ក្រុមប្រឹក្សាជំនុំជម្រះបដិសេធ នឹងសំណើរបស់សហមេធាវីការពារសិទ្ធិជនជាប់ចោទលោកកឹម សុខា ស្នើសុំបន្តសវនាការឡើងវិញ
ភ្នំពេញ ៖ ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោកកូយ សៅ បានជម្រាបមកសហមេធាវីការពារសិទ្ធិជនជាប់ចោទ ឈ្មោះ កឹម សុខា ក្នុងកម្មវត្ថុករណីស្នើសុំបន្តសវនាការឡើងវិញ របស់សហមេធាវីការពារសិទ្ធិឲ្យជនជាប់ចោទ ។
យោងតាម សំណុំរឿងព្រហ្មទណ្ឌលេខ ៥៦៤២-១ ចុះថ្ងៃទី០៣ ខែកញ្ញា ឆ្នាំ២០១៧ និងពាក្យសុំបន្តសវនាការ ចុះថ្ងៃទី២២ ខែមករា ឆ្នាំ២០២១ របស់សហមេធាវីការពារសិទ្ធិឲ្យជនជាប់ចោទ ។
តបតាមកម្មវត្ថុ និងយោងខាងលើ ក្នុមប្រឹក្សាជំនុំជម្រះ សូមជម្រាបជូនសហមេធាវីការពារសិទ្ធិឲ្យជនជាប់ចោទ ឲ្យបានជ្រាបថា បន្ទាប់ពីក្រុមប្រឹក្សាជំនុំជម្រះ ពិនិត្យនូវសំណើសុំបន្តសវនាការនេះ ក្រុមប្រឹក្សាជំនុំជម្រះ យល់ឃើញថា សវនាការមិនទាន់អាចបន្តដាក់កម្មវិធីនាពេលនេះបាននៅឡើយទេ ដោយមូលហេតុថា ការចម្លងរីករាលដាលនៃមេរោគកូវីដ១៩ (COVID-I9) នៅតែមានស្ថានភាពធ្ងន់ធ្ងរជាសកល និងមិនច្បាស់លាស់នៅឡើយ។
ម្យ៉ាងទៀតដោយហេតុថា សាលាដំបូងរាជធានីភ្នំពេញ ក៏កំពុងតែមមាញឹកនៅក្នុងចំណាត់ការសំណុំរឿងព្រហ្មទណ្ឌ
ដែលមានជនត្រូវចោទ ឬ ជនជាប់ចោទកំពុងជាប់ឃុំ យ៉ាងចង្អៀតក្នុងពន្ធនាគារ ដែលករណីនេះ ជាបញ្ហាប្រឈម ដែលត្រូវចូលរួមឱ្យបានសកម្មនៅក្នុងយុទ្ធនាការនៃការដោះស្រាយសំណុំរឿងកកស្ទះ ដែលត្រូវបានដាក់ចេញដោយក្រសួងយុត្តិធម៌ នាពេលកន្លងមកថ្មីៗនេះ។
ស្របពេលជាមួយនេះដែរ ក្រុមប្រឹក្សាជំនុំជម្រះ ក៏ពិនិត្យនិងពិចារណានូវគ្រប់ទិដ្ឋភាពទាំងអស់ ដើម្បីអាចមាន លទ្ធភាពបន្តសវនាការឡើងវិញ នាពេលវេលាសមស្របខាងមុខនេះ ដើម្បីធានានូវសិទ្ធិ និងផលប្រយោជន៍របស់ភាគីពាក់ព័ន្ធ ស្របតាមនីតិវិធីច្បាប់។
លោក កឹម សុខា ត្រូវសមត្ថកិច្ចចាប់ខ្លួន និងឃុំដាក់ពន្ធនាគារ និងបន្តឃុំខ្លួនក្នុងផ្ទះ ពីបទទោសក្បត់ជាតិ កាលពីឆ្នាំ២០១៧ ប៉ុន្តែកាលពីចុងឆ្នាំ២០១៩ តុលាការបានបន្ធូរបន្ថយការត្រួតពិនិត្យតាមផ្លូវតុលាការ ដោយអនុញ្ញាតធ្វើដំណើរក្នុងប្រទេស តែហាមឃាត់ធ្វើសកម្មភាពនយោបាយ។ ទោះយ៉ាងណាប្រធានគណបក្សប្រឆាំងរូបនេះ បានធ្វើសកម្មភាពចេញតាមបណ្ដាខេត្តញឹកញាប់ ក្នុងឆ្នាំ២០២០។ ទន្ទឹមគ្នានោះដែរ សាលាដំបូងរាជធានីភ្នំពេញ បានចេញលិខិតព្រមានថា សកម្មភាពចុះតាមបណ្តាខេត្តនានារបស់លោក កឹម សុខា អាចនឹងឈានទៅហួសព្រំដែនដែលតុលាការបានកំណត់។ ទោះមានការព្រមានបែបនេះក្តី ប៉ុន្តែលោក កឹម សុខា នៅតែបន្តធ្វើសកម្មភាពដដែលរហូតមកដល់ពេលនេះ ហាក់ផ្គើននឹងសាលាដំបូងរាជធានីភ្នំពេញ ៕
