អភិបាលរាជធានីបើកសម្ពោធ ដាក់ឲ្យប្រើប្រាស់អគារទីចាត់ការសាលាបឋមសិក្សាសន្ធរម៉ុក១ខ្នងជាផ្លូវការ
ភ្នំពេញ៖ អគារទីចាត់ការសាលាបឋមសិក្សាសន្ធរម៉ុកដែលមានបណ្តោយ២០ម៉ែត្រនិងទទឹង ១២ម៉ែត្រដំបូលប្រក់ក្បឿងដែលជាអំណោយរបស់លោកឃួង ស្រេង អភិបាលនៃគណៈអភិបាលរាជធានីភ្នំពេញនិងលោកស្រីជា ស៊ីណា ឃួងស្រេង ត្រូវបានបើកសម្ពោធដាក់ឲ្យប្រើប្រាស់ជាផ្លូវការនាព្រឹកថ្ងៃទី ០៦ ខែតុលាឆ្នាំ២០២០ ក្រោមអធិបតីភាព របស់លោកឃួងស្រេង និងលោកស្រីរួមជាមួយនឹងលោកគ្រូ អ្នកគ្រូអាជ្ញាធរមូលដ្ឋានជាច្រើននាក់ទៀត។
អាគារសាលាបឋមសិក្សាសន្ធរម៉ុក មានទីតាំងនៅតាមបណ្ដោយផ្លូវកម្ពុជាក្រោម ក្នុងសង្កាត់ទឹកល្អក់ទី១ខណ្ឌទួលគោក រាជធានីភ្នំពេញ។ អគារនេះជាអំណោយដ៏ថ្លៃថ្លារបស់លោកឃួង ស្រេង អភិបាលរាជធានីភ្នំពេញនិងលោកស្រី ។
នាយកសាលាបឋមសិក្សាសន្ធរម៉ុកបានបញ្ជាក់ឲ្យដឹងថា ដោយមើលឃើញអគារទីចាត់ការចាស់មួយខ្នង៤បន្ទប់ ដែលសាងសង់ដោសហគមន៍នៅឆ្នាំ១៩៨៥ មានសភាពចាស់ ទ្រុឌទ្រោមនិងតាមការស្នើសុំរបស់លោកគ្រូ អ្នកគ្រូសាលាបឋមសិក្សាសន្ធរម៉ុក លោក ឃួង ស្រេងអភិបាលរាជធានីលោកស្រី ដែលជាអតីតសិស្សសាលាសន្ធរម៉ុក ក្នុងទសវត្សរ៍ទី៨០–៩០ដែរនោះបានផ្តល់ទីចាត់ការមួយខ្នងដ៏ស្រស់ស្អាត ប្រកបដោយគុណភាពនិងផាសុខភាព ដែលមានបណ្ដោយ២០ ម៉ែត្រទទឹង១២ ម៉ែត្រ ដោយបានចាប់ផ្ដើមសាងសង់កាលពីថ្ងៃទី ០១ កុម្ភៈឆ្នាំ ២០២០ និងបានបញ្ចប់នៅថ្ងៃទី៣០ខែកក្កដាឆ្នាំ ២០២០ ព្រមទាំងមានបង្គន់អនាម័យចំនួនពីរ បំពាក់អំពូលភ្លើងកង្ហា ចាក់បេតុងជុំវិញអាគារ ដាក់ប្រព័ន្ធលូបង្ហូរទឹកទៅកាន់លូធំ មកកាត់បីទឹក ប្រវែង ៥០ ម៉ែត្រកៅអីអង្គុយ៤ចំនួន ១០ គ្រឿងនិងកៅអីអង្គុយបីនាក់ចំនួន៧គ្រឿង។
លោកឃួង ស្រេងបានមានប្រសាសន៍លើកឡើងថា វិស័យអប់រំ ពិតជាមានសារៈសំខាន់ខ្លាំងណាស់ ក្រោមការដឹកនាំរបស់សម្ដេចតេជោហ៊ុនសែននាយករដ្ឋមន្ត្រី ក្រោយឆ្នាំ១៩៧៩ ក្រោយពីបើកបវេសនកាល ពេលនោះសិស្សនិងលោកគ្រូបានទទួលរបបអង្ករនិងពោត ។ នេះជាទស្សនៈទាន វែងឆ្ងាយរបស់សម្ដេចតេជោនាយករដ្ឋមន្ត្រី ក្រោយពីសាលារៀនមានបរិមាណសិស្សកាន់តែច្រើនទើបមានការជ្រើសរើសយកគុណភាពសិស្ស ។
លោកបញ្ជាក់ថា បើគ្មានបរិមាណគឺពិតជាគ្មានការជ្រើសរើសយកគុណភាពនោះដែរ ។ រដ្ឋបាលរាជធានីភ្នំពេញកន្លងមកតែងតែយកចិត្តទុកដាក់យ៉ាងខ្លាំងទៅលើវិស័យអប់រំនេះ ដោយបានឧបត្ថម្ភគាំទ្រជាមួយនឹងការកសាងសាលារៀនជាច្រើនបន្តបន្ទាប់ផងដែរ៕