ផ្លូវលេខ៩០ ដែលរងដែលរងខូចខាតដោយជំនន់ទឹកភ្លៀងនៅក្នុងខណ្ឌដូនពេញ បានទទួលការជួសជុល និងអ៊ុតកៅស៊ូឡើងវិញ
ភ្នំពេញ៖ ប្រជាពលរដ្ឋនៅខណ្ឌដូនពេញបានថ្លែងអំណរគុណយ៉ាងជ្រាលជ្រៅ ចំពោះលោក ឃួង ស្រេង អភិបាលរាជធានីភ្នំពេញដែលបានជួសជុល និងអ៊ុតកៅស៊ូផ្លូវលេខ៩០ ដើម្បីសម្រួលចរាចរអោយពួកគាត់បានធ្វើដំណើរងាយស្រួល ហើយការជួសជុលកំណាត់ផ្លូវមួយខ្សែនេះជាកញ្ចប់ថវិការបស់រដ្ឋបាលរាជធានីភ្នំពេញទាំងស្រុង ។
មន្ត្រីរដ្ឋបាលខណ្ឌដូនពេញបានឱ្យដឹងថា នៅថ្ងៃទី១៤ ខែធ្នូ ឆ្នាំ២០២០នេះ អភិបាលខណ្ឌដូនពេញ លោក សុខ ពេញវុធ បានចុះត្រួតពិនិត្យការដ្ឋានជួសជុល អ៊ុតកៅស៊ូ ប្រភេទAC កម្រាស់ ០.៥សង់ទីមែត្រ នៅបណ្តោយផ្លូវលេខ៩០ ចន្លោះពីតីរវិថីព្រះស៊ីសុវត្ថិ ដល់ផ្លូវលេខ៤៧ មានប្រវែង ២៧០ម៉ែត្រ ដែលជាកញ្ជប់ថវិការបស់រដ្ឋបាលរាជធានីភ្នំពេញទាំងស្រុង ។
អភិបាលខណ្ឌដូនពេញ ក្នុងនាមប្រជាពលរដ្ឋ ក៏ដូចជាមន្ត្រីរាជការខណ្ឌ-សង្កាត់ សូមថ្លែង អំណរគុណដ៏ជ្រាលជ្រៅបំផុត ជូនចំពោះលោក ឃួង ស្រេង អភិបាលរាជធានីភ្នំពេញ ដែលលោកតែងតែយកចិត្តទុកដាក់អំពីការងារអភិវឌ្ឍន៍មូលដ្ឋាន ក្នុងគោលបំណងលើកកំពស់ជីវភាព និងការរស់នៅរបស់ប្រជាពលរដ្ឋឲ្យកាន់តែល្អប្រសើរ ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ ធ្លាប់បានឱ្យថា ក្រោយ
ពីជំនន់ទឹកភ្លៀងនៅរាជធានីភ្នំពេញ បានស្រកជាបណ្តេីរៗនោះ ផ្លូវចំនួន២៩ខ្សែក្នុងភូមិសាស្ត្ររាជធានីភ្នំពេញ បានទទួលរងនូវការខូចខាតដោយសារជំនន់ទឹកភ្លៀង ដែលរដ្ឋបាលរាជធានីភ្នំពេញ បាននិងកំពុងដំណើរការស្តារ និងជួសជុលឡេីងវិញ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ៕