គូភាគី ២ ក្រុមដែលត្រូវជាបងប្អូនជីដូននឹងគ្នា បង្កហិង្សាទៅវិញទៅមកលើដងផ្លូវផ្អើលហ្វេសប៊ុក សមត្ថកិច្ចបានកសាងសំណុំរឿងបញ្ជូនគូភាគីទាំង២ទៅតុលាការ
កំពត៖ ស្នងការដ្ឋាននគរបាលខេត្តកំពត ពិនិត្យឃើញមានការចុះផ្សាយរបស់សារព័ត៌មានមួយចំនួន និងគណនីហ្វេសប៊ុក កាលពីថ្ងៃទី៩ ខែមករា ឆ្នាំ២០២១ ចំណងជើងថា «សំណូមពរដល់សមត្ថកិច្ចជួយវែកមុខជនបង្កផង ព្រោះថាជនដៃដល់នៅមានសេរីភាពនៅឡើយ» ។
ស្នងការដ្ឋាននគរបាលខេត្តកំពត បានបញ្ជាក់ដូចខាងក្រោម ៖ កាលពីថ្ងៃទី៦ ខែមករា ឆ្នាំ ២០២១ វេលាម៉ោង ១៣ និង ៥០ នាទី មានករណីហិង្សាទៅវិញទៅមក ស្ថិតនៅភូមិឫស្សីស្រុក ឃុំប្ញស្សីស្រុកខាងកើត ស្រុកកំពង់ត្រាច រវាងគូភាគី ២ ក្រុមដែលត្រូវជាបងប្អូនជីដូននឹងគ្នា ដែលមានផ្ទះគម្លាតពីគ្នា ៦០ម៉ែត្រ ហើយភាគីទាំង២ក៏ធ្លាប់មានទំនាស់ពាក្យសម្តីគ្នាពីមុនមកដែរ ប៉ុន្តែពុំធ្លាប់ប្រើប្រាស់អំពើហិង្សាដាក់គ្នាដូចពេលនេះឡើយ។
ករណីខាងលើនេះកើតឡើងដោយគូភាគីទី ១ (មានគ្នាចំនួន ៣ នាក់ : ឪពុក និងកូនប្រុស ២ នាក់) បានជិះម៉ូតូតាមផ្លូវលំក្រួសក្រហមឆ្លងកាត់មុខផ្ទះភាគីទី ២ (មានគ្នាចំនួន ២ នាក់ : ឪពុក និងកូនប្រុស) ហើយបានមួលរោទ៍ម៉ូតូសំឡេងខ្លាំងៗ ធ្វើឲ្យភាគីទី ២ ខឹងក៏បានយកកាំបិតលៀមមកដេញកាប់លើភាគីទី ១ ឃើញដូច្នេះភាគីទី ១ ក៏បានផ្តួលម៉ូតូចោលរួចរើសបានដំបង រួចប្រើហិង្សាទៅវិញទៅមក បណ្តាលឲ្យភាគីទាំងសង្ខាងរបួសធ្ងន់ រួមទាំងក្មួយប្រុសនៃគូភាគីទាំងពីរដែលចេញមកឃាត់នោះក៏រងរបួសខ្លាំងផងដែរ។ បច្ចុប្បន្ន ភាគីទាំងពីររងបួសធ្ងន់កំពុងសម្រាកព្យាបាលនៅមន្ទីរពេទ្យ ។
ជុំវិញករណីនេះ សមត្ថកិច្ចបានកសាងសំណុំរឿងបញ្ជូនគូភាគីទាំងពីរទៅតុលាការ ដើម្បីអនុវត្តតាមនីតិវិធី៕
