អ្នកពាក់ព័ន្ធជាមួយបុរសម្នាក់ ដែលរកឃើញថា មានវិជ្ជមានកូវិដ-១៩ នៅសៀមរាប១៤៣ នាក់ មកធ្វើតេស្ដលើកទី១ អវិជ្ជមានទាំង ១៤៣នាក់

សៀមរាប៖ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឱ្យដឹងតាមប្រព័ន្ធតេលេក្រាម កាលពីល្ងាចថ្ងៃទី២១ខែមីនាឆ្នាំ២០២១នេះថា បន្ទាប់បុរសម្នាក់ត្រូវបានរកឃើញថាមានឆ្លងមេរោគកូវីដ១៩ អាជ្ញាធរខេត្ត ក៏ដូចជាសមត្ថកិច្ចជំនាញ នៃមន្រ្តីសុខាភិបាលបានចុះស្រាវជ្រាវរកអ្នកពាក់ព័ន្ធ ដើម្បីប្រមូលសំណាកយកមកធ្វើតេស្ត។ ហើយសម្រាប់ការប្រមូលសំណាកជំនាញជំហានដំបូងមានមនុស្សចំនួន១៤៣នាក់ ជាលទ្ធផលគឺអវិជ្ជមានទាំងអស់ ហើយមន្រ្តី ក៏កំពុងតែធ្វើការងារជាបន្តបន្ទាប់ទៀត។
ពាក់ព័ន្ធករណីកូវីដនេះរដ្ឋបាលខេត្តសៀមរាបបានសម្រេចផ្អាកបណ្ដោះអាសន្ននូវការចរាចរណ៍ចេញ-ចូលចំពោះប្រជាពលរដ្ឋរស់នៅក្នុងសង្កាត់គោកចក និងផ្អាកទីតាំងចំនួន៤កន្លែងជាបន្តបន្ទាប់។
យោងតាមសេចក្តីប្រកាសរបស់រដ្ឋបាលខេត្តសៀមរាប កាលពីល្ងាចថ្ងៃទី២០ខែមីនាឆ្នាំ២០២១ ជម្រាបជូនសាធារណជនឱ្យបានជ្រាបថា៖ ក្នុងព្រឹត្តិការណ៍ ការឆ្លងរីករាលដាលជំងឺកូវីដ-១៩ ចូលក្នុងសហគមន៍ ២០កុម្ភៈ នេះ ខេត្តសៀមរាប បានរកឃើញវិជ្ជមានកូវីដ១៩ បុគ្គលទី២ នៅថ្ងៃទី២០ ខែមីនា ឆ្នាំ២០២១ ទៅលើលោក ម៉ាប់ វុន អាយុ៣៥ឆ្នាំ មានអាសយដ្ឋានស្នាក់នៅភូមិគោកត្នោត សង្កាត់គោកចក ក្រុងសៀមរាប ខេត្តសៀមរាប ដែលបានប្រកបមុខរបរជាកម្មករបើករថយន្តដឹកដី នៅភូមិដីឥដ្ឋ ឃុំដីឥដ្ឋ ស្រុកកៀនស្វាយ ខេត្តកណ្តាល ដោយបានវិលត្រឡប់មកខេត្តសៀមរាប កាលពីថ្ងៃទី៨ ខែមីនា ឆ្នាំ២០២១។
ដើម្បីទប់ស្កាត់ការរីករាលដាលជំងឺកូវីដ-១៩ គណៈបញ្ជាការឯកភាពរដ្ឋបាលខេត្តសៀមរាប បានសម្រេចផ្អាកចរាចរចេញ-ចូល សង្កាត់គោកចក ក្រុងសៀមរាប ចាប់ពីវេលាម៉ោង ១៩:០០នាទី ថ្ងៃទី២០ ខែមីនា ឆ្នាំ២០២១ នេះតទៅ។ និងបានផ្អាកទីតាំងចំនួន៤កន្លែងនៅក្នុងក្រុងសៀមរាប ក្នុងនោះមាន គ្លីនិក៧៧៧ និងគ្លីនិកសុខភាព ស្ថិតនៅសង្កាត់ស្វាយដង្គំ និងបន្ទប់ពិគ្រោះជំងឺ ២កន្លែងនៅក្នុងសង្កាត់គោកចក ក្រុងសៀមរាប។ហើយសម្រាប់ បងប្អូនដែលបានជួបប្រាស្រ័យទាក់ទងនឹងបុគ្គលដូចបានជម្រាបជូនខាងលើ ឬមានករណីសង្ស័យ ឬបានធ្វើដំណើរទៅកាន់ទីកន្លែងមួយ ចំនួន៤ខាងលើរួមមាន៖ពេទ្យ ចាវ ចាន់ នៅផ្សារភូមិភាគ៤ (ចាប់ថ្ងៃទី១៣ ខែមីនា ឆ្នាំ២០២១) ពេទ្យ ទូច កូ នៅខាងលិចផ្សារដើមក្រឡាញ់ (ចាប់ពីថ្ងៃទី១៥ ខែមីនា ឆ្នាំ២០២១) ពេទ្យ៧៧៧ នៅផ្លូវជាតិលេខ៦ ខាងលិចស្តុបទន្លេសាប (ចាប់ពីថ្ងៃទី១៧ ខែមីនា ឆ្នាំ២០២១) និងគ្លីនិកសុខភាព (ចាប់ពីយប់ថ្ងៃទី១៩ ខែមីនា ឆ្នាំ២០២១) សូមរួសរាន់មកយកសំណាក នៅមណ្ឌលចត្តាឡីស័កសាលាគរុកោសល្យ។
ក្រៅពីផ្អាកជាបណ្តោះអាសន្នការចេញចូលនៅសង្កាត់គោកចក និងទីតាំងចំនួន៤ ខាងលើក្រសួងអប់រំក៏បានប្រកាសផ្អាកដំណើរការសាលារៀនទូទាំងប្រទេសផងដែរ៕ . សំរិត