អបអរសាទរទិវាវប្បធម៌ជាតិ ៣មីនា
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី អំពាវនាវ ឱ្យកូនខ្មែរគ្រប់ៗរូប ជាពិសេសយុវជនត្រូវ ខិតខំថែរក្សានិងការពារនូវ អ្វីៗទាំងអស់ដែលជាព្រលឹងជាតិនិងអត្តសញ្ញាណជាតិ សម្រាប់ជាមរតកយូរអង្វែងតទៅដល់ កូនខ្មែរជំនាន់ក្រោយ ហើយក៏សូមចូលរួមទាំងអស់គ្នាប្រយុទ្ធប្រឆាំងនឹងជំងឺឆ្លងកូវីដ ១៩ ដើម្បីរក្សាការពារកម្ពុជា ព្រះរាជាណាចក្រវប្បធម៌និងអច្ឆ័យៈ ឱ្យរុងរឿងជានិរន្តរតរៀងទៅ។
បើតាមសារលិខិតសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអបអរសាទរទិវាវប្បធម៌ជាតិ ៣មីនា លើកទី២៣ ឆ្នាំ២០២១បានឲ្យដឹងថា ថ្ងៃនេះ ក្នុងនាមរាជរដ្ឋាភិបាលកម្ពុជានិងខ្លួនខ្ញុំផ្ទាល់ ទូលព្រះបង្គំ ខ្ញុំព្រះករុណា ខ្ញុំមានសេចក្តីសោមន្សរីករាយ សូមផ្ញើសារនេះជូនដល់បងប្អូនជនរួមជាតិទាំងអស់ ជាពិសេស សិល្បករ សិល្បកាវិនី សិប្បករ និងអ្នកជំនាញនានានៅក្នុង វិស័យសិល្បៈ ព្រមទាំងក្មួយៗជាយុវជន ចូលរួមអបអរសាទរទិវាវប្បធម៌ជាតិ៣មីនា លើកទី២៣ ឆ្នាំ២០២១” ក្រោមប្រធានបទ “យុវជនដើម្បីវប្បធម៌ជាតិ” ។ ទិវាវប្បធម៌នេះត្រូវបានប្រារព្ធធ្វើឡើងនៅថ្ងៃទី៣មីនា ជារៀងរាល់ឆ្នាំ ប៉ុន្តែខ្ញុំក៏សូម ការអធ្យាស្រ័យ ដោយសារ ឆ្នាំ២០២១នេះ យើងមិនអាចរៀបចំការជួបជុំដូចសព្វមួយដង ដោយសារការរីករាលដាលជា សកលនៃជំងឺកូវីដ១៩ ដែលកំពុងគំរាមកំហែងដល់សុខភាពសាធារណៈ សេចក្តីសុខ និងអាយុជីវិតរបស់ប្រជាជនកម្ពុជា ក៏ដូចជាប្រជាជននានាទូទាំងសកលលោក។
ឆ្នាំនេះ គឺជាឆ្នាំទី៤ដែលត្រូវរៀបចំពិធីជំនួបរវាងប្រមុខរាជរដ្ឋាភិបាលជាមួយសិល្បករ សិល្បការិនី សិប្បករ និង អ្នកមានអាជីពក្នុងវិស័យវប្បធម៌ប្រមាណ៤០០០នាក់ ដែលជាការជួបជុំដ៏ធំប្រចាំឆ្នាំ ក្នុងគោលបំណងរម្លឹកនូវគុណូបការៈ នៃបុព្វបុរសខ្មែរ ដែលបានបន្សល់ទុកនូវស្នាដៃអច្ឆរិយៈដ៏ធំមហិមាសម្រាប់ប្រជាជាតិខ្មែរ ក៏ដូចជាមនុស្សជាតិនានាលើ សកលលោក និងដើម្បីពង្រឹងនូវសាមគ្គីភាព ភាតរភាព ការស្គាល់និងជួយគ្នាទៅវិញទៅមក រវាងអ្នកមានអាជីពគ្រប់ៗគ្នាក្នុង វិស័យសិល្បៈ ក្រោមម្លប់សុខសន្តិភាពនិងការអភិវឌ្ឍប្រកបដោយចីរភាពយូរអង្វែង ដែលជាផ្លែផ្កានៃនយោបាយ ឈ្នះ ឈ្នះ ជាង២០ឆ្នាំកន្លងមក។
រយៈពេលជិត១ឆ្នាំមកនេះ ការរីករាលដាលនៃវីរុសកូវីដ១៩ រួមទាំងការបំប្លែងខ្លួនជាវីរុសប្រភេទថ្មីផងនោះ បាន និងកំពុងរាតត្បាតជាបន្តបន្ទាប់និងជះឥទ្ធិពលអវិជ្ជមានមកលើសង្គមនិងសេដ្ឋកិច្ច នៅតាមបណ្តាប្រទេសនានាក្នុង ពិភពលោក ក្នុងតំបន់ និងក្នុងប្រទេសកម្ពុជាយើង ដែលក្នុងនោះរួមមានទាំងវិស័យវប្បធម៌ផងដែរ។ ដោយសារការរីករាលដាល នៃជំងឺកូវដ១៩ សារមន្ទីរ រោងភាពយន្ត និងរោងសម្តែងសិល្បៈនៅទូទាំងប្រទេស បានតម្រូវឱ្យបិទទ្វារបណ្តោះអាសន្ន ជាច្រើនលើក រីឯវិស័យឯកជនដែលធ្វើអាជីវកម្មនៅក្នុងផ្នែកសិល្បៈវប្បធម៌ រួមមានក្រុមហ៊ុន ក្រុមតន្ត្រី និងក្រុមសិល្បៈ ទាំងអាជីពនិងមហាជន ដែលពឹងផ្អែកលើភ្ញៀវទេសចរជាតិនិងអន្តរជាតិ ជាពិសេសពិធីដែលជាតម្រូវការផ្នែកសិល្បៈវប្បធម៌ ដូចជាពិធីរៀបអាពាហ៍ពិពាហ៍របស់បងប្អូនប្រជាជនយើងក៏ត្រូវបានផ្អាក ឬរឹតត្បិតលក្ខខណ្ឌរៀបចំយ៉ាងយកចិត្តទុកដាក់បំផុត ស្របទៅតាមការកំណត់របស់រាជរដ្ឋាភិបាល ដើម្បីទប់ស្កាត់ការរីករាលដាលនៃការឆ្លងចូលទៅក្នុងសហគមន៍។ ជារួម វិបត្តិកូវី បានធ្វើឱ្យទីផ្សារការងារនិងចំណូល ពីផ្នែកសិល្បៈវប្បធម៌ រងនូវផលប៉ះពាល់ធ្ងន់ធ្ងរ ទាំងផ្ទាល់និងប្រយោល ។ ប៉ុន្តែទោះជាយ៉ាងនេះក្តី អ្នកដែលមានអាជីពក្នុងវិស័យនេះបានខិតខំពុះពារជម្នះរាល់ការលំបាកនានា ជាបុគ្គលផ្ទាល់ក្តី ជាការផ្ដុំគ្នាជាក្រុមក្តី ផ្សព្វផ្សាយចែករំលែកការណែនាំនានាពីហានិភ័យនៃជំងឺកូវដ១៩ ក៏ដូចជាបង្កើតនូវស្នាដៃផ្សេងៗ ក្នុងវិស័យវប្បធម៌ ផ្សព្វផ្សាយទៅក្នុងបណ្តាញព័ត៌មាន ឬទៅកាន់មហាជន ដើម្បីរក្សានិងលើកតម្កើងសិល្បៈវប្បធម៌ខ្មែរ ពុំឱ្យមានការដាច់ដោចទាំងស្រុងនោះឡើយ ទោះជាវិស័យភាពយន្ត សិល្បៈ និងសកម្មភាពវប្បធម៌ផ្សេងទៀតក្តី។ បន្ថែមពីលើ នោះទៀត បងប្អូនយើងបានចូលរួមលះបង់នូវធនធានផ្ទាល់ខ្លួន ជាវិភាគទានជាមួយរាជរដ្ឋាភិបាល សម្រាប់ដោះស្រាយ បញ្ហាគ្រោះទឹកជំនន់ ជួយជនរងគ្រោះក្នុងវិបត្តិកូវីដ១៩ និងការទិញវាក់សាំងទប់ស្កាត់នូវជំងឺនេះផងដែរ។ ឆ្លៀតក្នុងឱកាសនេះ ខ្ញុំសូមសម្តែងនូវអំណរគុណ និងកោតសរសើរដោយស្មោះអស់ពីចិត្ត ចំពោះសេចក្តីក្លាហាន សេចក្តីស្រឡាញ់ និងការការពារ យ៉ាងប្តូរផ្តាច់របស់បងប្អូនយើងទាំងអស់ ចំពោះសិល្បៈនិងវប្បធម៌ជាតិ។
ដូចបងប្អូនជនរួមជាតិទាំងអស់បានជ្រាបរួចមកហើយថា ប្រវត្តិសាស្ត្របានបញ្ជាក់យ៉ាងច្បាស់អំពីសាវតារដ៏ រុងរឿងគួរជាទីស្ញប់ស្ញែងរបស់ព្រះរាជាណាចក្រកម្ពុជា ដែលជាប្រទេសមួយមានមរតកវប្បធម៌យ៉ាងសម្បូណ៌បែប ទាំងនៅ ក្នុងតំបន់អាស៊ីអាគ្នេយ៍ ក៏ដូចជានៅក្នុងពិភពលោកទាំងមូល។ វប្បធម៌ គឺមិនត្រឹមតែជាព្រលឹងនិងជាអត្តសញ្ញាណជាតិ ប៉ុណ្ណោះទេ តែក៏ជាវិស័យមួយដែលមានសក្តានុពលនិងកំពុងវិវឌ្ឍខ្លួនទៅក្នុងដំណើរការធ្វើពិពិធកម្មសេដ្ឋកិច្ចជាតិ ក៏ដូចជា ការអភិវឌ្ឍប្រកបដោយចីរភាពនិងបរិយាប័ន្ននៅកម្ពុជាផងដែរ។
តែទោះបីការរីករាលដាលនៃជំងឺឆ្លងកូដ១៩នៅតែជាបញ្ហាប្រឈមចម្បងយ៉ាងណាក្តី ក៏រាជរដ្ឋាភិបាលកម្ពុជានៅ បង្ហាញឆន្ទៈដ៏រឹងមាំ ក្នុងការបន្តរៀបចំតាមបែបបទនៃការរស់នៅបែបថ្មីនៃ “ទិវាវប្បធម៌ជាតិ ” ដែលជាព្រឹត្តិការណ៍វប្បធម៌ ប្រចាំឆ្នាំដ៏ធំ ហើយដែលត្រូវបានរៀបចំឡើងចំនួន២២លើករួចមកហើយចាប់តាំងពីឆ្នាំ១៩៩៩មក។ ស្របតាមការរស់នៅ ក្នុងគន្លងបែបថ្មី ការជួបជុំមនុស្សដោយផ្ទាល់ក្នុងចំនួនច្រើន ត្រូវជំនួសមកវិញនូវការរៀបចំកម្មវិធីសិល្បៈអបអរសាទរផ្សេងៗ តាមប្រព័ន្ធអនឡាញ ដែលមិនបង្កហានិភ័យដល់សុខុមាលភាពរបស់ប្រជាជន។ សម្រាប់ឆ្នាំ២០២១ នេះ ប្រធានបទ “យុវជនដើម្បីវប្បធម៌ជាតិ “ទិវាវប្បធម៌ជាតិ៣មីនា លើកទី២៣” នៅតែមានសារៈសំខាន់និងស្របតាមបរិបទប្រជាសាស្ត្រ ” ក្នុងរបស់ប្រទេសកម្ពុជានាពេលបច្ចុប្បន្ន និងបានបង្ហាញឱ្យឃើញថា ប្រជាជនវ័យកណ្តាលដែលមានអាយុចាប់ពី១៥ ដល់៥៩ឆ្នាំ គឺមានការកើនឡើងរហូតដល់៦១,៧% ដែលក្នុងនោះ ក្រុមយុវជនមានអាយុចាប់ពី១៥ ដល់៣០ឆ្នាំ ជាផ្នែកមួយដ៏ធំធេង។ កម្លាំងយុវជនគឺជា សក្តានុពល ធនធានមនុស្សដ៏សំខាន់មិនអាចខ្វះបាន នៅក្នុងការរួមចំណែកអភិរក្សនិងអភិវឌ្ឍ វប្បធម៌ជាតិ ហើយក៏ជាមូលដ្ឋានគ្រឹះសម្រាប់ការអភិវឌ្ឍសង្គមជាតិផងដែរ។ ស្ថិតក្នុងបរិបទនៃការរីកចម្រើនជាសកល ផ្នែកឌីជីថលនៅក្នុងសតវត្សរ៍ទី២១នេះ យុវជនកម្ពុជាមិនត្រឹមតែត្រូវមានការអប់រំ ការបណ្តុះបណ្តាលជំនាញវិជ្ជាជីវៈ និងចំណេះដឹងផ្នែកបច្ចេកវិទ្យាប្រកបដោយគុណភាពនិងសមធម៌ប៉ុណ្ណោះ តែក៏ត្រូវទទួលបានការចូលរួមយ៉ាងពេញលេញ ក្នុងសកម្មភាពសិល្បៈវប្បធម៌ ទាំងក្នុងទិដ្ឋភាពសង្គមនិងទិដ្ឋភាពសេដ្ឋកិច្ច។ សម្រាប់ទិដ្ឋភាពសង្គម យុវជនកម្ពុជាត្រូវទទួលបាន នូវការលើកទឹកចិត្តនិងការបណ្តុះស្មារតីស្នេហាជាតិ ស្នេហាប្រជាជន និងស្នេហាវប្បធម៌ជាតិ ដោយត្រូវរួមចំណែកយ៉ាង សកម្មក្នុងការអភិរក្ស ការផ្សព្វផ្សាយ និងការលើកស្ទួយតម្លៃវប្បធម៌និងសិល្បៈជាតិ ចៀសវាងនូវការភ្លើតភ្លើន ភ្លេចខ្លួន បំផ្លាញវប្បធម៌ជាតិខ្លួនឯងផ្ទាល់ ។ ដោយឡែក សម្រាប់ទិដ្ឋភាពសេដ្ឋកិច្ចវិញ យុវជនត្រូវចូលរួមឱ្យកាន់តែសកម្មថែមទៀត នៅក្នុងសកម្មភាពគាំទ្រការផ្តួចផ្តើមនិងគំនិតច្នៃប្រឌិតបង្កើតថ្មី ដោយឈរលើមូលដ្ឋានរក្សាការពារអត្តសញ្ញាណជាតិ និងស្មារតីសហគ្រិនភាពឱ្យបានកាន់តែផុសផុលឡើងថែមទៀត ដើម្បីពង្រឹងនិងពង្រីកសេដ្ឋកិច្ចវប្បធម៌ឱ្យកាន់តែរីកចម្រើន ដោយយកចិត្តទុកដាក់រក្សាលំនឹងនៃការអភិវឌ្ឍផ្នែកសិល្បៈវប្បធម៌ ទន្ទឹមគ្នាជាមួយការអភិវឌ្ឍផ្នែកវិទ្យាសាស្ត្រនិង បច្ចេកវិទ្យា។
ឆ្លៀតក្នុងឱកាសនេះ ខ្ញុំសូមកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែង ដោយឈរលើស្មារតី សហការនិងទទួលខុសត្រូវខ្ពស់របស់ថ្នាក់ដឹកនាំនិងមន្ត្រីរាជការគ្រប់លំដាប់ថ្នាក់របស់ក្រសួងវប្បធម៌និងវិចិត្រសិល្បៈ ដើម្បីសម្រេចឱ្យបាននូវបេសកកម្មក្នុងបុព្វហេតុអភិរក្សនិងអភិវឌ្ឍវប្បធម៌ជាតិ។ ក្រៅពីការចូលរួមក្នុងកម្មវិធីកំណែទម្រង់សំខាន់ៗ ទាំង៣របស់រាជរដ្ឋាភិបាល ក្រសួងវប្បធម៌និងវិចិត្រសិល្បៈបាននិងកំពុងរួមចំណែកយ៉ាងសកម្មក្នុងការអនុវត្ត “យុទ្ធសាស្ត្រ ចតុកោណដំណាក់កាលទី៤” ព្រមទាំង “ផែនការយុទ្ធសាស្ត្រអភិវឌ្ឍន៍ជាតិឆ្នាំ២០០៩-២០២៣ ដែលបានដាក់ចេញដោយ រាជរដ្ឋាភិបាលកម្ពុជា នីតិកាលទី៦នៃរដ្ឋសភា។ ទោះបីស្ថិតក្នុងស្ថានភាពដ៏អាក្រក់នៃវិបត្តិកូវដ១៩ក៏ដោយ ក៏ក្រសួងវប្បធម៌ និងវិចិត្រសិល្បៈនៅតែបង្ហាញឱ្យឃើញនូវកិច្ចខិតខំប្រឹងប្រែងនិងភាពជោគជ័យជាបន្តបន្ទាប់។
ក្នុងកិច្ចគាំពារនិងអភិរក្សបេតិកភណ្ឌវប្បធម៌អរូបីជាតិ ទូលព្រះបង្គំជាខ្ញុំ សូមសម្តែងនូវគារវកិច្ចនិងការគោរព ដឹងគុណយ៉ាងជ្រាលជ្រៅជាទីបំផុត ចំពោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ដែលបានបរិច្ចាគទ្រព្យផ្ទាល់របស់ព្រះអង្គ ដល់ក្រសួងវប្បធម៌និងវិចិត្រសិល្បៈ ដើម្បីធ្លាក់ចម្លងស្បែកធំមួយឈុតថ្មីចំនួន៩០ផ្ទាំង ក្នុងរឿងរាមកេរ្តិ៍ ព្រមទាំងរៀបចំ ចងក្រងជាអត្ថបទ និងវីដេអូឯកសារសម្រាប់ការសិក្សាស្រាវជ្រាវរបស់កូនចៅជំនាន់ក្រោយ។ ព្រះរាជូបត្ថម្ភដ៏ថ្លៃថ្លានេះ គឺជាការយកព្រះរាជហឬទ័យទុកដាក់ខ្ពស់ចំពោះការអភិរក្សសម្បត្តិវប្បធម៌ជាតិ ជាពិសេសសម្រាប់ល្ខោនស្រមោលស្បែកធំ ដែលជាអត្តសញ្ញាណជាតិនិងជាបេតិកភណ្ឌវប្បធម៌អរូបីនៃមនុស្សជាតិ។
ជាមួយគ្នានេះ សម្តេច ក៏សូមសម្តែងនូវមោទនភាពសប្បាយរីករាយ និងចូលរួមអបអរសាទរជាមួយក្រសួងវប្បធម៌និងវិចិត្រសិល្បៈ រួមទាំងស្ថាប័នពាក់ពន្ធ័នានា ចំពោះភាពជោគជ័យនៃកិច្ចចរចារយៈពេលជាង ៣ឆ្នាំកន្លងមក ក្នុងការធ្វើមាតុភូមិនិវត្តន៍ វត្ថុបុរាណខ្មែរចំនួនជាង១០០រូបពីបរទេសមកវិញ ដែលអាចចាត់ទុកថា នេះជាការវិលត្រឡប់នៃវត្ថុបុរាណខ្មែរដ៏ច្រើនបំផុត មិនធ្លាប់មាន ពីពេលមុនមក ហើយដែលក្នុងនោះសុខសន្តិភាពនិងស្ថេរភាពនយោបាយ គឺជាបុរេលក្ខខណ្ឌដ៏សំខាន់បំផុត ចំពោះបេសកកម្មយាងនិងអញ្ជើញព្រលឹងរបស់បុព្វបុរសខ្មែរត្រឡប់មកមាតុភូមិវិញជាមង្គលរបស់ជាតិ និងឆ្លុះបញ្ចាំងអំពី ការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងបុព្វហេតុដ៏ឧត្តុង្គឧត្តមដើម្បីវប្បធម៌ជាតិ។
បន្ថែមពីលើនោះ រាជរដ្ឋាភិបាលកម្ពុជាបានធ្វើការវិនិយោគរៀបចំកែលម្អហេដ្ឋារចនាសម្ព័ន្ធនិងសោភ័ណភាពនៃ ទីក្រុងសៀមរាប-អង្គរ ដែលជាដួងព្រលឹងជាតិនិងជាបេតិកភណ្ឌវប្បធម៌ពិភពលោក ដូចដែលត្រូវបានប្រកាសជា“ទីក្រុង វប្បធម៌អាស៊ាន” សម្រាប់ឆ្នាំ២០២១-២០២២ នៅក្នុងកិច្ចប្រជុំលើកទី៩ របស់រដ្ឋមន្ត្រីអាស៊ានទទួលបន្ទុកវប្បធម៌និងសិល្បៈ ដែលប្រទេសកម្ពុជាធ្វើជាម្ចាស់ផ្ទះនៅឆ្នាំ២០២០។ តាមរយៈការអភិរក្សជួសជុលសំណង់និងវត្ថុបុរាណជាច្រើននិងការកែប្រែ មុខមាត់ថ្មីនៃរមណីយដ្ឋានអង្គរគឺជាការជួយរក្សានូវតឹកតាងប្រវត្តិសាស្ត្រនិងកិត្យានុភាពជាតិ ហើយការថែរក្សាការពារនេះ អាចទទួលបានជោគជ័យនិងមាននិរន្តរភាពទៅបាន គឺតម្រូវឱ្យមានការចូលរួមគាំទ្រនិងជ្រោមជ្រែងពីគ្រប់មជ្ឍដ្ឋានទាំងអស់ ជាពិសេសអាជ្ញាធរដែនដីនិងប្រជាពលរដ្ឋដែលរស់នៅក្នុងតំបន់បេតិកភណ្ឌ។
សម្តេចតេជោ ក៏សូមគាំទ្រដោយពេញចិត្ត ចំពោះគំនិតផ្តួចផ្តើមរបស់ក្រសួងវប្បធម៌និងវិចិត្រសិល្បៈ ក្នុងការរៀបចំចងក្រង ឯកសារសិក្សាស្រាវជ្រាវកម្រិតថ្នាក់ជាតិលើកដំបូងស្តីពីរបាំព្រះរាជទ្រព្យ ឬរបាំក្បាច់បុរាណ ដែលជាបេតិកភណ្ឌវប្បធម៌ អរូបីនៃមនុស្សជាតិរបស់អង្គការយូណេស្កូ រួមទាំងការសិក្សាស្រាវជ្រាវនិងចងក្រងក្រាំងចម្រៀង សម្រាប់ច្រៀងអមនិងកំដរ ក្នុងរបាំព្រះរាជទ្រព្យឬរបាំក្បាច់បុរាណ ដែលជារបាំមូលដ្ឋានគ្រឹះតាំងពីបុរាណ ហើយអាចច្នៃប្រឌិតបង្កើតទៅជាចម្រៀង ថ្មីៗសម្រាប់ច្រៀងអម ឬកំដរក្នុងស្នាដៃរបាំថ្មីៗផ្សេងទៀត។ ឯកសារសិក្សាស្រាវជ្រាវនេះ នឹងក្លាយទៅជាឯកសារគោល ដ៏មានសារៈសំខាន់ថ្មីមួយទៀត ដើម្បីទុកជាក្បួនខ្នាតសម្រាប់ការហាត់រៀនរបាំរបស់ក្មេងៗជំនាន់ក្រោយ។
ទន្ទឹមគ្នានេះដែរ ការដំឡើងទម្រង់សិល្បៈតាមរូបភាពអភិវឌ្ឍថ្មីមួយចំនួនដើម្បីផ្សាយតាមប្រព័ន្ធអនឡាញ កំពុង ទទួលបានការស្វាគមន៍និងការចូលរួមពីមហាជនគ្រប់ស្រទាប់ គ្រប់វ័យ ទាំងក្នុងនិងក្រៅប្រទេសយ៉ាងច្រើនកុះករហួសពី ការស្មាន ហើយដែលនេះជាសកម្មភាពថ្មីក្នុងការរស់នៅតាមបរិបទថ្មី និងជាបទពិសោធន៍ជោគជ័យមួយដែលត្រូវតែ បន្តលើកទឹកចិត្ត។
សម្តេច ហ៊ុន សែន សូមឧទ្ទិសនូវរាល់សមិទ្ធផលវប្បធម៌ដែលសម្រេចបានទាំងអស់ដល់គុណូបការៈរបស់បុព្វបុរសខ្មែរ គ្រប់ជំនាន់ ព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រីយានីខ្មែរគ្រប់កាលសម័យ ព្រលឹងអ្នកវប្បធម៌ទាំងអស់ ដែលបានពលីទាំងកម្លាំងកាយ កម្លាំងចិត្ត និងកម្លាំងបញ្ញា បន្សល់ទុកនូវមរតកមហាសាលផ្នែកវប្បធម៌ដ៏សម្បូណ៌បែបនិង មានតម្លៃមិនអាចកាត់ថ្លៃបាន សម្រាប់កូនចៅជំនាន់ក្រោយ។ ខ្ញុំសូមអំពាវនាវ ឱ្យកូនខ្មែរគ្រប់ៗរូប ជាពិសេសយុវជនត្រូវ ខិតខំថែរក្សានិងការពារនូវ អ្វីៗទាំងអស់ដែលជាព្រលឹងជាតិនិងអត្តសញ្ញាណជាតិ សម្រាប់ជាមរតកយូរអង្វែងតទៅដល់ កូនខ្មែរជំនាន់ក្រោយ ហើយក៏សូមចូលរួមទាំងអស់គ្នាប្រយុទ្ធប្រឆាំងនឹងជំងឺឆ្លងកូវីដ ១៩ ដើម្បីរក្សាការពារកម្ពុជា ព្រះរាជាណាចក្រវប្បធម៌និងអច្ឆ័យៈ ឱ្យរុងរឿងជានិរន្តរតរៀងទៅ៕
