ការងារបង្កបង្កើនផលស្រូវរដូវប្រាំង ក្នុងខែកុម្ភៈឆ្នាំ ២០២១ សម្រេចបានជាង១៣៧ភាគ រយ នៃផែនការមិនប៉ះពាល់កូវិដ-១៩
ភ្នំពេញ៖ តាមរបាយការណ៏ឲ្យដឹងពីក្រសួងកសិកម្ម រុក្ខាប្រមាញ់ និងនេសាទ បង្ហាញលទ្ធផលផ្នែកដំណាំស្រូវរដូវប្រាំង ក្នុងខែកុម្ភៈ ឆ្នាំ២០២១ ដោយសម្រេចបាន៦៣០,៨៨៣ ហិកតា ស្មើនឹង១៣៧,៣៩ ភាគរយ នៃផែនការចំនួន៤៥៩,២០០ហិកតា មិនប៉ះពាល់ជំងឺកូវិដ-១៩ ខណៈជំងឺនេះកំពុងរាតត្បាតចូលសហគមន៏យ៉ាងណាក្ដីនោះ ។
លោក វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានឱ្យដឹងនៅថ្ងៃនេះថា៖ ក្នុងខែកុម្ភៈ ឆ្នាំ២០២១ ផលិតកម្ម ដំណាំស្រូវរដូវប្រាំងបានភ្ជួររាស់លើផ្ទៃដីសម្រេចបានចំនួន ៦៣០,៩៦៤ហិកតា ក្នុងនោះភ្ជួររាស់ដោយគោ-ក្របីមានចំនួន ៤២៥៧ហិកតា ស្មើនឹង០,៦៧ភាគរយ និងដោយគ្រឿងយន្តចំនួន៦២៦,៧០៧ហិកតា ស្មើនឹង ៩៩,៣ភាគរយ ។
លោកវេង សាខុន បញ្ជាក់ថា ផ្ទៃដីសាបសម្រេចបានចំនួន ២៦ហិកតា និងផ្ទៃដីស្ទូងនិងព្រោះ សម្រេចបានចំនួន៦៣០,៨៨៣ហិកតាស្មើនឹង១៣៧, ៣៩ ភាគរយ នៃផែនការចំនួន៤៥៩,២០០ហិកតា លើសឆ្នាំមុន៣៣,៣៧៥ហិកតា ។
លោកបានបន្តថា ចំពោះការងារប្រមូលផលស្រូវប្រាំងសម្រេចបានចំនួន២៤៧,០៨៩ហិកតា ដោយទទួលបរិមាណផលសរុបចំនួន១,០៩០,៣៣៤ តោន និងទទួលទិន្នផលគិតជាមធ្យម ៤,៤១៣តោនក្នុងមួយហិកតា ។
ដោយឡែក ការនាំចេញអង្ករមានចំនួន៤១, ៩៤៩តោន មានការថយចុះចំនួន ៤៤,១០០ តោនស្មើនឹង៥១,២៥ ភាគរយ តិចជាងបរិមា ណ នាំចេញក្នុងខែកុម្ភៈ ឆ្នាំ២០២០ដែលមានចំនួន៨៦,០៤៩តោន ៕ សំរិត
