្នុងនាមប្រជាពលរដ្ឋ ក៏ដូចអ្នកធ្វើដំណើរលើកំណាត់ផ្លូវនេះ សូមទទូចស្នើសុំ អាជ្ញាធរមូនដ្ឋាន មេត្តាជួយមានវិធានការ ទប់ស្កាត់ ដើម្បីធ្វើយ៉ាងណាកែលម្អបញ្ហាខាងលើនេះ ឲ្យមានសណ្តាប់ធ្នាប់ល្អផង៕
