ក្មេងទំនើងមួយក្រុមប្រដាប់ដោយដាវ ជិះម៉ូតូកាប់ទៅលើយុវជន២នាក់ បណ្តាលឲ្យម្នាក់ដាច់ដៃម្ខាង ,ចាប់ជនដៃដល់ម្នាក់
ភ្នំពេញ ៖ យុវជន២នាក់ម្នាក់ដាច់ដៃម្ខាង និងម្នាក់ទៀតបានរត់គេចខ្លួនរួច បន្ទាប់ពីមានក្មេងទំនើងមួយក្រុមជិះម៉ូតូជិត១០គ្រឿង ប្រដាប់ទៅដោយដាវបានជិះទៅបុកពីក្រោយម៉ូតូជនរងគ្រោះ ឲ្យដួលរួចទាញដាវកាប់ទៅលើជនរងគ្រោះបណ្តាលឲ្យម្នាក់ដាច់ដៃម្នាក់ និងម្នាក់រត់គេចខ្លួនរួច។ ចំណែកជនបង្កត្រូវសមត្ថកិច្ចឃាត់បានម្នាក់។
ហេតុការណ៍ភ្ញាក់ផ្អើលនេះដែរបានកើតឡើងនៅវេលាម៉ោង ៨ និង៣០នាទីយប់ថ្ងៃចន្ទទី៨ ខែមីនា ឆ្នាំ ២០២០ ស្ថិតនៅតាមបណ្តោយផ្លូវបេតុង ចំណុចជាប់សាលាបារាំង ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ជនរងគ្រោះទី១ មានឈ្មោះ ឈៀង សំណាង ភេទប្រុសអាយុ ១៧ ឆ្នាំ (ដាច់ដៃ) , ជនរងគ្រោះទី២ មានឈ្មោះ ហេងប៊ុនលៀង ភេទប្រុស អាយុ ១៧ ឆ្នាំ (មិនមានរងរបួស)។
ប្រភពព័ត៌មានពីជនរងគ្រោះ ឈ្មោះហេង ប៊ុនលាង បានរៀបរាប់ឲ្យដឹងថា មុនពេលកើតហេតុខ្លួននិងមិត្តភក្តិបានជិះម៉ូតូម៉ាកហុងដាទ្រីមសង់ សេ១២៥មួយគ្រឿងពណ៌ខ្មៅពាក់ផ្លាកលេខភ្នំពេញ1-BR 9256 ជិះឌុបគ្នា២នាក់ទៅអង្គុយហូបអីនៅជិតនិងកន្លែងកើតហេតុ ចំណុចជាប់សាលាបារាំង ពេលហូបរួចបាននាំគ្នាឡើងម៉ូតូគោលបំណងបម្រុងទៅផ្ទះវិញ ខណៈមកដល់ចំណុចកើតហេតុ ស្រាប់តែលេចមុខក្មេងទំនើងមួយក្រុម បានជិះម៉ូតូជិត១០គ្រឿង ទាំងមិនដែលស្គាល់គ្នា និងមានគំនុំជាមួយគ្នាសោះ បានជិះម៉ូតូមកបុកពីក្រោយបណ្តាលឲ្យម៉ូតូជនរងគ្រោះដួល រួចនាំគ្នាដេញវាយនិងកាប់ជាច្រើនកាំបិត ទាំងដែលជនរងគ្រោះព្យាយាមលើកដៃទៅរងក៏កាប់ត្រូវដាច់ដៃខាងស្តាំម្ខាង និងនាក់រួមដំណើរម្នាក់ទៀត បានរត់គេចខ្លួនរួចស្រែកឲ្យប្រជាពលរដ្ឋជួយទាក់ទងទៅសមត្ថកិច្ច ចុះមកភ្លាមៗឃាត់បានជនបង្កម្នាក់។
ក្រោយពេលកើតហេតុសមត្ថកិច្ចមូលដ្ឋានខណ្ឌមានជ័យ សហការជាមួយកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ ចុះមកដល់កន្លែងកើតហេតុឃាត់បានជនបង្កម្នាក់ភ្លាមៗ ខណៈបក្ខពួកជាច្រើននាក់ទៀត កំពុងតែជិះរត់គេចខ្លួន រួចបានឲ្យឪពុកម្តាយជនរងគ្រោះ មកដាក់ពាក្យបណ្តឹងងាយស្រួលសមត្ថកិច្ចតាមស្រាវជ្រាវបន្ត ដើម្បីតាមឃាត់បក្ខពួកជាច្រើននាក់ទៀត យកមកចាត់ការទៅតាមផ្លូវច្បាប់៕
