តំណាងអចិន្ត្រៃយ៍កម្ពុជា ថ្លែងបទអន្តរាគមន៍ក្នុងកិច្ចពិភាក្សាទូទៅលើរបៀបវារៈទី៥ ស្ដីពី “យន្តការ និងស្ថាប័នសិទ្ធិមនុស្ស”
ហ្សឺណែវ ៖ ថ្ងៃទី១៧ ខែមីនា ឆ្នាំ២០២១ ឯកអគ្គរាជទូត និងជាតំណាងអចិន្ត្រៃយ៍កម្ពុជា អាន សុខខឿន បានចូលរួមឡើងថ្លែងបទអន្តរាគមន៍ក្នុងកិច្ចពិភាក្សាទូទៅលើរបៀបវារៈទី៥ ស្ដីពី “យន្តការ និងស្ថាប័នសិទ្ធិមនុស្ស” នាសម័យប្រជុំលើកទី៤៦ នៃក្រុមប្រឹក្សាសិទ្ធិមនុស្ស។
ឯកអគ្គរាជទូត បានថ្លែងថា គណៈប្រតិភូយើងខ្ញុំសូមចូលរួមគាំទ្រសេចក្តីថ្លែងការណ៍របស់អាស៊ាន ក្នុងការគូសបញ្ជាក់អំពី ភាពចាំបាច់កែលម្អការងាររបស់អ្នកកាន់អាណត្តិនីតិវិធីពិសេស ដោយផ្តោតលើវិជ្ជាជីវៈ គណនេយ្យភាព និងទំនួលខុសត្រូវ ប្រកបដោយភាពស្មោះត្រង់។
រយៈពេលជិត ៣ ទសវត្សរ៍ កន្លងមកនេះ កម្ពុជាបានទទួលយកអ្នករាយការណ៍ពិសេសប្រចាំ ប្រទេសចំនួន ៦ រូប ដែលអាណត្តិពួកគាត់ត្រូវបានបន្ត តាមរយៈសេចក្តីសម្រេចចិត្ត អនុម័ត ដោយកុងសង់ស៊ីស ហើយរាល់សំណើសុំធ្វើទស្សនកិច្ចទៅកាន់ប្រទេសកម្ពុជាក៏ទទួលបានការ យល់ព្រមពីរាជរដ្ឋាភិបាលដែរ។ ប្រការទាំងនេះបង្ហាញឱ្យឃើញច្បាស់ពីការចូលរួម ដោយបើក ចំហ និងស្ថាបនារបស់កម្ពុជា ជាមួយនឹងយន្តការនេះ។
កិច្ចសហប្រតិបត្តិការ គឺជាដំណើរការទៅវិញទៅមក ដែលអ្នកកាន់អាណត្តិនីតិវិធីពិសេស ដូចគ្នាដែរ ត្រូវបំពេញតួនាទីរបស់ខ្លួន ប្រកបដោយភាពសត្យានុម័ត មិនលម្អៀង មិនជ្រើសតែ មួយជ្រុង និងមិនធ្វើនយោបាយូបនីយកម្ម។
ក្នុងន័យនេះ ដើម្បីធ្វើឱ្យកិច្ចសហប្រតិបត្តិការ ទទួលបានប្រសិទ្ធភាពពិតប្រាកដ អ្នកកាន់អាណត្តិនីតិវិធីពិសេស គួរ៖
ទី១៖ បំពេញភារកិច្ចរបស់ខ្លួនដោយប្រកាន់ខ្ជាប់យ៉ាងម៉ឺងម៉ាត់នូវ “ក្រមសីលធម៌” និង “សៀវភៅណែនាំប្រតិបត្តិការសម្រាប់នីតិវិធីពិសេសៗ ដែលគូសបញ្ជាក់ ពីសារៈសំខាន់នៃ ការប្រមូលព័ត៌មានពិត ចេញពីប្រភពដែលបានផ្ទៀងផ្ទាត់ត្រឹមត្រូវ។ អ្នកកាន់អាណត្តិ នីតិវិធីពិសេសត្រូវចៀសវាងការសន្មតថាមានកំហុសទុកជាមុន និងការប្រញាប់ប្រញាល់ចេញផ្សាយសេចក្តីប្រកាសព័ត៌មាន ដោយពុំបានផ្ទៀងផ្ទាត់ព័ត៌មានឱ្យបាន ត្រឹមត្រូវ ជាមួយប្រភពរដ្ឋាភិបាល ជាមុន។
ទី២៖ ជួយដល់រដ្ឋក្នុងវិស័យសិទ្ធិមនុស្ស តាមរយៈកិច្ចសន្ទនានិងកិច្ចសហប្រតិបត្តិការ ពិតប្រាកដ ដោយត្រូវពិចារណាអំពីបរិបទដោយឡែករបស់ប្រទេសនីមួយៗ និងមិន ត្រូវដើរតួជាចៅក្រមកាត់សេចក្តី នៅពេលធ្វើសេចក្តីរាយការណ៍និងការសន្និដ្ឋានឡើយ។
ទី៣៖ ផ្តល់ការប្រឹក្សាយោបល់លើកិច្ចសហប្រតិបត្តិការបច្ចេកទេស និងជំនួយកសាង សមត្ថភាព តាមការស្នើសុំរបស់រដ្ឋ ដើម្បីដោះស្រាយឬសគល់នៃបញ្ហាប្រឈម ជាជាង ពិនិត្យមើលលើតែអាការៈខាងក្រៅនោះឡើយ។
ទី៤. ចុងបញ្ចប់ មានតែការយកចិត្តទុកដាក់អនុវត្តឱ្យបានត្រឹមត្រូវតាមពិធីសារខាងលើប៉ុណ្ណោះទេ ទើបអ្នកកាន់អាណត្តិនីតិវិធីពិសេស អាចទទួលបាននូវការជឿទុកចិត្តពីបណ្តារដ្ឋទាំងអស់៕
