ជនសង្ស័យម្នាក់ វាយសម្លាប់បងថ្លៃរបស់ខ្លួន នៅក្នុងក្រុងសៀមរាប កាលពីឆ្នាំ២០១៩កន្លងទៅ ហើយគេចទៅលាក់ខ្លួន នៅឯ ខេត្តពោធិ៍សាត់ ត្រូវបានចាប់ខ្លួនហើយ
សៀមរាប៖ នគរបាលព្រហ្មទណ្ឌ នៃស្នងការដ្ឋាននគរបាលខេត្តសៀមរាប នៅថ្ងៃទី១៧ខែសីហាឆ្នាំ២០២០ បានឲ្យដឹងថា ជនសង្ស័យម្នាក់ វាយសម្លាប់បងថ្លៃរបស់ខ្លួន នៅក្នុងក្រុងសៀមរាប កាលពីឆ្នាំ២០១៩កន្លងទៅ ហើយគេចទៅលាក់ខ្លួន នៅឯ ខេត្តពោធិ៍សាត់ ត្រូវបានចាប់ខ្លួនហើយ ។
ននគរបាលព្រហ្មទណ្ឌ បានបញ្ជាក់ពីដំណើររឿងថា កាលពីថ្ងៃទី១៥ ខែកក្កដា ឆ្នាំ២០១៩ មានប្រជាពលរដ្ឋឈ្មោះសុគុណ វីឡា ភេទស្រី អាយុ៣៩ឆ្នាំរស់នៅភូមិតាគង់ សង្កាត់សំបួរ ក្រុងសៀមរាប ខេត្តសៀមរាប បានមករាយការណ៍ដល់សមត្ថកិច្ចយើងថា ខ្លួនបានបាត់ប្តីឈ្មោះញ៉ាង វណ្ណនី ភេទប្រុស អាយុ៤៣ឆ្នាំ ចាប់តាំងពីអំឡុងខែឧសភា ឆ្នាំ២០១៩មកម្លេះ ដោយមិនដឹងជាទៅទីណានោះទេ ក្រោយពីទទួលសេចក្តីរាយការណ៍កម្លាំងចំណុះ នៃអធិការដ្ឋាននគរបាលក្រុងសៀមរាប ក៏បានជួយស្រាវជ្រាវ និងប្រកាសស្វែងរក ។
លុះដល់នៅថ្ងៃទី១៦ ខែកញ្ញា ឆ្នាំ២០១៩ វេលាម៉ោង១៥:០០នាទីក៏មានសេចក្តីរាយការណ៍ពីលោកនាយប៉ុស្តិ៍សង្កាត់សំបួរថា នៅភូមិតាគង់ សង្កាត់សំបួរ ក្រុងសៀមរាប ខេត្តសៀមរាប មានពំនូកដីមួយ មានធុំក្លិនស្អុយចេញពីពំនូកដីនៅរោងផ្ទះបាយ ខាងក្រោយផ្ទះឈ្មោះ ញ៉ាង់ វណ្ណនី ក្រោយពីទទួលសេចក្តីរាយការណ៍ លោកវរសេនីយ៍ទោនួន ស័ក្តិចំរើនរិទ្ធ អធិការរងទទួលបន្ទុកផ្នែកយុត្តិធម៌នៃអធិការដ្ឋាននគរបាលក្រុងសៀមរាប បានដឹកនាំកម្លាំង ចុះដល់កន្លែងកើតហេតុ និងបានជីកគាស់កន្លែងមានក្លិនស្អុយឡើង ទើបដឹងថាជាសាកសពរបស់មនុស្ស ។
ក្រោយពេលធ្វើកោសល្យវិច័យ ទើបសមត្ថកិច្ចយើងដឹងថា កន្លែងដែលមានក្លិនស្អុយកប់ក្នុងដីនោះ ជាសាកសពមនុស្សស្លាប់ ដោយអំពើឃាតកម្ម ដែលជនរងគ្រោះឈ្មោះញ៉ាង វណ្ណនី ភេទប្រុស អាយុ៤៣ឆ្នាំ ជាប្តីរបស់ឈ្មោះសុគុណ វីឡា ដែលបានបាត់ខ្លួនក្នុងអំឡុងខែឧសភា ឆ្នាំ២០១៩ កន្លងទៅ ។បន្ទាប់ពីពិនិត្យសពរួចរាល់ហើយ យើងបានធ្វើការប្រគល់សព ជូនគ្រួសារជនរងគ្រោះ យកទៅធ្វើបុណ្យតាមប្រពៃណី និងបានបើកការស្រាវជ្រាវ នឹងបំភ្លឺសាក្សីនៅជុំវិញកន្លែងកើតហេតុ។
បន្ទាប់ពីបានធ្វើការស្រាវជ្រាវ នឹងបំភ្លឺសាក្សីនៅជុំវិញកន្លែងកើតហេតុ កម្លាំងនគរបាលផ្នែកយុត្តិធម៌ក្រុងសៀមរាប បានធ្វើការកំណត់មុខសញ្ញា ជនសង្ស័យដែលប្រព្រឹត្តអំពើដ៏ព្រៃផ្សៃនេះបាន គឺមានឈ្មោះសុគុណ ច័ន្ទតារា ភេទប្រុស អាយុ៣២ឆ្នាំ ដែលត្រូវជាប្អូនបង្កើតរបស់ឈ្មោះសុគុណ វីឡា នឹងត្រូវជាប្អូនថ្លៃជនរងគ្រោះ ដែលបានគេចខ្លួនមុនពេលសមត្ថកិច្ចយើងចុះទៅដល់កន្លែងកើតហេតុ។
បន្ទាប់មកកម្លាំងនគរបាលផ្នែកយុត្តិធម៌ក្រុងសៀមរាបយើង បានកសាងសំណុំរឿងបញ្ជូនទៅតុលាការ រហូតដល់ថ្ងៃទី២៤ ខែមិថុនា ឆ្នាំ២០២០ លោក ជូ លឹមហ៊ាង ជាចៅក្រមស៊ើបសួរ នៃសាលាដំបូងខេត្តសៀមរាប បានចេញដីកាលេខ៤៨៣ន.ខ.ស/ឈ បង្គាប់ឲ្យនាំខ្លួន ជនសង្ស័យមកផ្តន្ទាទោសតាមផ្លូវច្បាប់។
ដោយមានការយកចិត្តទុកដាក់ខ្ពស់ ពី សំណាក់ លោកស្នងការ និងលោកឧត្តមសេនីយ៍ត្រីភឹង ចិន្តារ៉េតស្នងការរង ទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាល ខេត្តសៀមរាប ក៏ដូចជាលោកវរសេនីយ៍ឯក ណុបសារ៉ាក់ អធិការនគរបាលក្រុងសៀមរាប នៅថ្ងៃទី១៦ ខែសីហា ឆ្នាំ២០២០ បន្ទាប់ពីយើងបានធ្វើការកំណត់ទីតាំងរបស់ជនសង្ស័យខាងលើសម្ងំលាក់ខ្លួនហើយនោះ លោកវរសេនីយ៍ទោ នួន ស័ក្តិចំរើន រិទ្ធ បានដឹកនាំកម្លាំងផ្នែកនគរបាលយុត្តិធម៌ សហការ ជាមួយកម្លាំងព្រហ្មទណ្ឌ នៃស្នងការដ្ឋាននគរបាលខេត្តពោធិ៍សាត់ ដឹកនាំដោយលោកឧត្តមសេនីយ៍ត្រី ម៉ូ លីដា ស្នងការរងទទួលផែនការងារនគរបាលព្រហ្មទណ្ឌ ធ្វើការឃាត់ខ្លួនជនសង្ស័យខាងលើ នៅក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ និងយកមកស្នងការដ្ឋាននគរបាលខេត្តពោធិ៍សាត់ ដើម្បីធ្វើការសួរនាំ។
នៅចំពោះមុខសមត្ថកិច្ចជនសង្ស័យខាងលើបានឆ្លើយសារភាពថា ខ្លួនពិតជាបានវាយសម្លាប់ជនរងគ្រោះឈ្មោះញ៉ាង វណ្ណនី នឹងចបកាប់ ចំលលាដ៍ក្បាល ចំនួន២ដង នឹងវាយត្រូវដៃបណ្តាលឲ្យបាក់ចំនួន១ដង រួចអូសយកសពទៅកប់នៅផ្ទះខាងក្រោយផ្ទះពិតមែន។
ជនសង្ស័យត្រូវបាននគរបាលក្រុងសៀមរាប នាំខ្លួនមកក្រុងសៀមរាបវិញ នៅថ្ងៃទី១៧ខែសីហាឆ្នាំ២០២០នេះ ហើយនាំទៅកន្លែងកើតហេតុ និងបានធ្វើការហូតវត្ថុតាងបានមួយចំនួន រួចបញ្ជូនទៅតុលាការនៅថ្ងៃខែឆ្នាំដដែលនេះ និងត្រូវបានតុលាការសម្រេចឃុំខ្លួនតាមដីកាលេខ១០៦៦/២០២០ហើយផងដែរ៕
