ក្រុមប្រឹក្សាធម្មនុញ្ញបានតម្កល់សេចក្តីសម្រេចរបស់ គ.ជ.ប ទុកជាបានការពេញទាំងមូល
ភ្នំពេញ៖ គណៈកម្មាធិការជាតិរៀបចំការបោះឆ្នោត អ្នកនាំពាក្យ គ.ជ.ប នៅថ្ងៃទី២៥ខែធ្នូ ឆ្នាំ២០២០ បានចេញ សេចក្តីប្រកាសព័ត៌មានថា ក្រុមប្រឹក្សាធម្មនុញ្ញបានតម្កល់សេចក្តីសម្រេចរបស់ គ.ជ.ប ទុកជាបានការពេញទាំងមូល។
នៅថ្ងៃនេះទី២៥ ខែធ្នូ ឆ្នាំ២០២០ គណៈកម្មាធិការជាតិរៀបចំការបោះឆ្នោត (គ.ជ.ប) បានទទួល លិខិតពីក្រុមប្រឹក្សាធម្មនុញ្ញដោយជូនដំណឹងថា បណ្តឹងចំនួន ៩៥ របស់គណបក្សសម្ព័ន្ធដើម្បីប្រជាធិបតេយ្យ ដែលប្តឹងតវ៉ានឹងសេចក្តីសម្រេចរបស់ គ.ជ.ប ដោយសុំលុបឈ្មោះប្រជាពលរដ្ឋចេញពីបញ្ជីបោះឆ្នោតដំបូង ត្រូវបានដោះស្រាយរួចរាល់ជាស្ថាពរនៅថ្ងៃដដែលនេះ ដោយតម្កល់សេចក្តីសម្រេចរបស់ គ.ជ.ប ទុកជាបានការពេញទាំងមូល។
ឯកឧត្តម សោម សូរីដា អគ្គលេខាធិការរង គ. ជ .ប តំណាង គ .ជ . ប ១រូប ដែលបានចូលរួមឆ្លើយបំភ្លឺ ក្នុងសវនាការនៃក្រុមប្រឹក្សាជំនុំជម្រះនៃក្រុមប្រឹក្សាធម្មនុញ្ញបានមានប្រសាសន៍ថាការចេញសេចក្តីសម្រេច របស់ក្រុមប្រឹក្សាធម្មនុញ្ញដែលបានតម្កល់សេចក្តីសម្រេចរបស់ គ .ជ .ប ទុកជាបានការពេញទាំងមូលនេះ មានន័យថារាល់សេចក្តីសម្រេចរបស់ គ.ជ.ប ទាក់ទងនឹងបណ្ដឹងពាក់ព័ន្ធនឹងបញ្ជីបោះឆ្នោតដំបូង គឺជា សេចក្តីសម្រេចត្រឹមត្រូវតាមទម្រង់ និងគតិច្បាប់។
ទន្ទឹមនឹងនេះ ក្រុមការងារ គ.ជ.ប ដឹកនាំដោយឯកឧត្តម ហ៊ីង ធីឬទ្ធិ សមាជិក គ.ជ.ប បានចូលរួម បំភ្លឺនៅគ្រប់ដំណាក់កាលនៃការកោះហៅរបស់ក្រុមប្រឹក្សាធម្មនុញ្ញ។ ការសម្រេចរបស់ក្រុមប្រឹក្សាធម្មនុញ្ញនេះ នាំឱ្យ គ.ជ.ប មានពេលវេលាគ្រប់គ្រាន់ដើម្បីរៀបចំផ្តល់សុពលភាពលើបញ្ជីបោះឆ្នោត ឆ្នាំ២០២០ និងផ្សព្វផ្សាយជាផ្លូវការ។
បញ្ជីបោះឆ្នោតផ្លូវការនឹងត្រូវផ្សព្វផ្សាយនៅថ្ងៃទី៣១ ខែធ្នូ ឆ្នាំ២០២០ វេលាម៉ោង១០ព្រឹក ហើយគ .ជ. ប នឹងអញ្ជើញភាគីពាក់ព័ន្ធចូលរួមជាសាក្សី នៃការផ្សព្វផ្សាយបញ្ជីបោះឆ្នោតផ្លូវការនេះ។
សូមបញ្ជាក់ថា បើតាមសេចក្តីប្រកាសព័ត៌មាន អគ្គលេខាធិការនៃក្រុមប្រឹក្សាធម្មនុញ្ញ មានកិត្តិយសសូមជម្រាបជូនសាធារណជន ជ្រាបថា នៅថ្ងៃទី២៥ ខែធ្នូ ឆ្នាំ២០២០ ក្រុមប្រឹក្សាធម្មនុញ្ញបានបិទបញ្ចប់នូវសំណុំរឿង ចំនួន ៩៥បណ្តឹង របស់គណបក្សសម្ព័ន្ធដើម្បីប្រជាធិបតេយ្យ ប្តឹងតវ៉ានឹងសេចក្តីសម្រេច របស់គណៈកម្មាធិការជាតិរៀបចំការបោះឆ្នោត ដោយសុំលុបឈ្មោះប្រជាពលរដ្ឋចំនួន ២៧៣៣នាក់ ចេញពីបញ្ជីបោះឆ្នោតដំបូង។ បណ្ដឹងទាំង ៩៥នេះ បានសម្រេចនៅក្នុង សវនាការជាសាធារណៈ នៅថ្ងៃទី២១ ខែធ្នូ ឆ្នាំ២០២០(២៨បណ្តឹង) ថ្ងៃទី២៣ ខែធ្នូ ឆ្នាំ ២០២០ (២៣បណ្តឹង) និងនៅថ្ងៃទី២៥ ខែធ្នូ ឆ្នាំ២០២០(៤៤បណ្ដឹង)។
ក្រុមប្រឹក្សាជំនុំជម្រះនៃក្រុមប្រឹក្សាធម្មនុញ្ញ បានសម្រេចតម្កល់សេចក្តីម្រេចរបស់ គណៈកម្មាធិការជាតិរៀបចំការបោះឆ្នោតចំនួន ២៨បណ្តឹង និងសម្រេចច្រានចោលបណ្តឹង ចំនួន ៦៧បណ្តឹង (ដោយមូលហេតុ ដើមបណ្តឹងបោះបង់បងដោយអវត្តមាននៅពេលសវនាការ)។
សេចក្តីសម្រេចរបស់ក្រុមប្រឹក្សាធម្មនុញ្ញ ជាសេចក្តីសម្រេចស្ថាពរ បិទផ្លូវតវ៉ា ហើយមានអានុភាពអនុវត្តទៅលើអំណាចទាំងអស់ដែលមានចែងក្នុងរដ្ឋធម្មនុញ្ញ និងត្រូវចុះផ្សាយ ក្នុងរាជកិច្ច៕
