ប្រមុខការទូត រំលឹកជាថ្មីម្តងទៀតអំពីការគាំទ្រយ៉ាង ពេញទំហឹងរបស់កម្ពុជា ចំពោះតួនាទីដ៏សំខាន់របស់អង្គការសហប្រជាជាតិ
ភ្នំពេញ៖ នៅល្ងាចថ្ងៃទី២១ ខែតុលា ឆ្នាំ២០២០ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិ (AUMM) តាមប្រព័ន្ធវីដេអូ។
ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានា លទ្ធផលកិច្ចប្រជុំរដ្ឋមន្ត្រីការបរទេសអាស៊ន -អង្គការសហប្រជាជាតិ ថ្ងៃទី២១ ខែតុលា ឆ្នាំ២០២០។
នៅថ្ងៃទី២១ ខែ តុលា ឆ្នាំ ២០២០ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រី ការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំ រដ្ឋមន្ត្រីការបរទេសអាស៊ាន -អង្គការសហប្រជាជាតិ តាមរយៈប្រព័ន្ធវីដេអូ។ ឯកឧត្តមឧបនាយករដ្ឋមន្ត្រី រដ្ឋមន្ត្រីការបរទេសនៃសាធារណរដ្ឋសង្គមនិយមវៀតណាម បានធ្វើជាប្រធានដឹកនាំកិច្ចប្រជុំនេះ ដោយមានការចូលរួមពីរដ្ឋមន្ត្រីការបរទេសអាស៊ាន អគ្គលេខាធិការអាស៊ាន អគ្គលេខាធិការអង្គការ ។ សហប្រជាជាតិ និងប្រធានសម័យប្រជុំលើកទី៧៥ នៃមហាសន្និបាតអង្គការសហប្រជាជាតិ (UNCA) កិច្ចប្រជុំ បានចែករំលែកសារអបអរសាទរចំពោះខួប៧៥ឆ្នាំ នៃការបង្កើតអង្គការសហប្រជាជាតិ និងបានកោតសរសើរចំពោះសមិទ្ធផលដ៏ធំធេងដែលអង្គការសហប្រជាជាតិសម្រេចបានក្នុង រយៈពេល ៧ទសវត្សរ៍កន្លងមក ជាពិសេស ក្នុងការថែរក្សាសន្តិភាព និងបន្តការអភិវឌ្ឍប្រកបដោយចីរភាព។ ដោយប្រឈមជាមួយនឹងបញ្ហាមិនធ្លាប់មានពីមុនដែលបណ្តាលមកពីការរាតត្បាតជាសកល នៃជំងឺកូវីដ-១៩ កិច្ចប្រជុំបានទទួលស្គាល់កិច្ចខិតខំប្រឹងប្រែងរួមរបស់អាស៊ាន និងអង្គការសហប្រជាជាតិ និងការប្តេជ្ញាចិត្តខ្ពស់ក្នុងការលើកស្ទួយពហុភាគីនិយម និងតំបន់និយម ព្រមទាំងបានសង្កត់ធ្ងន់លើសារសំខាន់នៃការពង្រឹងកិច្ចសហប្រតិបត្តិការអន្តរជាតិ ក្នុងការដោះស្រាយផលប៉ះពាល់យ៉ាងធ្ងន់ធ្ងរនៃជំងឺកូវីដ-១៩ និងរិះរកមធ្យោបាយរួមគ្នាក្នុងការស្តារសេដ្ឋកិច្ច
-សង្គមឡើងវិញក្រោយវិបត្តិនៃជំងឺនេះ។
កិច្ចប្រជុំបានកត់សម្គាល់ការអនុវត្តប្រកបដោយជោគជ័យនៃផែនការសកម្មភាពអាស៊ាន – អង្គការសហប្រជាជាតិ (២០១៦-២០២០) និងបានអនុម័តផែនការសកម្មភាពថ្មីសម្រាប់ឆ្នាំ២០២១ ២០២៥។ កិច្ចប្រជុំនេះ បានអះអាងជាថ្មីម្តងទៀតនូវកិច្ចខិតខំប្រឹងប្រែងរួមរវាងអាស៊ាននិងអង្គការ សហប្រជាជាតិ ក្នុងការធ្វើឱ្យសម្រេចបាននូវចក្ខុវិស័យសហគមន៍អាស៊ានឆ្នាំ២០២៥ និងរបៀបវារៈសម្រាប់ការអភិវឌ្ឍប្រកបដោយចីរភាពឆ្នាំ២០៣០។
ថ្លែងនៅក្នុងកិច្ចប្រជុំ ឯកឧត្តមឧបនាយករដ្ឋមន្ត្រី បានរំលឹកជាថ្មីម្តងទៀតអំពីការគាំទ្រយ៉ាង ពេញទំហឹងរបស់កម្ពុជា ចំពោះតួនាទីដ៏សំខាន់របស់អង្គការសហប្រជាជាតិក្នុងការដឹកនាំកិច្ចខិតខំ ប្រឹងប្រែងរួមដើម្បីលើកស្ទួយពហុភាគីនិយម ឲ្យក្លាយជាសរសរស្តម្ភសម្រាប់សន្តិភាព សន្តិសុខ និង វិបុលភាព។ ក្នុងរបៀបវារៈស្តីពីសន្តិភាព ឯកឧត្តមឧបនាយករដ្ឋមន្ត្រី បានរំលឹកឡើងវិញនូវការគាំទ្រ យ៉ាងមុតមាំរបស់អាស៊ានចំពោះគំនិតផ្តួចផ្តើមរបស់ឯកឧត្តមអគ្គលេខាធិការ ស្ដីពីសកម្មភាពសម្រាប់ថែរក្សាសន្តិភាព(A4P) ។ ដើម្បីអបអរសាទរខួប២០ឆ្នាំនៃសេចក្តីសម្រេចលេខ ១៣២៥ របស់ក្រុមប្រឹក្សាសន្តិសុខអង្គការសហប្រជាជាតិ ស្តីពីរបៀបវារៈស្ត្រី សន្តិភាព និងសន្តិសុខ (WPS) ឯកឧត្តមឧបនាយករដ្ឋមន្ត្រី បានគូសបញ្ជាក់អំពីការរួមចំណែករបស់កម្ពុជានៅក្នុងកិច្ចខិតខំប្រឹងប្រែងជាអន្តរជាតិនេះ តាមរយៈការបង្កើនការចូលរួមរបស់ស្ត្រីកម្ពុជាក្នុងសកម្មភាពមនុស្សធម៌ និងប្រតិបត្តិការថែរក្សាសន្តិភាពនៅតាមតំបន់មួយចំនួននៅលើពីភពលោក បើទោះបីជាមានការគំរាមកំហែងដោយសារការរីករាលដាលនៃជំងឺរាតត្បាតកូវីដ -១៩ ក្តី។ ឯកឧត្តមឧបនាយករដ្ឋមន្ត្រី ក៏បានលើកឡើងអំពីសកម្មភាពដោះមីនដើម្បីមនុស្សធម៌ ដែលឯកឧត្តមជឿជាក់ថា អាស៊ាន និងអង្គការសហប្រជាជាតិ អាចបង្កើនកិច្ចសហប្រតិបត្តិការបន្ថែមទៀត និងបានលើកទឹកចិត្តឱ្យអង្គការសហប្រជាជាតិ ពិចារណាផ្តល់ការគាំទ្រដល់មជ្ឈមណ្ឌលតំបន់ អាស៊ានសម្រាប់សកម្មភាពមីន(ARMAC) ដើម្បីដោះស្រាយក្នុងទិដ្ឋភាពមនុស្សធម៌ ចំពោះបញ្ហាគ្រាប់មីន និងសំណល់ជាតិផ្ទុះដទៃទៀត នៅក្នុងតំបន់និងលើពិភពលោក ៕
