តារាស្រីវ័យក្មេង សំណាង សុរិយា កំពុងចាប់យក ឱកាសទីផ្សារខ្ពស់ក្នុងវិស័យសម្តែង
ភ្នំពេញ៖ ចំណាយពេលប្រឡូកនៅក្នុងអាជីពសិល្បៈត្រឹមរយៈប៉ុន្មានខែចុងក្រោយនេះប៉ុណ្ណោះស្រាប់តែតារាសម្តែងស្រីស្រស់សោភា កញ្ញា សំណាង សូរិយា កំពុងចាប់យក ឱកាសការងារសិល្បៈយ៉ាងណែនក្នុង ដៃ ។ មានភាពយន្តប្រមាណច្រើនជាង៥រឿងហើយដែលតារាស្រី រូបនេះបានសម្តែងក្នុងតំណែងជាតួអង្គសំខាន់ក្នុងសាច់រឿងស្នាមស្នេហ៍សមុទ្ររាម ។
តារាសម្តែងស្រី សំណាង សូរិយា បានលើកឡើងថា ស្នាដៃដែលនាងចូលរួមសម្តែងមាន ទាំងភាពយន្តខ្នាតធំ ភាពយន្តភាគ ភាពយន្តអប់រំខ្លី និងការថតឈុតផ្សព្វផ្សាយពាណិជ្ជកម្ម។ ទោះជាយ៉ាងណាឱកាស មិនមែនទទួលបានដោយចៃដន្យឡើយខណៈ រូបសម្រស់ សមត្ថភាព អត្តចរិក ពិសេសទេពកោសល្យ នៃការសម្តែងដែលជាទុនដ៏សំខាន់សម្រាប់វិស័យសិល្បៈគឺតារាស្រីរូបនេះមានគ្រប់គ្រាន់ ដើម្បីចូលរួមក្នុងវិស័យស័យសិល្បៈដែលបាននិងកំពុងប្រកួតប្រជែងមួយនេះ។
តារាស្រីរូបនេះបានបញ្ជាក់ថានាងចាប់ផ្តើមបោះជំហានចូលក្នុងអាជីពសម្តែងក្នុងអំឡុងខែកញ្ញា ឆ្នាំ២០២០ មកគឺនាងទទួលបានឱកាសថតភាពយន្ត ប្រមាណ៥រឿងកន្លងមកហើយ មានដូចជាភាពយន្តរឿង កូនខុសគន្លង ប្រពន្ធដើមប្រពន្ធចុង រឿង”ច្បាស់លាស់ ជាដើមដែលសុទ្ធសឹងតែជាភាពយន្តទទួលបានការគាំទ្រច្រើនពីទស្សនិកជន។ ពិសេសថ្មីនេះនាងទើបនឹងបញ្ចប់ការសម្តែងក្នុងភាពយន្តភាគខ្នាតវែងរបស់ទូរទស្សន៍ PNN ដែលដឹកនាំផលិតដោយសម្មិទ្ធករភាពយន្តល្បីឈ្មោះលោកស្រី ពាន់ភួងបុប្ផា គឺរឿង ស្នាមស្នេហ៍សមុទ្ររាម ដែលនាងសម្តែងជាតួអង្គសំខាន់មួយក្នុងភាពយន្តថ្មីនេះ។ នាងថាថ្មីៗនេះនាងក៏ទើបនឹងសម្រេចចិត្តទទួលយកការសម្តែងក្នុងភាពយន្តថ្មីមួយបន្ថែមទៀត និងជាឱកាសបន្តសំរុកការងារសិល្បៈ ដោយរំពឹងថាស្នាដៃថ្មីចាស់ទាំងអស់នឹងជាចំណីចក្ខុរបស់ទស្សនិកជន ហើយក៏ ក្លាយជាឱកាសមាសសម្រាប់នាង បន្ថែមប្រជាប្រិយភាពលើវិស័យសិល្បៈទី៧នេះផងដែរ។ នាងថាក្នុងការសម្តែងនាងអាចសម្តែងបានគ្រប់ទម្រង់នៃមិនថាជាតួកាចឬស្លូតឡើយ និងអាចបត់បែនគ្រប់ស្ថានភាពនៃសាច់រឿងទៅតានផលិតករតម្រូវនោះ។ ទោះជាយ៉ាងណានាងទទួលស្គាល់ថាអ្នកគាំទ្រនាងចង់ឲ្យនាងសម្តែងជាតួអង្គបែបរឹងមាំ មិនទន់ជ្រាយ មានម្ចាស់ការ ដូចជាការសម្តែងក្នុងរឿងប្រពន្ធដើមប្រពន្ធចុងនោះជាដើម។ ក្រៅពីការងារជាតារាសម្តែង សំណាង សូរិយាក៏ជាតារាសចម្រៀងម្នាក់ផងដែរដែលក្រោយពីពង្រឹងសមត្ថភាព ឆ្លងកាត់ការហ្វឹកហាត់នោះជំហានដំបូងនាងនឹងបញ្ចេញបទចម្រៀង Cover មួយចំនួនជាមុនសិនមុនពេលដែលបញ្ចេញបទចម្រៀងថ្មីOriginal Song នៅពេលដ៏ខ្លីខាងមុខ ហើយនាងក៏ប្រកាសក្នុងការបើកទទួលយកការងារច្រៀងជាតារាចម្រៀងកុងត្រារបស់ផលិតកម្មណា មួយផងដែរប្រសិនបើមានលក្ខខណ្ឌត្រូវគ្នានោះ។ ក្រៅពីក្លាយជាតារាសម្តែង និងត្រៀមខ្លួនជាតារាចម្រៀងនោះ នាងក៏នឹងប្រកាសបង្ហាញខ្លួនក្នុងនាមជាតារាតំណាងផលិតផល និងសេវាកម្មមួយចំនួនផងដែរសម្រាប់ឆ្នាំនេះ ដែលនាងចាត់ទុកថាជាជោគជ័យដែលមិននឹកស្មានដល់។
នាងថា៖ នេះគឺជាឱកាសដែលនាងមិននឹកស្មានដល់ ហើយជាការបោះជំហានយ៉ាងលឿនក្នុងអាជីពនេះ ប៉ុន្តែនាងនៅតែបន្តស្វែងយល់បន្ថែមពីចំណុចខ្វះខាត ដើម្បីបំពេញបន្ថែមដើម្បីឲ្យអាជីពមួយនេះកាន់តែល្អប្រសើរ។ នាងរំពឹងដែរថា ស្នាដៃថ្មីចាស់ទាំងអស់នឹងទទួលបានការ ពេញចិត្តច្រើនពីទស្សនិកជន ហើយនាងក៏ទទួលយកនូវមតិកែលម្អដើម្បីស្ថាបនាខ្លួន ដើម្បីឲ្យការងារសិល្បៈទាំងមូលរប ស់នាងកាន់តែឈានឡើង ៕ សំរិត
