ឃាត់ខ្លួនអ្នកលេងហ្វេសប៊ុកម្នាក់ បង្ហោះព័ត៌មានមិនពិត រឿងជិះម៉ូតូអត់ពាក់ម៉ាស់ ត្រូវប៉ូលីសចាប់
ខេត្តបាត់ដំបង ៖ នគរបាលខេត្តបាត់ដំបង ឃាត់ខ្លួនបុរសម្នាក់ បានសរសេរបង្ហោះនៅក្នុងគណនីរបស់ខ្លួន ដោយលើកឡើងថា មន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបង ផាកពិន័យអ្នកធ្វើដំណើរដែល មិនបានពាក់ម៉ាស់។ ពាក់ព័ន្ធករណីនេះ ស្នងការដ្ឋាននគរបាលខេត្តបាត់ដំបង អំពាវនាវដល់បងប្អនអ្នកប្រើប្រាស់បណ្តាញទំនាក់ទំនងសង្គម សូមមេត្តាប្រើប្រាស់បណ្តាញទំនាក់ទំនងក្នុងរឿងត្រឹមត្រូវ ចៀសវាងការប្រើប្រាស់បណ្តាញសង្គមដែលនាំបង្កឱ្យខ្លួនមានទោសកំហុស។
ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តបាត់ដំបង មានកិត្តិយសសូមជម្រាបជូនសាធារណជន ជាពិសេសបងប្អូននិយមប្រើប្រាស់បណ្តាញសង្គមជ្រាបថា នៅប៉ុន្មានថ្ងៃកន្លងមកនេះ មានអ្នកប្រើប្រាស់បណ្តាញសង្គមមួយចំនួនតូចបានសរសេរបង្ហោះនៅក្នុងគណនីរបស់ខ្លួន ដោយលើកឡើងថា មន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបង ផាកពិន័យអ្នកធ្វើដំណើរដែល មិនបានពាក់ម៉ាស់។
ជាក់ស្តែងកាលពីថ្ងៃទី១៩ ខែមីនា ឆ្នាំ២០២១ ម្ចាស់គណនីហ្វេសប៊ុកឈ្មោះ ចៃឈីង ពិធីការក្រុងបាត់ដំបង បានសរសេរបង្ហោះផ្សព្វផ្សាយថា (ច្បាស់ហើយបងប្អូនជិះម៉ូតូអត់ពាក់ម៉ាស់ប៉ូលីសចាប់មែន)។ ការសរសេរបង្ហោះក្នុងគណនីរបស់គាត់ភ្លាមៗបានបង្កឱ្យមានការលើកឡើងនូវមតិយោបល់រិះគន់ចំៗដល់សមត្ថកិច្ចនគរបាលចរាចរណ៍ផ្លូវគោក ក្នុងពេលដែលអ្នកប្រើប្រាស់បណ្តាញសង្គមមួយចំនួនមិនទាន់បានទទួលប្រពភព័ត៌មានឱ្យបានច្បាស់លាស់នៅឡើយ។
តាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង នៅថ្ងៃទី២០ ខែមីនា ឆ្នាំ២០២១នេះ សមត្ថកិច្ចនគរបាលបានស្វែងរកម្ចាស់គណនីខាងលើមកធ្វើការសាកសួរ ហើយទីបំផុតម្ចាស់គណនីដែលមានឈ្មោះពិត តាំង ចៃឈីង ភេទប្រុស អាយុ ២៩ឆ្នាំ រស់នៅឃុំវត្តតាមឹម ស្រុកសង្កែ ខេត្តបាត់ដំបង បានសារភាពថាការសរសេរខ្លឹមសារនិងបង្ហោះផ្សព្វផ្សាយក្នុងគណនីហ្វេសប៊ុករបស់ខ្លួនកាលពីថ្ងៃទី១៩ ខែមីនា ឆ្នាំ២០២១នោះ គឺជារឿងមិនពិតទេ ទាំងនោះគាត់គ្រាន់តែឮគេថាតែប៉ុណ្ណោះ ហេីយនៅពេលដែលដឹងថារឿងនោះជារឿងមិនពិតគាត់បានលុបខ្លឹមសារនោះចេញពីគណនីហ្វេសប៊ុកគាត់ចោលហើយ។
លោកវរសេនីយ៍ឯក ចាន់ សុធី នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តបាត់ដំបង បានបញ្ជាក់ថា នគរបាលចរាចរណ៍ផ្លូវគោកមិនមានការផាកពិន័យចំពោះអ្នកធ្វើដំណើរតាមដងផ្លូវព្រោះតែមិនបានពាក់ម៉ាស់នោះទេ។ ពេលនេះម្ចាស់គណនីហ្វេសប៊ុកខាងលើកំពុងធ្វើកិច្ចសន្យាបញ្ឈប់សកម្មភាពបែបនេះនៅចំពោះមុខសមត្ថកិច្ចនគរបាល។
នៅចំពោះមុខបញ្ហាបែបនេះ ក្នុងនាមស្នងការដ្ឋាននគរបាលខេត្តបាត់ដំបង សូមអំពាវនាវដល់បងប្អនអ្នកប្រើប្រាស់បណ្តាញទំនាក់ទំនងសង្គម សូមមេត្តាប្រើប្រាស់បណ្តាញទំនាក់ទំនងក្នុងរឿងត្រឹមត្រូវ ចៀសវាងការប្រើប្រាស់បណ្តាញសង្គមដែលនាំបង្កឱ្យខ្លួនមានទោសកំហុស ឬប្រើប្រាស់បណ្តាញសង្គមក្នុងចេតនាបំពុលបរិយាកាសសង្គមឱ្យសោះ សូមអរគុណ៕
