មន្ដ្រីជាន់ខ្ពស់ ក្រសួងសង្គមកិច្ច គាំទ្រជានិច្ចចំពោះវត្ដមាន របស់គណៈ កម្មាធិការ សិទ្ធិមនុស្ស នៃរដ្ឋាភិបាលអូស្ត្រាលីលើសេចក្តីព្រាងច្បាប់ថ្មីសម្រាប់វិស័យពិការភាពនៅកម្ពុជា
ភ្នំពេញ៖ ក្នុងជំនួបពិភាក្សាការងារជាមួយលេខាទី១នៃស្ថានទូតអូស្ត្រាលីប្រចាំនៅព្រះរាជាណាចក្រកម្ពុជា លោកស្រី សារ៉ា វ៉ាដលី នៅព្រឹកថ្ងៃទី០១ ខែមីនា ឆ្នាំ២០២១ នៅទីស្តីការក្រសួង លោករដ្ឋលេខាធិការ និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានស្វាគមន៍ចំពោះការផ្តល់ធាតុចូលរបស់គណៈកម្មាធិការសិទ្ធិមនុស្សនៃរដ្ឋាភិបាលអូស្ត្រាលី និងស្ថាប័ន DID (Disability Inclusive Develop ment Helpdesk) ដើម្បីឱ្យសេចក្តីព្រាងច្បាប់ថ្មីសម្រាប់វិស័យពិការភាពមានភាពស៊ីសង្វាក់គ្នាទៅនឹងអនុសញ្ញាស្តីពីសិទ្ធិជនមានពិការភាព។
លោក ឯម ច័ន្ទមករា បានចាត់ទុកការផ្តល់ធាតុចូលរបស់គណៈកម្មាធិការសិទ្ធិមនុស្សនៃរដ្ឋាភិបាលអូស្ត្រាលី លើកសេចក្តីព្រាងច្បាប់ថ្មីនៃវិស័យពិការភាពនេះ គឺជាការចូលរួមចំណែកមួយដ៏សំខាន់ ដើម្បីធ្វើឱ្យសេចក្តីព្រាងច្បាប់នេះមានធាតុចូលគ្រប់ជ្រុង ជ្រោយ ដែលនឹងផ្តល់ផលប្រយោជន៍កាន់តែច្រើនឡើងដល់ជនមានពិការភាពនៅកម្ពុជា។
លោកស្រី សារ៉ា វ៉ាដលី លេខាទី១នៃស្ថានទូតអូស្ត្រាលីប្រចាំនៅព្រះរាជាណាចក្រកម្ពុជាបានធ្វើការវាយតម្លៃខ្ពស់ចំពោះវឌ្ឍនភាពថ្មីៗនៃវិស័យពិការភាពដែលរាជរដ្ឋាភិបាលកម្ពុជាសម្រេចបាន។ លេខាទូតទី ១ លោកស្រី សារ៉ា បានបង្ហាញជំហរថារដ្ឋាភិ បាលអូស្ត្រាលីនឹងបន្តជួយដល់គម្រោងលើកកម្ពស់សិទ្ធិជនមានពិការភាពនៅកម្ពុជារយៈពេល ២ឆ្នាំបន្តទៀតពីខែកក្កដា ឆ្នាំ២០២១- ខែមិថុនា ឆ្នាំ២០២៣
លោកស្រី សារ៉ា លេខាទី១ បានបញ្ជាក់ទៀតថា គណៈកម្មាធិការសិទ្ធិមនុស្សនៃរដ្ឋាភិបាលអូស្ត្រាលី តាមរយៈស្ថានទូតអូស្ត្រាលីប្រចាំនៅកម្ពុជា រីករាយបន្តគាំទ្រដល់ការអនុវត្តច្បាប់ថ្មីនេះនៅពេលអនាគត។
លោកស្រី សារ៉ា វ៉ាដលី បានគូសបញ្ជាក់បន្ថែមអំពីការគាំទ្ររបស់រដ្ឋាភិបាលអូស្ត្រាលី ដល់ព្រះរាជាណាចក្រកម្ពុជាតាមរយៈក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាល ក្នុងការផ្គត់ផ្គង់វ៉ាក់សាំងកូវីដ-១៩ ដែលគិតជាទឹកប្រាក់សរុប ចំនួន២៧លាន ជាដុល្លារអាមេរិក។
លោក ឯម ច័ន្ទមករា បានកោតសរសើរដល់ការគាំទ្រដោយផ្ទាល់ពីស្ថានទូតអូស្ត្រាលី តាមរយៈកម្មវិធីACCESS ដល់វិស័យពិការភាពនៅកម្ពុជា។ លោក ឯម ច័ន្ទមករា បានបញ្ជាក់ទៀតថាក្នុងជាអ្នកទទួលបន្ទុកក្នុងវិស័យពិការភាពនៅកម្ពុជា លោកសូមស្វាគមន៍ចំពោះអនុសាសន៍បន្ថែមទៀត ដើម្បីពង្រឹងវិស័យពិការភាពកាន់តែមានភាពប្រសើរឡើង។
សូមបញ្ជាក់ថា សេចក្តីព្រាងច្បាប់ថ្មីស្តីពីកិច្ចគាំពារជនមានពិការភាព គឺជាច្បាប់ពិសេសមួយទៀតក្នុងវិស័យពិការភាពត្រូវបានបើកឱ្យមានការផ្តល់មតិយោបល់យ៉ាងទូលាយគ្រប់កម្រិតទាំងនៅថ្នាក់ជាតិនិងថ្នាក់ក្រោមជាតិ ពិសេសការចូលរួមផ្តល់មតិធាតុចូលពីសំណាក់ជនមានពិការភាពផងដែរ៕. សំរិត
