រដ្ឋបាលខេត្តព្រះសីហនុ បានសម្រេចយកសណ្ឋាគារ សាកាណា មានទីតាំងស្ថិតនៅផ្លូវ១២២ ភូមិ១ សង្កាត់លេខ៣ ក្រុងព្រះសីហនុធ្វើជាកន្លែងព្យាបាលអ្នកជំងឺកូវីដ១៩
ព្រះសីហនុ៖ ក្នុងសេចក្តីសម្រេចដែលចុះហត្ថលេខាដោយឯកឧត្តម គួច ចំរើន នៅថ្ងៃទី២ ខែមីនា២០២១ បានណែនាំឱ្យម្ចាស់សណ្ឋាគារ សាកាណា ផ្អាកទទួលភ្ញៀវដទៃឱ្យស្នាក់នៅក្នុងសណ្ឋាគារ ហើយត្រូវសហការជាមួយក្រុមការងាររដ្ឋបាលខេត្ត និងមន្ដ្រីនៃមន្ទីរសុខាភិបាលខេត្ត ដើម្បីរៀបចំទីតាំងខាងលើឲ្យមានលក្ខណៈសមស្របជាកន្លែងព្យាបាលអ្នកជំងឺកូវីដ-១៩។
មន្ត្រី អ្នកនាំពាក្យរដ្ឋបាលខេត្តព្រះសីហនឲ្យបណ្តាញផ្សព្វផ្សាយដឹងថា គិតត្រឹមរសៀលថ្ងៃទី២ ខែមីនា ឆ្នាំ២០២១នេះ ទីតាំងដែលមានការជាប់ពាក់ព័ន្ធនឹងអ្នកកើតជំងឺកូវីដ១៩ កើនឡើងចំនួន៣២កន្លែង នៅក្រុងព្រះសីហនុ ក្នុងនោះក្រុមការងារជំនាញ កំពុងធ្វើការស្រាវជ្រាវ នឹងបិទទីតាំងដែលពាក់ព័ន្ធនោះជាបន្ដបន្ទាប់។
សម្រាប់ករណីផ្ទុះកូវីដ១៩ នៅក្នុងព្រឹត្តិការណ៍ សហគមន៍២០កុម្ភៈ នៅក្រុងព្រះសីហនុ គិតត្រឹមរសៀលថ្ងៃ០២មិនា២០២១ មានអ្នកឆ្លងជំងឺកូវីដ១៩ ឡើងដល់៥២នាក់ ។ ក្នុងចំណោមនោះមានពលរដ្ឋខ្មែរយើងម្នាក់ដែរ ក្រៅពីនេះមានជនជាតិចិននិងជនជាតិវៀតណាម៕
