រថយន្តម៉ាកសាំយ៉ុងបុកម៉ូតូ សិស្សសាលា ៣នាក់ស្លាប់ភ្លាមៗ នៅស្រុកព្រៃនប់
ខេត្តព្រះសីហនុ ៖ សិស្សសាលា ៣នាក់ ត្រូវបានរថយន្តម៉ាកសាំយ៉ុងបុកស្លាប់ភ្លាមៗ ខណៈកំពុងជិះម៉ូតូឌុបគ្នា៣នាក់តាមដងផ្លូវ ហើយក៏ជ្រុលចង្កូតចូលមកចំណែកផ្លូវម្ខាងទៀត ក៏ត្រូវរថយន្តម៉ាកសាំយ៉ុងបើកបរក្នុងទិសដៅបញ្ច្រាសទិសគ្នាបុកយ៉ាងពេញទំហឹង បណ្តាលឱ្យស្លាប់ភ្លាមៗនៅកន្លែងកើតហេតុតែម្តង ។
ហេតុការណ៍គ្រោះថ្នាក់ចរាចរណ៍នេះ បានកើតឡើងនាវេលាម៉ោង ០៩និង០០នាទីព្រឹក ថ្ងៃទី០៤ ខែមីនា ឆ្នាំ២០២១នេះ ស្ថិតនៅលើផ្លូវជាតិលេខ៤ ចន្លោះបង្គោលគីឡូម៉ែត្រលេខ (១៨២-១៨៣) ម្តុំចំណុចមុខសាលាបឋមសិក្សាអនុវិទ្យាល័យសំរុង ឃុំសំរុង ស្រុកព្រៃនប់ ខេត្តព្រះសីហនុ ។
ក្រោយកើតហេតុសមត្ថកិច្ចបានចុះអន្តរាគមន៍ ស្រាវជ្រាវរកអត្តសញ្ញាណជនរងគ្រោះនិងគ្រួសារ , និងធ្វើការសម្រួលចរាចរណ៍តាមដងផ្លូវកុំឱ្យមានការកកស្ទះ។
សមត្ថកិច្ចបានបញ្ជាក់ឱ្យដឹងថា៖ភាគីខាងម៉ូតូមួយគ្រឿងម៉ាក HONDA-SCOPPY ពណ៌ ស គ្មានផ្លាកលេខ ជិះឌុបគ្នា៣នាក់ មានទិសដៅ (ភ្នំពេញ-ខេត្តព្រះសីហនុ) លុះធ្វើដំណើរមកដល់ចំណុចកើតហេតុ អ្នកបើកម៉ូតូ បើកជ្រុលចង្កូតចូលមកចំណែកផ្លូវម្ខាងទៀត រួចក៏ត្រូវបានរថយន្ត មួយគ្រឿងម៉ាកសាំយ៉ុង ពណ៌សំបកឪឡឹក ពាក់ផ្លាកលេខ ភ្នំពេញ 2AQ-8400 ដែលមានទិសដៅផ្ទុយគ្នា បុកយ៉ាងពេញទំហឹងបណ្តាលឱ្យជនរងគ្រោះទាំង៣នាក់ស្លាប់ភ្លាមៗនៅនឹងកន្លែងកើតហេតុតែម្តង ។
បន្ទាប់ពីកើតហេតុភ្លាមៗ (អ្នកបើកបរមិនទាន់ស្គាល់អត្តសញ្ញាណនៅឡើយទេ បានចុះពីក្នុងរថយន្តរត់គេចខ្លួនបាត់ស្រមោល)។
បន្ទាប់ពីកើតហេតុ កម្លាំងនគរបាលជំនាញនៃការិយាល័យចរាចរណ៍ផ្លូវគោក ក៏បានចុះមកធ្វើការវាស់វែង ធ្វើកំណត់ហេតុ និងអូសយករថយន្តបង្ក និងម៉ូតូរងគ្រោះ យកទៅរក្សាទុកនៅការិយាល័យចរាចរណ៍ផ្លូវគោក ដើម្បីរងចាំធ្វើការដោះស្រាយទៅតាមនីតិវីធីនៃច្បាប់ ។
