ឆ្លងចរន្តអគ្គិសនី ឆេះកុដិ១ខ្នងវត្តចុងដា នៅស្រុកសន្ទុក
ខេត្តកំពង់ធំ ៖ កុដិព្រះសង្ឃ១ខ្នង ធ្វើអំពីឈើ ទំហំ១១ម៉ែត្រគុណ២៤ម៉ែត្រ ដំបូលប្រក់ក្បឿង ស្ថិតនៅចំណុចវត្តចុងដា ភូមិចុងដា ស្រុកសន្ទុក បានឆ្លងចរន្តអគ្គិសនី ឆាបឆេះអស់ទាំងស្រុង និងបណ្តាលឲ្យខូចខាតម៉ូតូ១គ្រឿង និងសម្ភារជាច្រើនទៀត កាលពីថ្ងៃទី០៦ ខែមីនា ឆ្នាំ២០២១ វេលាម៉ោង១០និង០០នាទី ។
លោកឧត្តមសេនីយ៍ត្រី ហៀង ហ៊ល ស្នងការរងផែនការងារគ្រប់គ្រងអាវុធគ្រឿងផ្ទុះនិងអគ្គិភ័យ បានដឹកនាំកម្លាំងចេញអន្តរាគមន៍ពន្លត់សរុបចំនួន២៦នាក់ រថយន្តអគ្គិភ័យបានចេញអន្តរាគមន៍សរុបចំនួន០៥គ្រឿង ដែលមាន រថយន្តអគ្គិភ័យរបស់ស្នងការដ្ឋាននគរបាលខេត្តចំនួន០៤គ្រឿង ប្រើប្រាស់ទឹកអស់ចំនួន០៤រថយន្ត ស្មើ១៧ម៉ែត្រគុប, រថយន្តអគ្គិភ័យរបស់អធិការដ្ឋាននគរបាលស្រុកសន្ទុកចំនួន០១គ្រឿង ប្រើប្រាស់ទឹកអស់ចំនួន០១រថយន្តស្មើ០៤ម៉ែត្រគុប។
លោកឧត្តមសេនីយ៍ត្រី ស្នងការបានឲ្យដឹងថា កុដិជាប្រភេទសំណង់ ធ្វើអំពីឈើ ដែលទំហំ១១មx២៤ម ដំបូលប្រក់ក្បឿង បណ្តាលឲ្យខូចខាត ឆេះកុដិ០១ខ្នងទាំងស្រុងទំហំ១១ម៉ែត្រគុណ២៤ម៉ែត្រ, ម៉ូតូចំនួន០១គ្រឿង, ម៉ាស៊ីនភ្លើងចំនួន០២គ្រឿង, គ្រែចំនួន០៣គ្រឿង, ឡាំងសម្ភារចំនួន០៣គ្រឿង, ទូរស័ព្ទដៃចំនួន០៣គ្រឿង, ស្គរធំចំនួន០១, កៅអីជ័រចំនួន១០០, តុឈើចំនួន១០, សម្ភារមួយចំនួនទៀត។
ចំពោះមូលហេតុ ៖ បណ្តាលមកពីឆ្លងចរន្តអគ្គិសនី៕
