ប៉េអឹមឃាត់ខ្លួន ផ្កាយពីរខ្យល់ម្នាក់ បន្លំពាក់ឯកសណ្ឋាន និងក្លែងលិខិតសាធារណៈ ដើរឆបោកគេ
ខេត្តបន្ទាយមានជ័យ ៖ មានជនសង្ស័យម្នាក់បន្លំពាក់ឯកសណ្ឋាន ជានាយទាហានឧត្ដមសេនីយ៍ទោ និងក្លែងលិខិតសាធារណៈដើរឆបោកគេត្រូវកំលាំងអាវុធហត្ថឃាត់ខ្លួននៅវេលាម៉ោង១១ ថ្ងៃទី៦ ខែមីនា ឆ្នាំ២០២១។
លោក វរសេនីយ៍ត្រី នួន នីណារ៉ូ មេបញ្ជាការ មូលដ្ឋានកងរាជអាវុធហត្ថក្រុងប៉ោយប៉ែតបានប្រាប់ឲ្យដឹងថា ដោយទទួលបានបទបញ្ជាពីលោក ឧត្តមសេនីយ៍ត្រី បោន ប៊ិន មេបញ្ជាកកងរាជអាវុធហត្ថខេត្តបន្ទាយមានជ័យ និងអនុវត្តដីកាលេខ០០៩/២០២១ ចេញដោយលោក ម៉ែន ហុង ព្រះអាជ្ញារង នៃអយ្យការអមតុលាការយោធា ធ្វើការឃាត់ខ្លួនជនសង្ស័យចំនួន១នាក់ ពាក់ព័ន្ធករណីក្លែងបន្លំឯកសណ្ឋានយោធា ជានាយទាហានឋានន្តរស័ក្ត ឧត្ដមសេនីយ៍ទោ និងក្លែងលិខិតសាធារណៈ ព្រមទាំងឆបោកនៅចំណុចភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោក វរសេនីយ៍ត្រី នួន នីណារ៉ូបានបញ្ជាក់ឲ្យដឹងបន្តទៀតថាជនសង្ស័យមានឈ្មោះ សុខ ប៊ុនធឿន ភេទប្រុស អាយុ៤៤ឆ្នាំ រស់នៅភូមិអូរកន្ថោរខាងត្បូង សង្កាត់អូរកន្ថោរ ក្រុងស្ទឹងសែន ខេត្តកំពង់ធំ ក្រោយពីឃាត់ខ្លួន ជនសង្ស័យរូបនេះត្រូវបានបញ្ជូនមកបញ្ជាការដ្ឋានអាវុធខេត្ត ដើម្បីធ្វើការសួរនាំទៅតាមនីតិវិធី។
លោក វរសេនីយ៍ទោ ធៀម ភក្ដី ប្រធានមន្ទីរស្រាវជ្រាវព័ត៌មានសន្តិសុខអាវុធហត្ថខេត្ត បានឲ្យដឹងថា ក្រោយពីសួរនាំរួចជនសង្ស័យ បានឆ្លើយសារភាពថា ខ្លួនពិតជាបានបន្លំពាក់ឯកសណ្ឋានជានាយទាហានឧត្ដមសេនីយ៍ទោនិងក្លែងលិខិតសាធារណៈដើរឆបោកកន្លងមកពិតប្រាកដ។ ក្រោយពីបានចម្លើយសារភាពហើយបានកម្លាំងអាវុធហត្ថខេត្តបញ្ជូនបន្តទៅស្នងការស្រាវជ្រាវព័ត៌មានសន្តិសុខ បញ្ជាការដ្ឋានកងរាជអាវុធហត្ថលើផ្ទៃប្រទេសចាត់ការបន្តតាមនីតិវិធីច្បាប់ផងដែរ៕
